બાયબાય ગ્લાસગો-હેલ્લો અમદાવાદ : ભારતને સોંપાયા મશાલ અને ફલેગ

ગ્લાસગોમાં કોમનવેલ્થ ગેમ્સ 2026નો ભવ્ય સમાપન : 2030માં અમદાવાદ બનશે યજમાન

નીરજ ચોપરા, પી.ટી. ઉષા અને ડેપ્યુટી સીએમ હર્ષ સંઘવીએ સ્વીકારી સીડબલ્યુજી મશાલ

શિવ તાંડવ, વંદે માતરમના નાદ ગુંજયા : `જુગલબંધી’થી સ્કોટલેન્ડમાં ભારતીય સંસ્કૃતિનો જાદુ છવાયો

13 ગોલ્ડ, 17 સિલ્વર અને 9 બ્રોન્ઝ ભારતના નામે હવે એશિયન ગેમ્સ પર નજર

1930માં કેનેડાના હેમિલ્ટનથી શરૂ થયેલી કોમનવેલ્થ ગેમ્સ 2030માં 100 વર્ષ પૂર્ણ કરવા જઈ રહી છે

સ્કોટલેન્ડના ગ્લાસગો શહેરમાં 11 દિવસ સુધી ચાલેલા કોમનવેલ્થ ગેમ્સ 2026નો ‘ઓવો હાઇડ્રો એરિના’ ખાતે ભવ્ય અને રંગારંગ ક્લોઝિંગ સેરેમની સાથે સમાપન થયું છે. ઓસ્ટ્રેલિયન સિંગર ડેલ્ટા ગુડરેમ અને કેમી બાર્ન્સના શાનદાર પર્ફોર્મન્સ સાથે શરૂ થયેલાં આ સમારોહમાં 74 દેશોનાં એથ્લેટ્સ પોતપોતાનાં રાષ્ટ્રીય ધ્વજ સાથે સ્ટેજ પર આવ્યાં હતાં. જેમાં ભારતની ફ્લેગબેરર બોક્સર જૈસ્મીન લામ્બોરિયા રહી હતી. આ ઐતિહાસિક ક્ષણે ગ્લાસગો દ્વારા સત્તાવાર રીતે કોમનવેલ્થ ગેમ્સનો ફ્લેગ અને બેટન (મશાલ) ભારતને સોંપવામાં આવ્યાં હતાં. આ સાથે જ 2030માં યોજાનારી કોમનવેલ્થ ગેમ્સની 100મી શતાબ્દી આવૃત્તિની યજમાની માટે અમદાવાદનો સત્તાવાર માર્ગ મોકળો થઈ ગયો છે. આ સત્તાવાર હેન્ડઓવર સેરેમની દરમિયાન ભારતના સ્ટાર ભાલાફેંક ખેલાડી નીરજ ચોપરા, ઇન્ડિયન ઓલિમ્પિક એસોસિએશન (IOA)ના પ્રમુખ પી.ટી. ઉષા અને ગુજરાતનાં નાયબ મુખ્યમંત્રી હર્ષ સંઘવીએ સ્ટેજ પર ઉપસ્થિત રહીને કોમનવેલ્થ ગેમ્સનો ફ્લેગ અને મશાલ સ્વીકાર્યા હતા.

ગ્લાસગોના લોર્ડ પ્રોવોસ્ટ જેક્લિન મેકલરેન અને કોમનવેલ્થ સ્કોટલેન્ડના પ્રતિનિધિઓએ ફ્લેગ ઉતારીને તેને વિધિવત રીતે કોમનવેલ્થ સ્પોર્ટ્સના પ્રમુખ ડો. ડોનાલ્ડ કાને આપ્યો હતો. ત્યારબાદ ડો. ડોનાલ્ડ કા દ્વારા આ સીડબ્લ્યુજી ફ્લેગ અને મશાલ ભારતની પ્રતિનિધિ ટીમને સુપ્રત કરવામાં આવ્યાં હતાં, જે સ્કોટલેન્ડથી ભારત તરફ યજમાનીની સત્તાવાર બદલી દર્શાવે છે. વર્ષ 2030માં યોજાનારી આ રમતોત્સવની આવૃત્તિ અત્યંત ખાસ રહેશે, કારણ કે 1930માં કેનેડાના હેમિલ્ટનથી શરૂ થયેલી કોમનવેલ્થ ગેમ્સ 2030માં પોતાનાં 100 વર્ષ પૂર્ણ કરવા જઈ રહી છે. અત્યાર સુધી ઓસ્ટ્રેલિયાએ સૌથી વધુ 5 વખત તથા કેનેડા અને સ્કોટલેન્ડ 4-4 વખત આ ગેમ્સનું આયોજન કરી ચૂક્યા છે. ઓસ્ટ્રેલિયા પછી ભારત એશિયા અને કોમનવેલ્થ રાષ્ટ્રોમાં એક કરતા વધુ વખત આ ગેમ્સનું આયોજન કરનારો બીજો દેશ બનશે. આ પહેલા ભારતે વર્ષ 2010માં નવી દિલ્હી ખાતે કોમનવેલ્થ ગેમ્સનું સફળ આયોજન કર્યું હતું, તે સિવાય 1951 અને 1982માં એશિયન ગેમ્સનું આયોજન પણ ભારતમાં થઈ ચૂક્યું છે.

