રાજકોટમાં પેન્ડિંગ ઈ-ચલણ અને ટ્રાફિક નિયમોના ભંગ સામે RTOની કડક કાર્યવાહી
રાજકોટ શહેરમાં ટ્રાફિકના નિયમોનું ચુસ્ત પાલન થાય અને વાહનચાલકો પોતાના પેન્ડિંગ ઈ-ચલણની સમયસર ભરપાઈ કરે તે હેતુથી રાજકોટ પ્રાદેશિક વાહન વ્યવહાર કચેરી (RTO) દ્વારા કડક કાર્યવાહી હાથ ધરવામાં આવી છે. ટ્રાફિક શાખા દ્વારા કરવામાં આવેલી ડેટા ચકાસણી દરમિયાન આશરે ૨૫૦ જેટલા વાહનચાલકો પાસે વધુ પડતા ઈ-ચલણ પેન્ડિંગ હોવાનું સામે આવ્યું હતું. આ પૈકી પ્રાથમિક તબક્કે ભયજનક રીતે વાહન ચલાવનારા તેમજ મોટી સંખ્યામાં ઈ-ચલણ બાકી ધરાવતા ૪૮ વાહનચાલકોના ડ્રાઈવિંગ લાયસન્સ ૩મહિના માટે સસ્પેન્ડ કરવામાં આવ્યા છે.
પોલીસ કમિશનરશ્રી (ઝોન-૨, ટ્રાફિક શાખા) દ્વારા મોકલવામાં આવેલી યાદી તેમજ સિટી રોડ સેફ્ટી સમિતિની બેઠકની મિનિટ્સના સંદર્ભે RTO રાજકોટ દ્વારા આ કાર્યવાહી કરવામાં આવી હોવાનું જાણવા મળ્યું છે.
આગામી દિવસોમાં પણ પેન્ડિંગ ઈ-ચલણ ધરાવતા અને બેદરકારીપૂર્વક વાહન ચલાવતા અન્ય વાહનચાલકો સામે લાયસન્સ સસ્પેન્ડ અથવા રદ્દ કરવાની કાર્યવાહી કરવામાં આવશે. RTO દ્વારા નાગરિકોને અપીલ કરવામાં આવી છે કે, રસ્તા પર જવાબદારીપૂર્વક વાહન ચલાવે, ટ્રાફિકના નિયમોનું અનિવાર્યપણે પાલન કરે અને પોતાના પેન્ડિંગ ઈ-ચલણની રકમ સમયસર ભરપાઈ કરે.
- Advertisement -
