રાજકોટ એસ.ટી. વિભાગને વધુ 5 નવી વોલ્વો બસોની ભેટ

વડોદરા અને ભુજ રૂટ પર વધશે પ્રીમિયમ એસી સેવા

ટૂંક સમયમાં જ વધુ 6 એસી બસો પણ મળશે

રાજકોટથી અમદાવાદ દર કલાકે, વડોદરા દર દોઢ કલાકે અને ભુજ પિક અવર્સમાં દર કલાકે વોલ્વો એસી બસ મળશે

ખાસ ખબર ન્યૂઝ રાજકોટ

મુસાફરોને આરામદાયક, સલામત અને આધુનિક મુસાફરીનો અનુભવ કરાવવા માટે ગુજરાત રાજ્ય માર્ગ વાહન વ્યવહાર નિગમ (GSRTC) દ્વારા પ્રીમિયમ વોલ્વો અને એસી બસ સેવાઓના વિસ્તરણની દિશામાં વધુ એક મહત્વપૂર્ણ પગલું ભરવામાં આવ્યું છે. મુસાફરો તરફથી મળી રહેલા બહોળા પ્રતિસાદ અને વધતી માંગને ધ્યાનમાં રાખી રાજકોટ એસ.ટી. વિભાગને વધુ પાંચ નવી વોલ્વો બસો ફાળવવામાં આવી છે. તાજેતરમાં જ રાજકોટ વિભાગને બે નવી વોલ્વો બસો ફાળવવામાં આવી હતી, જે રાજકોટ–વડોદરા રૂટ પર સફળતાપૂર્વક સંચાલિત થઈ રહી છે. હવે વધુ પાંચ નવી વોલ્વો બસો મળતાં પ્રીમિયમ બસ સેવાનો વ્યાપ વધુ વિસ્તરશે. આમાંથી બે બસો રાજકોટ–વડોદરા રૂટ પર અને ત્રણ બસો રાજકોટ–ભુજ રૂટ પર શરૂ કરવામાં આવશે. નવી સેવાઓ શરૂ થતાં રાજકોટથી વડોદરા અને ભુજ વચ્ચે મુસાફરી કરતા હજારો મુસાફરોને વધુ વિકલ્પો ઉપલબ્ધ થશે તેમજ મુસાફરી વધુ અનુકૂળ અને સુવિધાજનક બનશે.

નવી વોલ્વો બસ સેવાઓના પ્રારંભ નિમિત્તે ફ્લેગ ઓફ કાર્યક્રમનું આયોજન કરવામાં આવ્યું છે. રાજકોટ મહાનગરપાલિકાના મેયર શ્રી નેહલભાઈ શુકલના વરદહસ્તે આ કાર્યક્રમ યોજાશે. કાર્યક્રમ 9 જૂન, 2026ના રોજ સવારે 11:00 કલાકે ઢેબર રોડ સ્થિત એસ.ટી. બસપોર્ટ ખાતે યોજાનાર છે. GSRTC દ્વારા મળતી માહિતી મુજબ આગામી સમયમાં રાજકોટ વિભાગને વધુ છ નવા એસી વાહનો પણ ફાળવવામાં આવનાર છે. આ બસો સ્ટેચ્યુ ઓફ યુનિટી, મોરબી–જામનગર અને દાહોદ જેવા મહત્વપૂર્ણ રૂટો પર શરૂ કરવામાં આવશે, જેના કારણે લાંબા અંતરની મુસાફરી વધુ આરામદાયક બનશે. નવી બસોના સમાવેશ બાદ રાજકોટ–અમદાવાદ રૂટ પર દર કલાકે, રાજકોટ–વડોદરા રૂટ પર દર દોઢ કલાકે અને રાજકોટ–ભુજ રૂટ પર પીક અવર્સ દરમિયાન દર કલાકે વોલ્વો એસી બસ સેવા ઉપલબ્ધ બનશે. આથી મુસાફરોને સમયાનુકૂળ બસ મળવાની સુવિધામાં નોંધપાત્ર વધારો થશે. નવી વોલ્વો અને એસી બસ સેવાઓ શરૂ થતાં રાજકોટ અને સૌરાષ્ટ્રના મુસાફરોને વધુ સુવિધાજનક, સલામત, આરામદાયક અને આધુનિક જાહેર પરિવહન સેવાનો લાભ મળશે, તેવી આશા વ્યક્ત કરવામાં આવી રહી છે.

નવી વોલ્વો બસનો સમય

રાજકોટ–વડોદરા રૂટ પર સવારે 8 વાગ્યે ઉપડતી બસ બપોરે 2 વાગ્યે વડોદરા પહોંચશે

રાજકોટ–વડોદરા રૂટ પર સવારે 11 વાગ્યે ઉપડતી બીજી બસ સાંજે 5:00 વાગ્યે પહોંચશે

રાજકોટ–વડોદરા રૂટની બંને બસોનું ભાડું રૂ. 803 નક્કી કરવામાં આવ્યું છે.

રાજકોટ–ભુજ રૂટ પર સવારે 6:15 વાગ્યે, સવારે 11:30 વાગ્યે અને સાંજે 4:00 વાગ્યે ત્રણ અલગ-અલગ વોલ્વો બસો દોડાવવામાં આવશે

રાજકોટ–ભુજ રૂટની આ બસો અનુક્રમે સવારે 11:45, સાંજે 5:00 અને રાત્રે 9:30 વાગ્યે ભુજ પહોંચશે.

રાજકોટ–ભુજ રૂટ માટેનું ભાડું રૂ. 715 રાખવામાં આવ્યું છે.

રાજકોટ વિભાગ પાસે પહેલેથી જ આધુનિક બસ છે

હાલમાં રાજકોટ વિભાગ દ્વારા 17 વોલ્વો બસો અમદાવાદ, વડોદરા, ભુજ, ગાંધીનગર અને નાથદ્વારા જેવા રૂટો પર સંચાલિત કરવામાં આવી રહી છે. ઉપરાંત 20 એસી લક્ઝરી બસો ભાવનગર, ઉના, દીવ, જામનગર, સુરેન્દ્રનગર, દ્વારકા, અમરેલી, મહુવા, ભુજ, મુન્દ્રા અને જુનાગઢ રૂટ પર દોડાવવામાં આવી રહી છે. આ ઉપરાંત રાજકોટ ઇન્ટરનેશનલ એરપોર્ટ, મોરબી, જુનાગઢ અને જામનગર સહિતના વિવિધ રૂટો પર 20 એસી ઇલેક્ટ્રિક બસો પણ સફળતાપૂર્વક સંચાલિત થઈ રહી છે.