મણિપુરમાં 11 આતંકીઓ ઠાર થયા બાદ તણાવ, જિરીબામ જિલ્લામાં કર્ફ્યુ

આ શંકાસ્પદ આતંકવાદીઓ ઠાર થયા બાદ કુકી-જો કાઉન્સિલે મંગળવારે સવારે 5 વાગ્યાથી સાંજના 6 વાગ્યા સુધી રાજ્યના પહાડી વિસ્તારોમાં સંપૂર્ણ બંધનું એલાન આપ્યું છે. મણિપુર પોલીસે એક પોસ્ટમાં જણાવ્યું કે ’11 નવેમ્બર 2024ના રોજ જિરીબામ જિલ્લામાં જકુરાડોર અને બોરોબેકરા પોલીસ સ્ટેશન પાસે આવેલ CRPF કેમ્પ પર બપોરે લગભગ 3 વાગે, સશસ્ત્ર ઉગ્રવદિઓએ હુમલો કર્યો. સુરક્ષા દળોએ જવાબી કાર્યવાહી કરી જેમાં 11 આતંકવાદીઓ માર્યા ગયા. આતંકવાદીઓ સાથેના આ અથડામણમાં CRPF કોન્સ્ટેબલ સંજીવ કુમારને ગોળી વાગી ગઈ. તેને આસામની સિલચર મેડિકલ કોલેજમાં લઈ જવામાં આવ્યો અને તેની સારવાર ચાલી રહી છે.’

CRPFએ 11 આતંકવાદીઓને ઠાર કર્યા

સીઆરપીએફ અને પોલીસે હુમલાનો જડબાતોડ જવાબ આપ્યો અને 40-45 મિનિટના ભારે ગોળીબાર બાદ પરિસ્થિતિને કાબૂમાં લેવામાં આવી. ગોળીબાર બંધ થયા પછી, વિસ્તારની શોધખોળ કરવામાં આવી અને હથિયારો અને દારૂગોળો (3 AK, 4 SLR, 2 INSAS, 01 RPG, પમ્પ એક્શન ગન, BP હેલ્મેટ અને મેગેઝિન) સાથે સશસ્ત્ર આતંકવાદીઓના 11 મૃતદેહ મળી આવ્યા. આ હુમલાના સંબંધમાં એફઆઈઆર નોંધવામાં આવી છે અને તપાસ ચાલી રહી છે. મણિપુર પોલીસે કહ્યું કે આતંકવાદીઓને ખતમ કરવા માટે ઓપરેશન ચાલી રહ્યું છે. આસામ રાઈફલ્સ, સીઆરપીએફ અને સિવિલ પોલીસની ટીમો ઘટનાસ્થળે મોકલવામાં આવી છે.

કુકી-જો કાઉન્સિલે એક નિવેદનમાં કહ્યું, ‘જિરીબામ ખાતેની દુ:ખદ ઘટનામાં, અમે અમારા કુકી-જો ગામના 11 સ્વયંસેવકોને CRPFના હાથે ગુમાવ્યા, જેમને નિર્દયતાથી ગોળી મારી દેવામાં આવી. કૂકી-જો કાઉન્સિલે પીડિતોના માનમાં અને અમારા સામૂહિક દુઃખ અને એકતા વ્યક્ત કરવા માટે 12 નવેમ્બરના રોજ સવારે 5:00 વાગ્યાથી સાંજના 6:00 વાગ્યા સુધી સંપૂર્ણ બંધ રાખવાની જાહેરાત કરી છે. અમારા મૂલ્યવાન ગામના સ્વયંસેવકોની હત્યા માત્ર તેમના પરિવારો માટે જ નહીં, પરંતુ સમગ્ર કુકી-જો સમુદાય માટે વિનાશક ફટકો છે. કુકી-જો શાંતિ, ન્યાય અને સુરક્ષા માટેના આ સંઘર્ષમાં એક થયા છે. અમે આજે થયેલી હિંસાની સખત નિંદા કરીએ છીએ અને ગુનેગારોને ન્યાય અપાવવા માટે તાત્કાલિક અને સંપૂર્ણ તપાસની માંગ કરીએ છીએ.’

જિરીબામમાં આગામી આદેશ સુધી કર્ફ્યુ

અધિકારીઓએ જણાવ્યું, ‘જે બોરાબેકરા પોલીસ સ્ટેશન પર આતંકવાદીઓ દ્વારા હુમલો કરવામાં આવ્યો, તેના પરિસરમાં એક રાહત શિબિર પણ છે અને ઘટના બાદ ત્યાં રહેતા પાંચ લોકો ગુમ છે. તે સ્પષ્ટ નથી કે આતંકવાદીઓએ આ નાગરિકોનું અપહરણ કરી લીધું કે પછી હુમલો શરૂ થયા પછી તેઓ છુપાઈ ગયા હતા. તેમની શોધખોળ કરવામાં આવી રહી છે. કેટલાક અસામાજિક તત્વોની ગેરકાયદેસર પ્રવૃતિઓને કારણે આ વિસ્તારમાં શાંતિ અને કાયદો અને વ્યવસ્થા ખોરવાઈ જવાની અને માનવ જીવન અને સંપત્તિઓને ગંભીર ખતરો છે. તેથી, આગામી આદેશો સુધી BNSS ની કલમ 163 હેઠળ સમગ્ર વિસ્તારમાં કર્ફ્યુ અમલમાં રહેશે.’

