જૂનાગઢના ધારાસભ્ય સંજય કોરડિયાએ પકડ્યો મૃત ગાયના ચામડાં ઉતારવાનો ગોરખધંધો

મનપાના જવાબદાર અધિકારીઓની મિલીભગત હોવાની આશંકા

ખાસ-ખબર સંવાદદાતા
જૂનાગઢના ધારાસભ્ય સંજય કોરડિયાએ મૃત ગાયોના ચામડા ઉતારી પછી દફનાવવાનું કૌભાંડ ઝડપી પાડ્યું છે. આ અંગેની ઓડિયો ક્લિપ પણ જારી થઈ છે. જેમાં એક વ્યક્તિ સ્પષ્ટ એવું કહે છે કે મરેલી ગાયનું ચામડું ઉતર્યા પછી તેને નવાગામ દફનાવવા લઈ જવાય છે.

આ ઓડિયો ક્લિપમાં ધારાસભ્ય સંજય કોરડિયા મનપાના એક અધિકારીને ફોન પર પૂછે છે કે ગૌવંશની અંતિમવિધિ કેવી રીતે કરાય છે, તેમાં અધિકારી કહે છે કે તેને ડમ્પિંગ સાઈટ પર લઈ જઈને દફનાવી દેવાય છે. જો કે આ ઘટનામાં ધારાસભ્યને કંઈક જુદું જ જાણવા મળ્યું હતું. તેઓએ લાઈન પર રહેલા એક કર્મચારીને પૂછયું કે શું કરવામાં આવે છે? તેમણે જવાબ આપ્યો હતો કે આપણે ચામડું ઉતારીને પછી 2 વાગ્યે નગરપાલિકાનો જે ડબ્બો આવે એમાં મોકલી દઈએ છીએ.

આ અંગે ધારાસભ્યે આક્ષેપ કર્યો છે કે જૂનાગઢ મનપાના અધિકારીઓ દ્વારા એક મોટું કૌભાંડ આકાર લઈ રહ્યું છે. વૃદ્ધ ગાય અથવા ગૌવંશના મૃત્યુ બાદ જમીનમાં દાટીને સન્માનપૂર્વક વિદાય આપવાની હોય છે. પણ કેટલાક લાલચુ અધિકારીઓ ગાયનું ચામડું ઉતારીને પછી તેનો નિકાલ કરવા દે છે. આથી દફનાવેલી ગાયોનું પોસ્ટમોર્ટમ કરી તેનો લેબોરેટરી રિપોર્ટ કરવાની માંગ કરવામાં આવી છે. સાથે ઓડિયો ક્લિપમાં જે વાતનો ફોડ પડે છે તેની જુબાની લઈને તપાસ કરવામાં આવે અને જવાબદાર અધિકારીઓની મિલીભગત હોય તો સસ્પેન્ડ કરી, સખત સજા કરવામાં આવે. આ સાથે ગાયના ચામડાના વેપારીઓની ભૂમિકા જાણી નિયમ મુજબ ત્વરિત કાર્યવાહી કરવામાં આવે એવી માંગ પણ ધારાસભ્યે કરી છે.

સંજય કોરડીયાએ જૂનાગઢ મનપાના અધિકારી સાથે કરેલી વાતચીતની ઓડિયો ક્લિપ વાયરલ કરી
જૂનાગઢ કોર્પોરેશનના અધિકારીઓ દ્વારા શક્યત એક મોટું કૌભાંડ આકાર લઈ રહ્યું હોવાની પૂરી શક્યતા છે. વૃદ્ધ ગાય કે ગૌવંશના મૃત્યુ બાદ જમીનમાં દાટીને સન્માનજનક રીતે વિદાય આપવાની હોય છે પરંતુ આ સાથેની ઓડિયો ક્લિપ મુજબ કેટલાક લાલચું અધિકારીઓએ ગાયનું ચામડું ઉતારીને પછી તેનો નિકાલ કરવા દે છે. ટૂંકમાં મૃત્યુ પછી પણ ગાય માતાનો વેપાર. આ બાબતે ભારપૂર્વક અને દુ:ખ સાથે માંગ છે કે દાટેલી ગાયોનું પોસ્ટમોટમ કરી તેનો લેબોરેટરી રિપોર્ટ કરવામાં આવે. ઓડિયો ક્લિપમાં વાત કરેલ શખ્સની જુબાની લઈ તપાસ કરવામાં આવે તો જવાબદાર અધિકારીઓની મિલીભગત જાણી સસ્પેન્ડ કરી સખતમાં સખત સજા કરવામાં આવે તેમજ વેપારીઓની ભૂમિકા જાણીને નિયમ અનુસાર કડક અને ત્વરિત કાર્યવાહી કરવામાં આવે એ જરૂૂરી છે એવું સંજય કોરડીયાએ જૂનાગઢ કોર્પોરેશનના એક અધિકારી સાથે કરેલી વાતચીતની જાહેર ઓડિયો ક્લિપમાં જણાવ્યું હતું.

જૂનાગઢ ધારાસભ્ય કોરડિયાની મનપા અધિકારી અને અન્ય વ્યક્તિ સાથેની ઓડિયો ક્લિપ સાંભળવા અહીં ક્લિક કરો