પ્રથમ T20માં ભારતનો વેસ્ટ ઈન્ડિઝ સામે 8 વિકેટે વિજયઃ શ્રેયસ ઐયરની તોફાની સદી

કેપ્ટન ઐયરના અણનમ 102 અને ઈશાન કિશનના 37 રન : 14.4 ઓવરમાં લક્ષ્યાંક પાર પાડ્યો

વેસ્ટ ઈન્ડિઝ 171 રનમાં ઓલઆઉટ; નમન ધીરે 31 રન આપી ઝડપી 3 મહત્વપૂર્ણ વિકેટો

શ્રેણીની બીજી T20 શુક્રવારે રાંચી ખાતે રમાશે; ભારતે શ્રેણીમાં 1-0ની સરસાઈ મેળવી

ભારત અને વેસ્ટ ઈન્ડિઝ વચ્ચે રમાયેલી પાંચ મેચોની T20 શ્રેણીના પ્રથમ મુકાબલામાં ભારતીય ટીમે સર્વાંગી શ્રેષ્ઠ પ્રદર્શન કરીને ૮ વિકેટે ધમાકેદાર વિજય મેળવ્યો છે. વેસ્ટ ઈન્ડિઝ દ્વારા જીત માટે આપવામાં આવેલા ૧૭૨ રનના લક્ષ્યાંકનો પીછો કરતાં ભારતીય ટીમે શરૂઆતથી જ આક્રમક બેટિંગ કરી હતી અને માત્ર ૧૪.૪ ઓવરમાં બે વિકેટ ગુમાવીને ૧૭૨ રન બનાવી લીધા હતા. આ જીત સાથે ભારતે શ્રેણીમાં ૧-૦ની સરસાઈ હાંસલ કરી લીધી છે.
ટોસ હારીને પ્રથમ બેટિંગ કરવા ઉતરેલી વેસ્ટ ઈન્ડિઝની ટીમ ભારતીય બોલરોના સચોટ આક્રમણ સામે ૧૯.૧ ઓવરમાં ૧૭૧ રન બનાવીને ઓલઆઉટ થઈ ગઈ હતી. વેસ્ટ ઈન્ડિઝ તરફથી શેરફેન રધરફોર્ડે ૩૪ બોલમાં ૬ ચોગ્ગા અને ૩ છગ્ગા સાથે સર્વાધિક ૫૬ રન બનાવ્યા હતા, જ્યારે કેપ્ટન શાઈ હોપે ૩૭ બોલમાં ૬ ચોગ્ગા અને ૨ છગ્ગાની મદદથી ૫૨ રનની અડધી સદી ફટકારી હતી. કામિલ પૂરને ૧૨ રન તેમજ અકીલ હુસૈને ૧૫ રનનું યોગદાન આપ્યું હતું. બાકીના બેટ્સમેનો સસ્તામાં પેવેલિયન ભેગા થયા હતા.ભારતીય બોલિંગ આક્રમણે શાનદાર પ્રદર્શન કરી તમામ પાંચ બોલરોએ વિકેટો ઝડપી હતી. નમન ધીરે સૌથી ઘાતક બોલિંગનું પ્રદર્શન કરતાં ૪ ઓવરમાં ૩૧ રન આપીને ૩ મહત્વપૂર્ણ વિકેટો ઝડપી હતી. અક્ષર પટેલે ૩.૧ ઓવરમાં ૧ મેડન સાથે ૨૬ રન આપી ૨ વિકેટ અને ચાઇનામેન સ્પિનર કુલદીપ યાદવે ૪ ઓવરમાં ૩૩ રન આપી ૨ વિકેટ મેળવી હતી. આ ઉપરાંત ઝડપી બોલર અર્શદીપ સિંહ અને મયંક યાદવે ૧-૧ વિકેટ પોતાના નામે કરી હતી.૧૭૨ રનના ટાર્ગેટ સામે ભારતીય કેપ્ટન શ્રેયસ ઐયરે તોફાની કેપ્ટન ઇનિંગ રમી હતી. ઐયરે માત્ર ૪૩ બોલમાં ૧૦ ચોગ્ગા અને ૬ આકાશી છગ્ગા સાથે અણનમ ૧૦૨ રનની વિસ્ફોટક સદી ફટકારી હતી. તેને સાથ આપતાં ઈશાન કિશને ૨૭ બોલમાં ૫ ચોગ્ગા સાથે અણનમ ૩૭ રન બનાવ્યા હતા. ઓપનર અભિષેક શર્માએ ૨૧ રન અને સંજુ સેમસને ૧૧ રનનું ઝડપી યોગદાન આપ્યું હતું. વેસ્ટ ઈન્ડિઝ તરફથી અકીલ હુસૈન અને રોસ્ટન ચેઝને ૧-૧ વિકેટ મળી હતી. હવે શ્રેણીનો બીજો મુકાબલો શુક્રવાર, ૯ ઑક્ટોબરે રાંચી ખાતે સાંજે ૭:૦૦ વાગ્યે રમાશે.