બોરોબેકરા સબ-ડિવિઝનમાં જૂન મહિનાથી હિંસાની ઘણી ઘટનાઓ જોવા મળી છે. આ જિલ્લાના સૌથી વધુ અસરગ્રસ્ત વિસ્તારોમાંનો એક છે. ગયા અઠવાડિયે, જારોન હમાર ગામ પર સશસ્ત્ર આતંકવાદીઓ દ્વારા કરવામાં આવેલા હુમલામાં 31 વર્ષીય મહિલાનું મોત થયું હતું. પોલીસના જણાવ્યા અનુસાર હુમલામાં ઓછામાં ઓછા છ ઘર બળીને રાખ થઈ ગયા. ઇમ્ફાલ ખીણમાં રહેતા મેઇતેઇ સમુદાય અને પહાડીઓમાં રહેતા કુકી-જો સમુદાય વચ્ચે ગયા વર્ષે 3 મેથી શરૂ થયેલી વંશીય હિંસામાં 200 થી વધુ લોકો માર્યા ગયા છે અને હજારો લોકો બેઘર થયા છે. જિરીબામ આ જાતિ હિંસાથી મોટાભાગે અસ્પૃશ્ય હતા. પરંતુ આ વર્ષે જૂનમાં ખેતરોમાં એક ખેડૂતની લાશ મળી આવ્યા બાદ અહીં પણ હિંસા જોવા મળી હતી. આગજનીની ઘટનાઓને કારણે હજારો લોકોએ પોતાના ઘર છોડીને રાહત શિબિરોમાં આશરો લેવો પડ્યો હતો. જુલાઇના મધ્યમાં પેટ્રોલિંગ દરમિયાન આતંકવાદીઓના હુમલામાં સીઆરપીએફનો એક જવાન પણ માર્યો ગયો હતો.

મણિપુરમાં હિંસા કેવી રીતે શરૂ થઈ?

મણિપુરમાં હિંસા ગયા વર્ષે 3 મેના રોજ શરૂ થઈ હતી, જ્યારે મણિપુર હાઈકોર્ટના આદેશ વિરુદ્ધ કુકી-જો આદિવાસી સમુદાય દ્વારા પ્રદર્શન દરમિયાન આગચંપી અને તોડફોડ કરવામાં આવી હતી. વાસ્તવમાં, મેઇતેઇ સમુદાયે મણિપુર હાઈકોર્ટમાં અરજી દાખલ કરીને માંગ કરી હતી કે તેમને જનજાતિનો દરજ્જો આપવામાં આવે. મેઇતેઇ સમુદાયે દલીલ કરી હતી કે 1949માં મણિપુરનું ભારતમાં વિલીનીકરણ થયું હતું. તે પહેલા તેમને આદિજાતિનો દરજ્જો હતો. અરજી પર સુનાવણી પૂર્ણ થયા બાદ, મણિપુર હાઈકોર્ટે રાજ્ય સરકારને ભલામણ કરી હતી કે મેઇતેઇ સમુદાયને અનુસૂચિત જનજાતિ (ST)માં સામેલ કરવા માટે વિચારણા કરવામાં આવે.

કુકી-જો સમુદાય મેઇતેઇને આદિવાસીનો દરજ્જો આપવા વિરુદ્ધ છે. તેમનું કહેવું છે કે રાજ્યની 60 વિધાનસભા બેઠકોમાંથી 40 બેઠકો પહેલેથી જ મેઇતેઇ પ્રભુત્વ ધરાવતી ઇમ્ફાલ ઘાટીમાં છે. આવી સ્થિતિમાં, જો મેઇતેઇને આદિજાતિનો દરજ્જો મળે છે, તો અનામતમાં કુકી-જો સમુદાયનો હિસ્સો ઘટશે. મેઇતેઇની મોટાભાગની વસ્તી ઇમ્ફાલ ઘાટી અને મણિપુરના મેદાનોમાં રહે છે, જ્યારે કુકી-જો સમુદાયના મોટા ભાગના લોકો પહાડી વિસ્તારોમાં રહે છે. મેઇતેઇ હિન્દુ છે, જ્યારે કુકી ખ્રિસ્તી ધર્મનું પાલન કરે છે. મણિપુરમાં આ બે સમુદાયો વચ્ચે દોઢ વર્ષથી હિંસા ચાલી રહી છે. આ દરમિયાન, 237 લોકોના મોત થયા છે અને 1500 થી વધુ લોકો ઘાયલ થયા છે.

60 હજાર લોકો તેમના ઘર છોડીને રાહત શિબિરોમાં રહેવા માટે મજબૂર છે. છેલ્લા દોઢ વર્ષમાં મણિપુરમાં લગભગ 11 હજાર એફઆઈઆર નોંધવામાં આવી છે અને 500ની ધરપકડ કરવામાં આવી છે. મણિપુર રાજ્ય પર્વતીય અને મેદાની ભાગોમાં વહેંચાયેલું છે. મેઇટીસ મેદાની જિલ્લાઓમાં રહે છે અને કુકી પહાડી જિલ્લાઓમાં રહે છે. બે સમુદાયો વચ્ચે એવી દુશ્મનાવટ ચાલી રહી છે કે જો મેદાની વિસ્તારમાંથી કોઈ મેઇતેઇ પહાડી વિસ્તારમાં આવે અને પહાડી વિસ્તારમાંથી કોઈ કુકી મેદાનમાં આવે તો તેના માટે જીવિત પાછા જવું શક્ય ન બને.