કચરો ફેંકનાર અને જાહેરમાં થૂંકનાર પાસે જ કમિશનરે સફાઈ કરાવી

બુલેટ પર ફિલ્ડમાં ઉતર્યા કમિશનર તુષાર સુમેરા : જ્યુબિલી, લીમડા ચોક અને યાજ્ઞિક રોડમાં જાતે કર્યું નિરીક્ષણ

સ્વચ્છ રાજકોટ બનાવવાની જવાબદારી માત્ર સફાઈ કર્મચારીઓની નથી. દરેક નાગરિકે સ્વચ્છતા અપનાવવી જરૂરી : કમિશનર તુષાર સુમેરા

રાજકોટ શહેરને સ્વચ્છ, સુંદર અને સુવ્યવસ્થિત બનાવવા માટે રાજકોટ મહાનગરપાલિકાએ જાહેરમાં ગંદકી ફેલાવનારાઓ સામે કડક કાર્યવાહી શરૂ કરી છે. આ કામગીરીને વધુ અસરકારક બનાવવા માટે મ્યુનિસિપલ કમિશનર
તુષાર સુમેરા આજે સોલિડ વેસ્ટ મેનેજમેન્ટ શાખાની ટીમ સાથે બુલેટ બાઈક પર શહેરના જ્યુબિલી, લીમડા ચોક અને યાજ્ઞિક રોડ સહિતના વિસ્તારોમાં ફિલ્ડ વિઝિટે નીકળ્યા હતા. ફિલ્ડ મુલાકાત દરમિયાન કમિશનરે રોડ,
ફૂટપાથ અને જાહેર સ્થળોની સફાઈ વ્યવસ્થાની જાતે સમીક્ષા કરી હતી. આ દરમિયાન રસ્તા પર કચરો ફેંકતા, જાહેરમાં થૂંકતા અને ગંદકી ફેલાવતા લોકોને સ્થળ પર જ રોકી કાર્યવાહી કરવામાં આવી હતી. કેટલાક કિસ્સાઓમાં
ગંદકી કરનાર વ્યક્તિ પાસે જ સ્થળની સફાઈ પણ કરાવવામાં આવી હતી.

જ્યુબિલી વન-વે વિસ્તારમાં લારી-થડા અને અન્ય ધંધાર્થીઓને પણ પોતાના વ્યવસાયિક સ્થળની આસપાસ સ્વચ્છતા જાળવવા સ્પષ્ટ સૂચના આપવામાં આવી હતી. આસપાસ કચરો જોવા મળતા સંબંધિત ધંધાર્થીઓ પાસે
સફાઈ કરાવવામાં આવી હતી. મહાનગરપાલિકાએ ચેતવણી આપી છે કે લારી, થડા કે દુકાનની આસપાસ કચરો એકઠો કરવો, રસ્તા પર કચરો ફેંકવો અથવા ગ્રાહકો દ્વારા થતી ગંદકી પ્રત્યે બેદરકારી દાખવવી હવે ચલાવી
લેવામાં આવશે નહીં. વારંવાર નિયમોનો ભંગ કરનાર સામે દંડાત્મક તેમજ અન્ય કાયદાકીય કાર્યવાહી કરવામાં આવશે.

ફિલ્ડ મુલાકાત દરમિયાન જાહેર રસ્તા પર થૂંકનાર એક નાગરિકને કમિશનરે રૂબરૂ રોકી જાહેર સ્થળને ગંદુ કરવાની ગંભીરતા સમજાવી હતી. જે સ્થળે ગંદકી કરવામાં આવી હતી તેની સફાઈ પણ સંબંધિત નાગરિક પાસે જ
કરાવવામાં આવી હતી. આ કામગીરીનો હેતુ માત્ર દંડ વસૂલવાનો નહીં, પરંતુ નાગરિકોમાં જાહેર જગ્યા મારી પણ જવાબદારી છે તેવી જવાબદારીની ભાવના વિકસાવવાનો હોવાનું મહાનગરપાલિકાએ જણાવ્યું હતું. મ્યુનિસિપલ
કમિશનર તુષાર સુમેરાએ જણાવ્યું હતું કે મહાનગરપાલિકાની સફાઈ ટીમ શહેરના વિવિધ વિસ્તારોમાં નિયમિત કામગીરી કરે છે. પરંતુ સફાઈ થયા બાદ ફરીથી કચરો ફેંકવો કે જાહેર સ્થળોએ ગંદકી કરવી એ સ્વચ્છતા
વ્યવસ્થાને નુકસાન પહોંચાડે છે. સ્વચ્છ રાજકોટ બનાવવાની જવાબદારી માત્ર સફાઈ કર્મચારીઓની નથી. શહેરના દરેક નાગરિકે પોતાના વર્તનમાં સ્વચ્છતા અપનાવવી જરૂરી છે. જાહેર રસ્તા, ફૂટપાથ અને અન્ય સ્થળો સૌની
સામૂહિક મિલકત હોવાથી તેને સ્વચ્છ રાખવાની જવાબદારી પણ સૌની છે.

રાજકોટ મહાનગરપાલિકાની સોલિડ વેસ્ટ મેનેજમેન્ટ શાખા દ્વારા આગામી દિવસોમાં પણ શહેરના વિવિધ વિસ્તારોમાં સઘન ચેકિંગ અને સ્પોટ એક્શન હાથ ધરવામાં આવશે. નિયમોનો ભંગ કરનાર સામે સ્થળ પર જ દંડ, ગંદકી
દૂર કરાવવાની કાર્યવાહી તેમજ જરૂરિયાત મુજબ અન્ય કાયદાકીય પગલાં લેવામાં આવશે.મહાનગરપાલિકાએ નાગરિકોને અપીલ કરી છે કે જાહેરમાં કચરો ન ફેંકે, જાહેર સ્થળોએ ન થૂંકે અને પોતાના ઘર તથા વ્યવસાયિક
સ્થળની આસપાસ સ્વચ્છતા જાળવે. સ્વચ્છ રાજકોટ માત્ર મહાનગરપાલિકાની નહીં, પરંતુ શહેરના દરેક નાગરિકની સંયુક્ત જવાબદારી છે.