રાસોત્સવમાં રંગબેરંગી ટ્રેડીશનલ ડ્રેસમાં સજ્જ ખેલૈયાઓ: છઠ્ઠા નોરતે દર્શકોની જામતી ભીડ
ગરબા કિંગ મૃદુલ ઘોષ, અનિતા શર્મા, જયેશ દવેના તાલે ખેલૈયાઓ ઝૂમ્યા
ખાસ-ખબર સંવાદદાતા
છઠ્ઠા નોરતે અબતક સુરભિ રાસોત્સવમાં યુવાધનમાં અનેરો ઉત્સાહ જોવા મળી રહ્યો છે. તાલના થનગનાટ સાથે યુવાઓએ ગરબાની રમઝટ માણી હતી. ત્યારે માતાજીના છઠ્ઠા નોરતે અબતક સુરભી રાસોત્સવમાં ખેલૈયાઓ અને કલાકારો મન મૂકીને ઝૂમ્યા હતા. રોજ માતાજીના ગીત પર વિવિધ સ્ટેપ રમી આનંદીત થઈ રહ્યા છે. રાજ્યસભાના સાંસદ રામભાઇ મોકરીયા, અકિલાના મોભી કિરીટભાઈ ગણાત્રા જેતપુર નગરપાલિકાના પૂર્વ પ્રમુખ સુરેશભાઇ સખરેલીયા અને જેતપુર ડાઇંગ એસો.ના ઉપપ્રમુખ સંજય વેકરીયા ઉપસ્થિત રહ્યા હતા.
આજે અબતક સુરભિમાં ઝી ટીવી ચેનલ પર પ્રસારીત થતી રાધા મોહન સિરીયલના શબ્બીર આહુવાલિયાના પિતા વિશ્વનાથનું પાત્ર ભજવતા રાજુ લોઢીયા ઉપસ્થિત રહેશે. ત્યારે ગઈકાલે છઠ્ઠા દિવસે પણ અબતક સુરભિ નવરાત્રી ઉત્સવમાં માનવ મહેરામણ ઉમટી પડયું હતું. નિર્ધારિત સમયે શરૂ થયેલા રાસોત્સવના પ્રારંભે ધર્મ સંસ્કૃતિની ઉપાસના અને આરતીથી શરૂ થયેલા રાસમાં હજારો ખેલૈયાઓ ગાયક કલાકારોના સૂર અને તાલના પાને કલાકો સુધી અવિરત રાસ રમતા રહ્યા હતા. અબતક સુરભીમાં ડે વન થી દરરોજ શ્રોતાઓ અને ખેલૈયાઓની સંખ્યામાં વધારાની પરંપરા અકબંધ રહી હતી. હૈયે હૈયું દળાય તેવી મેદની અને નાના બાળકથી લઈ યુવાનો અને મોટેરા ખેલૈયાઓએ વિવિધ વેશભૂષા અને પરંપરાગત શણગાર સાથે સુરભી રાસોત્સવની રોનક વધારી હતી. શરૂઆતથી કાર્યક્રમ પૂરો થયો ત્યાં સુધી નિરંતર આનંદ ઉત્સાહ સતત વધતો રહ્યો હતો. ખેલૈયાઓ કલાકારો અને આમંત્રિત મહેમાનો સાથે પ્રબુદ શ્રોતાઓ દ્વારા અબતક સુરભી પરિવારના રાસોસ્ત્સવની વ્યવસ્થા અને પારિવારિક માહોલની સરાહના કરી હતી.
રાજકોટના હ્રદય સમા રેસકોર્ષ ગ્રાઉન્ડ ખાતે સૌરાષ્ટ્રના નંબર-1 એવા અબતક-સુરભી રાસોત્સવનું ધમાકેદાર આયોજન કરવામાં આવ્યું છે. ટ્રેડિશનલ, વિવિધતાથી ભરપૂર, નવતર ડિઝાઇનયુક્ત પોષાક, ભાતીગળ ભરતકામયુક્ત છત્રી સાથે આભલા ભરેલી ચણિયાચોળી ને કેડિયામાં સજ્જ ખેલૈયા જાતભાતના સ્ટેપ્સ સાથે ખેલૈયાઓએ જમાવટ કરી હતી. સૌ કોઇ ટ્રેડીશનલ ચણીયા-ચોલી, કેળીયુ, કુર્તા-ઝભ્ભા પહેરીને ગ્રાઉન્ડ પર કલાકારોના સથવારે ઝુમી ઉઠ્યાં હતા.
