જાફરાબાદઃ હેવાન શિક્ષકે 4 સગીરાને પીંખી, ધરપકડ

6 મહિનાથી સ્ટાફરૂમમાં અડપલાં કરી આચરતો દુષ્કર્મ

શિક્ષણ જગતને શર્મસાર કરતી ઘટના

અગાઉ પોલીસકર્મી રહી ચૂકેલા રામશંકર પંડ્યા સામે ફાંસીની સજાની માંગ

શિક્ષણના પવિત્ર ધામને કલંકિત કરતી અત્યંત ધૃણાસ્પદ અને કમકમાટીભરી ઘટના અમરેલી જિલ્લાના જાફરાબાદ પંથકમાં સામે આવી છે. સરકારી શાળામાં વિદ્યાનું દાન આપવાના નામે બેઠેલા એક નરાધમ અને વિકૃત શિક્ષકે પોતાની જ શાળાની ચાર નિર્દોષ સગીરાઓ પર બળાત્કાર ગુજારી ગુરુ-શિષ્યના પવિત્ર સંબંધોને લાંછન લગાડ્યું છે. આ હેવાનિયત સામે આવતાં જ સમગ્ર પંથકમાં પ્રચંડ જનઆક્રોશ ફાટી નીકળ્યો છે. પ્રાપ્ત વિગતો મુજબ, આરોપી શિક્ષક રામશંકર બટુકભાઈ પંડ્યા છેલ્લા છ મહિનાથી આ માસૂમ દીકરીઓને શાળાના સ્ટાફરૂમમાં એકલતાનો લાભ ઉઠાવીને બોલાવતો હતો. ત્યાં અડપલાં કરી તેમની મજબૂરી અને ભયનો ગેરલાભ ઉઠાવી સતત દુષ્કર્મ આચરતો હતો. દીકરીઓએ હિંમત દાખવી આપવીતી જણાવતાં સમગ્ર કાળો ચિટ્ઠો ખુલ્લો પડયો હતો. પોલીસે તાબડતોબ ગુનો નોંધી નરાધમ શિક્ષકને ઝડપી પાડી જેલના સળિયા પાછળ ધકેલી દીધો છે. ચોંકાવનારી બાબત એ છે કે, આરોપી રામશંકર પંડ્યા (રહે. વેળાવદર, તા. તળાજા, જિ. ભાવનગર) અગાઉ ગીર સોમનાથ જિલ્લામાં ખાખી વર્દી પહેરીને પોલીસ કર્મચારી તરીકે પણ ફરજ બજાવી ચૂક્યો છે. રક્ષકમાંથી શિક્ષક બનેલા આ વરુ જેવા શખ્સે શાળામાં જે હેવાનિયત આચરી છે તેનાથી સમાજ સ્તબ્ધ છે. નવરાત્રિમાં નારી પૂજાના દાવાઓ વચ્ચે શિક્ષણના મંદિરમાં દીકરીઓને પીંખનારા આ નરાધમને દાખલારૂપ અને કડકમાં કડક ફાંસી જેવી સજા ફટકારવામાં આવે તેવી ઉગ્ર લોકમાંગ ઊઠી છે.