રાજકોટના આજીડેમ પાસે જ પાઇપલાઇનમાં કાણા પડતા હજારો લિટર પાણીનો વેડફાટ

કોંગ્રેસ દ્વારા સ્થળ પહોંચી મનપાના અધિકારીઓને જાણ કરી

ખાસ-ખબર સંવાદદાતા
એક તરફ રાજકોટના આજી ડેમમાં માર્ચ મહિના સુધી ચાલે તેટલું પાણી રહ્યું છે. ત્યારે બીજી તરફ આજીડેમ પાસે જ શહેરીજનોને પાણી પહોંચાડતી મુખ્ય પાઇપલાઇનમાં કાણા પડી ગયાનું સામે આવ્યું છે.

જેમાંથી રોજ હજારો લિટર પાણીનો વેડફાટ થઇ રહ્યો છે. જોકે પાણીને લઇને મનપાએ અગાઉ પાઇપલાઇનનું નિયમિત ચેકિંગ થતું હોવાની વાતો કરી હતી. પરંતુ આજે આ દૃશ્યો જોઇને મનપાની વાતો પોકળ સાબિત થઈ છે.

આ અંગે ડેપ્યુટી મેયર ડો.દર્શિતા શાહે જણાવ્યું હતું કે, અધિકારીઓને તપાસ કરવા માટે આદેશ કરાયો છે. પાઈપલાઈન સડી ગયેલી હોવાથી ઉપયોગ કરાતો નથી.

નવા પાણીની લાઈનનો વાલ્વ ખરાબ થતા પાણી લાઈનમાં આવ્યું છે. વાલ્વ રિપેરિંગની કામગીરી શરૂ કરાઇ છે. આજીડેમમાં હાલ પાણીનો મર્યાદિત જથ્થો છે. આ અંગે સામાજિક કાર્યકર અને કોંગ્રેસના અગ્રણી રણજીત મુંધવા સ્થળ પહોંચી મનપાના અધિકારીઓને જાણ કરી હતી.