અબતક-સુરભિમાં છલડો- ડાકલા- ભકિત- વંદે માતરમની છલકાતી જમાવટ જોવા મળી હતી. ખેલૈયાઓને પ્રાચીન અર્વાચીન ગરબા ગીત અને માતાજીના ડાક ડમરુંની ધૂન પર મન મૂકીને ખેલાવ્યા હતા. વિશાળ ગ્રાઉન્ડમાં કોઈ પણ અગવડ વગર યુવા યુવતીઓએ ઉત્કૃષ્ટ વ્યવસ્થાનો અહેસાસ કરીને મોકળા મને રસોસ્ત્સવ માણ્યો હતો. સાઉન્ડ સિસ્ટમના સથવારે ખેલૈયાઓ દિલ ખોલીને નવા નવા સ્ટેપ્સ પર ફ્રી સ્ટાઇલ ગરબા રમ્યા હતા. સુરીલા ગાયક કલાકારો ગરબા કિંગ મૃદુલ ઘોષ, અનિતા શર્મા, જયેશ દવે, જયમંત દવેના તાલે ખેલૈયાઓએ રમઝટ બોલાવી હતી. સૌરાષ્ટ્ર સાઉન્ડ બાય અર્જુન મેર તથા રિધમ ગૃપના ઈમરાન કાનીયા સુરમાં સુર પુરાવી નવા મધુબંસી અને છલડાના રાઉન્ડમાં ખેલૈયાઓને નવું જોમ ચડ્યું હતું.
રાજકોટમાં સૌપ્રથમવાર એમ.આઇ.બાર એન્ટ્રી ગેટનાં આકર્ષક કોન્સેપ્ટ સાથે અબતક-સુરભિ રાસોત્સવનો ભવ્ય પ્રારંભ થયો હતો. છેલ્લા ઘણા વર્ષોથી રાજકોટમાં ખેલૈયાઓનાં ફેવરીટ ડેસ્ટીનેશન તરીકે અબતક-સુરભિ રાસોત્સવની બોલબાલા વધતી રહી છે. મોકળાશથી ગરબે ઘૂમી શકાય તેવું વિશાળ અને સમથળ, ગ્રીન નેટવાળુ ગ્રાઉન્ડ, હાઇ ફાઇ સાઉન્ડસિસ્ટમ, રોશની ડેકોરેશન અને ખાસ તો જીલ એન્ટરટેઇન્મેન્ટ રાજકોટની બેસ્ટ ટીમનાં સથવારે અબતક સુરભિ રાસોત્સવનું આ વર્ષનાં જાજરમાન આયોજન માટે સિઝન પાસનું વેંચાણ શરૂ થઇ ચૂકયું છે. આયોજક સતીષભાઈ મહેતા, વિજયભાઈ વાળા, વિશુભાઈ વાળા, પંકજભાઇ સખીયા, ગૌરાંગભાઈ બુચ, નિલેશભાઇ પાઉં, હિરેનભાઈ અકબરી, જયેશભાઇ રાવરાણી, હિરેનભાઇ સોની, અશ્ર્વિન ભુવા, જીગર ભટ્ટ સહિતની ટીમ આ રાસોત્સવને સફળ બનાવવા માટે જહેમત ઉઠાવી રહ્યા છે. પ્રથમ નોરતે વિજેતા બનેલા પ્રિન્સ અને પ્રિન્સેસને લાખેણા ઇનામો આપી નવાજવામાં આવ્યા હતા. સૌરાષ્ટ્ર સાઉન્ડનાં સથવારે ઓરકેસ્ટ્રા જિલ એન્ટરટેઇન્મેન્ટનાં ધમાકેદાર પરફોર્મન્સને માણવા રાજકોટિયન્સમાં અબતક- સૂરભિ રાસોત્સવ-2023માં ગજબનો ઉત્સાહ વર્તાયો હતો.
