સ્થાનિક ચૂંટણીમાં મતદારોનો બદલાતો મૂડ: શિક્ષણ અને ટેકનોલોજી હવે મુખ્ય માપદંડ

ચૂંટણી એક્સ-રે: 78% મતદારોને માત્ર નેતા નહીં, ‘ગ્રેજ્યુએટ એક્સપર્ટ’ જોઈએ!

યુવા પેઢી ભાવનાત્મક મુદ્દાઓથી દૂર જઈ કાબેલિયત આધારિત નેતૃત્વ તરફ વળે છે 

યુવાનોની એક જ માંગ સ્માર્ટ ગવર્નન્સ સમજતા નેતાઓ જોઈએ

ખાસ-ખબર ન્યૂઝ રાજકોટ

ગુજરાતમાં સ્થાનિક સ્વરાજ્યની ચૂંટણીનો માહોલ તેજ બનતો જાય છે ત્યારે મતદારોના મનમાં પરિવર્તનની એક સ્પષ્ટ અને મહત્વપૂર્ણ લહેર જોવા મળી રહી છે. અત્યાર સુધી જ્ઞાતિવાદ અને પક્ષીય વફાદારી આધારિત રાજકારણ હાવી રહ્યું હતું, પરંતુ હાલના એક મનોવૈજ્ઞાનિક સર્વે મુજબ ખાસ કરીને યુવા મતદારો હવે ઉમેદવારની પસંદગીમાં ભાવનાત્મક મુદ્દાઓ કરતાં તેની શૈક્ષણિક લાયકાત અને ટેકનોલોજીકલ સમજણને વધુ પ્રાધાન્ય આપી રહ્યા છે. આ પરિવર્તનને ધ્યાનમાં રાખીને રાજકીય પક્ષોએ પણ પોતાના ઉમેદવારો પસંદ કરતી વખતે સોશિયલ મીડિયામાં પ્રભાવશાળી હાજરી ધરાવતા દાવેદારોને વધુ મહત્વ આપ્યું છે. તેમ છતાં, મતદારોની અપેક્ષાઓ અને રાજકીય પક્ષોની વ્યૂહરચનામાં હજુ તફાવત જોવા મળે છે.
સર્વે મુજબ રાજ્યના 78 ટકા મતદારો મક્કમપણે માને છે કે સરકારી તંત્ર ચલાવતા અધિકારીઓ માટે જેમ શૈક્ષણિક લાયકાત જરૂરી છે, તેમ રાજકીય નેતાઓ માટે પણ ઓછામાં ઓછું ગ્રેજ્યુએટ સ્તરનું શિક્ષણ અનિવાર્ય હોવું જોઈએ. જનતા હવે એવા નેતાઓ ઈચ્છે છે જે વહીવટી પ્રક્રિયા, કાનૂની બાબતો અને ડિજિટલ સિસ્ટમને સ્વયં સમજી શકે. જોકે, હજુ પણ અનેક રાજકીય પક્ષો જીતવાની સંભાવના આધારે જ્ઞાતિના ગણિતને ધ્યાનમાં રાખીને ટિકિટ ફાળવે છે, જે પ્રત્યે 56 ટકા મતદારો અસંતુષ્ટ હોવાનું જણાયું છે. લોકોમાં હવે પ્રોફેશનલ્સ અને બુદ્ધિજીવીઓ રાજકારણમાં આગળ આવે તેવી માંગ ઉઠી રહી છે. બીજી તરફ, પીઢ મતદારો માને છે કે ડિગ્રી કરતાં જનસેવાની ભાવના વધુ મહત્વપૂર્ણ છે, પરંતુ આજના ટેકનોલોજીના યુગમાં શિક્ષણ પણ અનિવાર્ય બની ગયું છે. શહેરી વિસ્તારોમાં મતદારોના અનુભવ મુજબ 45 ટકા લોકો માને છે કે સ્થાનિક સમસ્યાઓના કાયમી ઉકેલ લાવવા બદલે નેતાઓ તાત્કાલિક પેચવર્કથી કામ ચલાવે છે.

ખાસ કરીને 64 ટકા લોકો માટે ટ્રાફિક, પાર્કિંગ, સ્ટ્રીટલાઈટ, રખડતા પશુઓ અને શ્વાનો જેવા પ્રશ્નો સૌથી મોટા પડકારરૂપ બન્યા છે. આ વચ્ચે યુવા મતદારોની અપેક્ષાઓ વધુ ઊંચી થઈ છે. 72 ટકા લોકો ઈચ્છે છે કે સ્થાનિક પાલિકા સ્તરે જ સ્ટાર્ટ-અપ ઇન્ક્યુબેશન સેન્ટર્સ સ્થાપિત થાય, જેથી રોજગારી અને નવીનતા પ્રોત્સાહિત થઈ શકે. પરંતુ ટેકનોલોજીના ક્ષેત્રમાં નેતાઓ અને જનતા વચ્ચે મોટો ગેપ જોવા મળે છે. 75 ટકા યુવાનો માને છે કે તેમના નેતાઓ આર્ટિફિશિયલ ઇન્ટેલિજન્સ અને સ્માર્ટ ગવર્નન્સ જેવી આધુનિક બાબતોને પૂરતી સમજતા નથી. આ રીતે, ગુજરાતની સ્થાનિક ચૂંટણીમાં મતદારોનો બદલાતો દૃષ્ટિકોણ રાજકારણ માટે એક મહત્વપૂર્ણ સંકેત છે, જ્યાં હવે માત્ર પરંપરાગત સમીકરણો નહીં, પરંતુ કાબેલિયત, શિક્ષણ અને ટેકનોલોજી પણ નિર્ણાયક ભૂમિકા ભજવશે.