રાજકોટ એઈમ્સ પાસે રૂ. ૬.૭૫ કરોડના ખર્ચે અત્યાધુનિક એસ.ટી. બસ સ્ટેશન બનશે

ધારાસભ્ય ડૉ. દર્શિતાબેન શાહના હસ્તે ખાતમુહૂર્ત સંપન્ન

સૌરાષ્ટ્રભરમાંથી સારવાર અર્થે આવતા હજારો દર્દીઓ, સગાઓ અને મુસાફરો માટે પરિવહન વધુ સુગમ બનશે

૫,૦૦૦ ચો.મી. વિસ્તારમાં G+1 માળખું આકાર લેશે: ૫ પ્લેટફોર્મ, દિવ્યાંગ-મૈત્રીપૂર્ણ સુવિધાઓ અને બેબી ફીડિંગ રૂમની વ્યવસ્થા

ગુજરાત રાજ્ય માર્ગ વાહનવ્યવહાર નિગમ (GSRTC) દ્વારા રાજકોટના પરાપીપળીયા સ્થિત એઈમ્સ (AIIMS) હોસ્પિટલ પરિસર નજીક અંદાજે રૂ. ૬.૭૫ કરોડ (રૂ. ૬૭૪.૭૭ લાખ)ના ખર્ચે નિર્માણ પામનારા અદ્યતન આર.સી.સી. ફ્રેમ સ્ટ્રક્ચરવાળા નવીન એસ.ટી. બસ સ્ટેશનનું વિધિવત્ ખાતમુહૂર્ત ધારાસભ્ય ડૉ. દર્શિતાબેન શાહના વરદ્ હસ્તે સંપન્ન થયું હતું.

રાજ્ય સરકાર દ્વારા નિગમને ફાળવાયેલી વિશેષ ગ્રાન્ટ-સહાય અંતર્ગત ૫,૦૦૦ ચોરસ મીટરના વિશાળ પટાંગણમાં આ બસ સ્ટેશન તૈયાર કરવામાં આવશે, જેમાં ૧,૧૮૯.૦૯ ચોરસ મીટર ક્ષેત્રફળમાં સુવિધાસભર બાંધકામ હાથ ધરાશે. રાજકોટ એઈમ્સમાં સમગ્ર સૌરાષ્ટ્રમાંથી સારવાર અર્થે આવતા હજારો દર્દીઓ, તેમના પરિજનો, મુલાકાતીઓ તેમજ હોસ્પિટલના સ્ટાફ માટે આ બસ સ્ટેશન આશીર્વાદરૂપ સાબિત થશે.આ બસ સ્ટેશન ગ્રાઉન્ડ પ્લસ ફર્સ્ટ ફ્લોર (G+1) ના માળખામાં બનશે. ગ્રાઉન્ડ ફ્લોર પર ૫ બસ પ્લેટફોર્મ, વિશાળ વેઇટિંગ હોલ, વી.આઈ.પી. વેઇટિંગ લોન્જ, ટ્રાફિક કંટ્રોલ રૂમ, વિદ્યાર્થીઓ તથા મુસાફરો માટે પાસ રૂમ અને પાર્સલ રૂમની જોગવાઈ કરાઈ છે. આ ઉપરાંત કેન્ટીન, આર.ઓ. વોટર પ્લાન્ટ તેમજ મહિલા મુસાફરો માટે ખાસ લેડીઝ રેસ્ટરૂમ સાથે બેબી ફીડિંગ રૂમ અને સંલગ્ન શૌચાલયની અલાયદી વ્યવસ્થા ઉપલબ્ધ બનશે.

૪,૦૦૦ ચોરસ મીટરના સર્ક્યુલેશન વિસ્તારમાં ટકાઉ સી.સી. ટ્રી-મિક્સ ફ્લોરિંગ કરાશે. ‘સુગમ્ય ભારત અભિયાન’ અંતર્ગત દિવ્યાંગ મુસાફરોની સરળતા માટે સ્લોપિંગ રેમ્પ, વ્હીલચેર, ટેક્ટાઇલ ટાઇલ્સ, બ્રેઇલ લિપિ સાઇનેજીસ, ગ્રેબ બાર અને વિશેષ શૌચાલયની વ્યવસ્થા ઊભી કરાશે.

ખાતમુહૂર્ત પ્રસંગે ધારાસભ્ય ડૉ. દર્શિતાબેન શાહ, ગામના સરપંચ વિક્રમભાઈ હુંબલ, એઈમ્સ ડેપ્યુટી ડાયરેક્ટર અંકુર પ્રતાપ સિંહ, એસ.ટી. વિભાગીય નિયામક એમ.પી. રાજ સહિતના વહીવટી અધિકારીઓ, સ્થાનિક અગ્રણીઓ તેમજ નાગરિકો બહોળી સંખ્યામાં ઉપસ્થિત રહ્યા હતા.