સમાપન સમારોહમાં ભારતીય સંસ્કૃતિ, પરંપરા અને આધુનિક કળાનો અદ્ભુત ત્રિવેણી સંગમ જોવા મળ્યો હતો. ‘વંદે માતરમ’ના 150 વર્ષ પૂરા થવાના અવસરે પૂર્વ મિસ વર્લ્ડ અને અભિનેત્રી માનુષી છિલ્લરે સેંકડો કલાકારો અને દમદાર વિઝ્યુઅલ્સ સાથે ડાન્સ પરફોર્મન્સ આપ્યું હતું. આ ઉપરાંત ગુજરાતી ગાયિકા ભૂમિ ત્રિવેદીએ પોતાનાં પરફોર્મન્સથી કાર્યક્રમમાં ગરવી ગુજરાતની વિશેષ છાપ છોડી હતી. સમારોહમાં દર્શાવવામાં આવેલી એક અદભુત શોર્ટ ફિલ્મ દ્વારા અમદાવાદ અને ગુજરાતની સમૃદ્ધ સાંસ્કૃતિક વિરાસત તથા રમતોત્સવ માટેની આધુનિક સજ્જતાને વૈશ્વિક મંચ પર રજૂ કરવામાં આવી હતી. ક્લોઝિંગ સેરેમનીમાં ભારત અને સ્કોટલેન્ડ વચ્ચેની ‘સાંસ્કૃતિક જુગલબંધી’ આકર્ષણનું મુખ્ય કેન્દ્ર બની હતી. પ્રખ્યાત સિતાર વાદક ઋષભ શર્માએ સ્કોટિશ બેગપાઇપર રોસ એન્સલી સાથે મળીને મંચ પર ‘શિવ તાંડવ સ્તોત્ર’ની અદભુત પ્રસ્તુતિ આપી હતી. સ્કોટિશ બેન્ડ એલિફન્ટ સેશન્સ અને અમેરિકન રેપર ડેવ ઇસ્ટના પર્ફોર્મન્સ બાદ બોલિવૂડનાં સંગીતકાર શંકર મહાદેવને તેમનાં પુત્રો સિદ્ધાર્થ અને શિવમ મહાદેવન સાથે ‘પરચમ લહરા દો’, ‘એ વતન’ અને ‘ભાગ મિલ્ખા ભાગ’ જેવા દેશભક્તિના ગીતોથી આખા સ્ટેડિયમને મંત્રમુગ્ધ કરી દીધું હતું.

આ વર્ષની ક્લોઝિંગ સેરેમનીની મુખ્ય થીમ ‘કનેક્શન’ અને ‘વસુધૈવ કુટુંબકમ’ (સમગ્ર વિશ્વ એક પરિવાર છે) રાખવામાં આવી હતી. સમારોહ દરમિયાન જેકી કેયની એક કવિતા પણ પઠન કરવામાં આવી હતી અને અસાધારણ ખેલદિલી દાખવવા બદલ પેરા-એથ્લીટ મેલાની વુડ્સને પ્રતિષ્ઠિત ‘ડેવિડ ડિક્સન એવોર્ડ’થી નવાજવામાં આવ્યા હતા. બ્રિટિશ રાજપરિવારના પ્રતિનિધિ અને પ્રિન્સ એડવર્ડ (ડ્યુક ઓફ એડિનબર્ગ) દ્વારા રમતોત્સવનું સત્તાવાર સમાપન જાહેર કરવામાં આવ્યું હતું અને તેમણે તમામ ખેલાડીઓની રમતદિલીના વખાણ કરતાં ચાર વર્ષ પછી અમદાવાદ ખાતે એકત્ર થવા માટે ભાવભીનું આહ્વાન કર્યું હતું.

ઇતિહાસમાં પ્રથમવાર તમામ 74 દેશોને પોતાનાં કસ્ટમાઇઝ્ડ બેટન અપાયા
આ વખતે કોમનવેલ્થ ઇતિહાસમાં પ્રથમવાર તમામ 74 દેશોને પોતાનાં કસ્ટમાઇઝ્ડ બેટન આપવામાં આવ્યાં હતાં. ગ્લાસગો ખાતે બેટન અને ફ્લેગના સત્તાવાર હસ્તાંતરણ સાથે જ હવે વિશ્વનું ધ્યાન અમદાવાદ પર કેન્દ્રિત થયું છે.

કોમનવેલ્થ ગેમ્સમાં ભારતનો શ્રેષ્ઠ દેખાવ : 39 મેડલ સાથે ચોથું સ્થાન
રમતગમતનાં પ્રદર્શનની વાત કરીએ તો ગ્લાસગો 2026માં ભારતે ખૂબ જ શાનદાર પ્રદર્શન કર્યું છે. ભારતીય દળે 13 ગોલ્ડ, 17 સિલ્વર અને 9 બ્રોન્ઝ સાથે કુલ 39 મેડલ જીતીને મેડલ ટેલીમાં ચોથું સ્થાન પ્રાપ્ત કર્યું છે. આ ગેમ્સમાં બોક્સિંગ અને એથ્લેટિક્સે ભારતની મેડલ રેસની આગેવાની કરી હતી, જેમાં લાંબા અંતરના દોડવીર ગુલવીર સિંહ બે મેડલ જીતનારા એકમાત્ર ભારતીય બન્યા હતા. 2022ના બર્મિંગહામ ગેમ્સની સરખામણીએ મુખ્ય રમતો રદ થઈ હોવા છતાં અને માત્ર 122 ખેલાડીઓની નાની ટુકડી હોવા છતાં ભારતે ખૂબ જ ઉત્કૃષ્ટ સચોટતા સાથે મેડલ મેળવ્યા હતા. બીજી તરફ, ગ્લાસગોમાં 39 ખેલાડીઓને મેડલ વિજેતા બનાવી સફળ અભિયાન પૂરું કર્યા બાદ હવે ભારતીય એથ્લેટ્સનું આગામી લક્ષ્ય આવતાં મહિને સપ્ટેમ્બરમાં જાપાન ખાતે યોજાનારી એશિયન ગેમ્સ રહેશે.