રાણપુર ગામે ત્રણેયની અર્થી એક સાથે ઉઠતા પરિવાર – સમસ્ત ગામ હીબકે ચડ્યું : કુવાડવામાં અંતિમવિધિ
રિક્ષાચાલક મોભીના મોતથી ત્રણ દીકરીઓએ, યુવાન ભત્રીજાના મોતથી બે દીકરીએ પિતાનું છત્ર ગુમાવ્યું
- Advertisement -
કુવાડવા નજીકના રાણપુર ગામની શિવધારા રેસિડેન્સીનીમાં રહેતા કોળી પરિવારના પિતા-પુત્ર અને ભત્રીજાના કુવાડવા વાંકાનેર રોડ પર અજય વે બ્રીજ સામે તળાવમાં ગણપતિ વિસર્જન વખતે ડૂબી જતાં મૃત્યુ થતાં પરિવારમાં અને ગામમાં કલ્પાંત સર્જાયો છે એક સાથે ત્રણેયની અરથી ઉઠતાં ગામ હીબકે ચડયું હતું. સદ્દનસીબે અન્ય ત્રણને લોકોએ બચાવી લીધા હતાં. દસ દિવસ પૂજા-અર્ચના કર્યા બાદ સાંજે ગણપતિ દાદાને વિદાય આપવાની વેળા આવી હતી. ત્યારે આ કરૂણ દૂર્ઘટના બની હતી. જાણવા મળ્યા મુજબ રાણપુર ગામે શિવધારા સોસાયટીમાં રહેતાં રિક્ષાચાલક ધીરૂભાઇ ભલાભાઇ ચોૈહાણના ઘરે દસ દિવસના ગણપતીજી બેસાડાયા હતાં. ગત સાંજે આરતી બાદ રંગેચંગે ધીરૂભાઇ ચોૈહાણ સહિત પરિવારના 7થી 8 લોકો વિસર્જના માટે ગયા હતાં. જેમાં ધીરૂભાઇ સાથે તેમના પત્નિ મીનાબેન, પુત્ર નયન ધીરૂભાઇ ચોૈહાણ, પુત્રી આશા, ભત્રીજો નરેન્દ્ર મગનભાઇ ચોૈહાણ તેમજ બીજા સદસ્યો સામેલ હતાં. ગણપતિ બાપ્પા મોરિયાના ગગનભેદી જયઘોષ સાથે આ પરિવાર કુવાડવા-વાંકનેર રોડ પર આવેલા ખોડિયાર માતાજીના મંદિર નજીકના ચેકડેમ પર પહોંચ્યો હતો તળાવામાં ગણપતિદાદાની મુર્તિનું વિસર્જન કરતી વખતે ધીરૂભાઇ અને પુત્ર નયનભાઇ અચાનક ઉંડા પાણીમાં ડુબવા માંડતા તેમને બચાવવા માટે ભત્રીજા નયન ચોૈહાણ, ધીરૂભાઇના પત્નિ મીનાબેન, પુત્રી આશા, ભત્રીજી માહી એમ બધાએ પ્રયાસ કર્યો હતો. જો કે ધીરૂભાઇ સાથે તેમનો દિકરો નયન અને ભત્રીજો નરેન્દ્ર એમ બંને પણ ડુબી ગયા હતાં. જ્યારે ધીરૂભાઇના પત્નિ, દિકરી, ભત્રીજી બચી ગયા હતા. બનાવની જાણ ફાયર બ્રિગેડને થતાં ફાયર બ્રિગેડની ટીમના જવાનો શાહબુદ્દીન, કીરીટભાઈ ગાંગડીયા, મનોજ ડાભી, ચેતનભાઈ, પરેશ રાઠોડ, ધનરાજ મેતલિયા અને મહીપાલસિંહ રાણાએ પરિસ્થિતિની ગંભીરતા સમજીને તુરંત જ પાણીમાં સર્ચ ઓપરેશન શરૂ કર્યું હતું અને ત્રણેયના નિષ્પ્રાણ દેહને પાણીમાંથી બહાર કાઢયા હતાં. બનાવની જાણ થતાં એરપોર્ટ પોલીસ મથકના પીઆઇ કે. પી. તરેટીયા, પીએસઆઇ સરવૈયા, પીએસઆઇ જાડેજા સહિતનો સ્ટાફ દોડી ગયો હતો અને જરૂરી કાર્યવાહી કરી હતી. રાણપુર ગામના સરપંચ લાલાભાઈ, મૃતક ધીરૂભાઇના ભત્રીજા જેપુર શાળાના પ્રિન્સીપાલ દિલીપભાઇ ચોૈહાણ અને અન્ય કુટુંબીજનો પણ ઘટના સ્થળે પહોંચ્યા હતાં.
પોલીસે કાર્યવાહી કરી ત્રણેય મળતદેહોને પોસ્ટમોર્ટમ માટે નજીકના કુવાડવા પીએચસી સેન્ટર ખાતે ખસેડ્યા હતા. બાદમાં રાતે જ એક સાથે ત્રણેયની અંતિમવિધી કરવામાં આવી હતી. પિતા-પુત્ર-ભત્રીજાની એક સાથે અરથી ઉઠતાં ચોૈહાણ પરિવાર, ગામમાં ગમગીની વ્યાપી ગઇ હતી. મૃત્યુ પામનાર ધીરૂભાઇ છ ભાઇ અને છ બહેનમાં નાના હતાં અને રિક્ષા હંકારી ગુજરાન ચલાવતાં હતાં. તેમને સંતાનમાં એક દિકરો અને ત્રણ દિકરી છે. ઘરના બંને આધારસ્તંભ પિતા-પુત્રના એક સાથે મૃત્યુ થયા હતાં. પિતા સાથે મૃત્યુ પામનાર નયન રાજકોટ કારખાનામાં કામ કરતો હતો. જ્યારે કાકા-પિત્રાઇ સાથે મૃત્યુ પામનાર નરેન્દ્ર મગનભાઇ ચોૈહાણ બે ભાઇ અને એક બહેનમાં વચેટ હતો અને તે નયન સાથે જ રાજકોટના કારખાનામાં કામ કરતો હતો. તે માતા-પિતા-પરિવાર સાથે રહેતો હતો. તેના મૃત્યુથી બે દિકરી સંજના અને અંકિતાએ પિતાની છત્રછાંયા ગુમાવી દીધી છે.
નયન અને નરેન્દ્ર સાથે જ કામ કરતાં, સાથે જ અંતિમ વિદાય લીધી!
કરૂણ દુર્ઘટનામાં મોતને ભેટેલા બે પિત્રાઇ ભાઇઓ નયન ધીરૂભાઇ ચોૈહાણ ઉ.23 અને નરેન્દ્ર મગનભાઇ ચૌહાણ ઉ.30 વચ્ચે ભાઇ કરતાં વિશેષ ભાઇબંધ જેવા સંબંધ હતાં. બંને રાજકોટમા એક સાથે જ કારખાનામાં કામ કરતાં હતાં. કમનસિબે બંનેની અંતિમ વિદાય પણ તળાવમાં ડૂબી જવાથી એક સાથે થઇ હતી.
- Advertisement -
