595 વન્યજીવો માટે ખાસ કૂલિંગ વ્યવસ્થા શરૂ કરવામાં આવી
ખાસ-ખબર ન્યૂઝ રાજકોટ
- Advertisement -
ઉનાળાની તીવ્ર ગરમી વચ્ચે પ્રદ્યુમ્ન પાર્ક ઝૂ ખાતે વન્યજીવોની સંભાળમાં વ્યાપક ફેરફારો કરવામાં આવ્યા છે. તાપમાનમાં સતત વધારા વચ્ચે ઝૂ તંત્ર દ્વારા પ્રાણીઓના આરોગ્ય અને વર્તનને ધ્યાનમાં રાખીને ખોરાક તેમજ રહેઠાણ બંને સ્તરે ખાસ વ્યવસ્થા અમલમાં મૂકાઈ છે. ઝૂમાં હાલ કુલ 69 પ્રજાતિના 595 જેટલા વન્યજીવો વસે છે. વધતી ગરમીના કારણે ખાસ કરીને સિંહ, વાઘ અને દીપડા જેવા માંસાહારી પ્રાણીઓના પાચનતંત્ર ઉપર અસર થતી હોય છે, જેને ધ્યાનમાં રાખી તેમના ખોરાકમાં અંદાજે 10 ટકા ઘટાડો કરવામાં આવ્યો છે. નિષ્ણાતોના મતે, વધુ ગરમીમાં ભારે ખોરાક પ્રાણીઓ માટે હાનિકારક બની શકે છે, તેથી હળવો અને નિયંત્રિત આહાર આપવો જરૂરી બને છે. બીજી તરફ, મગર અને સાપ જેવા સરિસૃપો માટે પરિસ્થિતિ વિપરીત છે. ગરમીમાં તેમની સક્રિયતા વધતી હોવાથી તેમના ખોરાકમાં વધારો કરવામાં આવ્યો છે, જેથી તેમની ઊર્જાની જરૂરિયાત પૂર્ણ થઈ શકે. આ રીતે દરેક પ્રજાતિની જૈવિક જરૂરિયાતોને અનુરૂપ ખોરાક વ્યવસ્થામાં ફેરફાર કરવામાં આવ્યો છે.
ગરમી સામે લડવા માટે ઝૂમાં કૂલિંગ ટ્રીટમેન્ટ શરૂ કરવામાં આવી છે. સિંહ, વાઘ અને દીપડાના પાંજરામાં વિશાળ વોટર પોન્ડ બનાવવામાં આવ્યા છે, જેથી તેઓ દિવસ દરમિયાન પાણીમાં રહી શરીરનું તાપમાન નિયંત્રિત કરી શકે. આ ઉપરાંત ઝાડોની છાંયડી, પાણીના છંટકાવ (સ્પ્રિંકલર) અને શેડ નેટ જેવી વ્યવસ્થાઓ પણ અમલમાં છે. રાત્રિના સમયે પણ પ્રાણીઓને આરામદાયક વાતાવરણ મળે તે માટે નાઈટ શેલ્ટરમાં પંખા અને જરૂરિયાત મુજબ એર કૂલર મુકવામાં આવ્યા છે. તંત્ર દ્વારા પ્રાણીઓના વર્તન ઉપર સતત નજર રાખવામાં આવી રહી છે અને કોઈ પણ અસામાન્યતા જણાય તો તાત્કાલિક પશુચિકિત્સક ટીમ દ્વારા સારવાર આપવામાં આવે છે. ઝૂ તંત્રના અધિકારીઓના જણાવ્યા અનુસાર, દર ઉનાળામાં ખાસ તૈયારી કરવામાં આવે છે, પરંતુ આ વર્ષે વધતા તાપમાનને ધ્યાનમાં રાખીને વધારાની કાળજી લેવામાં આવી છે. પાણીની પૂરતી ઉપલબ્ધતા, સ્વચ્છતા અને ઠંડક જાળવવા માટે સ્ટાફને પણ વિશેષ માર્ગદર્શન આપવામાં આવ્યું છે. આ રીતે, રાજકોટ ઝૂમાં ઉનાળાની કડક પરિસ્થિતિ વચ્ચે પ્રાણીઓની સલામતી અને આરામ માટે સર્વાંગી આયોજન કરવામાં આવ્યું છે, જે પ્રાણીસંરક્ષણ માટે એક મહત્વપૂર્ણ પગલું માનવામાં આવે છે.
