માર્ગ અકસ્માતો અને ટ્રાફિક નિયમોના ઉલ્લંઘનને અટકાવવા ગુજરાત પોલીસની વિશેષ ટ્રાફિક ડ્રાઇવ
રોંગ સાઈડ-ઓવર સ્પીડિંગ કરનારા 74 હજાર વાહનચાલક દંડાયા, 5.33 કરોડ વસૂલાયા
- Advertisement -
રાજ્યના પોલીસ વડા જ્ઞાનેન્દ્રસિંહ મલિકના નિર્દેશથી હવે નંબર પ્લેટ વગરના, અયોગ્ય અથવા ચેડાં કરેલી નંબર પ્લેટવાળા વાહનો સામે પણ રાજ્યવ્યાપી ઝુંબેશ શરૂ કરવામાં આવી છે. 1 સપ્ટેમ્બરથી 14 ઓક્ટોબર 2026 સુધી
ચાલનારી આ ડ્રાઇવ દરમિયાન આવા વાહનો સામે કડક કાયદેસરની કાર્યવાહી કરવાના આદેશ આપવામાં આવ્યા છે. ગુજરાતમાં માર્ગ અકસ્માતો અને ટ્રાફિક નિયમોના ઉલ્લંઘનને અટકાવવા ગુજરાત પોલીસે રાજ્યવ્યાપી
વિશેષ ટ્રાફિક ડ્રાઇવ હાથ ધરી છે. ઓગસ્ટ મહિનામાં રોંગ સાઈડ ડ્રાઇવિંગ અને ઓવર સ્પીડિંગ સામે કરાયેલી કાર્યવાહીમાં કુલ 74,242 કેસ નોંધાયા છે અને વાહનચાલકો પાસેથી રૂ.5.33 કરોડથી વધુનો દંડ વસૂલવામાં આવ્યો
છે. બીજી તરફ હાઇવે તથા મુખ્ય માર્ગો પર અડચણરૂપ ગેરકાયદેસર પાર્કિંગ સામે પણ 36 હજારથી વધુ કેસોમાં કાર્યવાહી કરવામાં આવી છે. હવે નંબર પ્લેટ વગરના વાહનો સામે 14 ઓક્ટોબર સુધી ડ્રાઇવ ચાલશે. ઓગસ્ટથી
31 ઓગસ્ટ દરમિયાન રોંગ સાઈડ ડ્રાઇવિંગ સામે વિશેષ ઝુંબેશ ચલાવવામાં આવી હતી. જેમાં 36,159 કેસ નોંધાયા અને કુલ રૂ.3,64,52,000નો દંડ વસૂલાયો હતો.
રોંગ સાઈડ ડ્રાઇવિંગને કારણે સામેથી આવતા વાહનો સાથે ગંભીર અકસ્માતો થવાની શક્યતા રહેતી હોવાથી પોલીસ દ્વારા આવા વાહનચાલકો સામે કડક કાર્યવાહી કરવામાં આવી છે. આ જ સમયગાળા દરમિયાન ઓવર
સ્પીડિંગના 38,083 કેસ નોંધાયા હતા. આ કેસોમાં કુલ રૂ.1,69,26,900નો દંડ વસૂલવામાં આવ્યો છે. આમ માત્ર ઓગસ્ટ મહિનામાં બંને પ્રકારના ગંભીર ટ્રાફિક નિયમભંગના 74,242 કેસ નોંધાઈ કુલ રૂ.5,33,78,900નો દંડ
વસૂલાયો છે. હાઇવે અને મુખ્ય માર્ગો પર બેદરકારીપૂર્વક વાહન પાર્ક કરવાથી ટ્રાફિક અવરોધ ઉપરાંત અકસ્માતનું જોખમ વધે છે. આથી ગેરકાયદેસર પાર્કિંગ સામે પણ પોલીસ દ્વારા કાર્યવાહી કરવામાં આવી છે. નેશનલ હાઇવે
પર 10,408 કેસ, જ્યારે સ્ટેટ હાઇવે અને અન્ય માર્ગો પર 20,813 કેસ નોંધાયા છે. ટ્રાફિકમાં અડચણ ઊભી કરતા વાહનો સામે 5,078 કેસ કરવામાં આવ્યા છે અને 580 વાહનો સામે સીધી કાર્યવાહી કરાઈ છે. ટ્રાફિક નિયમોનું
પાલન માત્ર દંડથી બચવા માટે નહીં, પરંતુ પોતાના અને અન્ય લોકોના જીવનની સુરક્ષા માટે કરવું જરૂરી છે. ગુજરાત પોલીસ દ્વારા આગામી દિવસોમાં પણ નિયમભંગ કરનારા વાહનચાલકો સામે કાર્યવાહી વધુ કડક
બનાવવામાં આવે તેવી શક્યતા છે.
પ્લેટને વાળી દીધી તો પણ કાર્યવાહી થશે
પોલીસના જણાવ્યા મુજબ કેટલાક વાહનચાલકો નંબર પ્લેટ વગર વાહન ચલાવે છે અથવા નંબર પ્લેટને વાળી દેવી, અયોગ્ય ફોન્ટ કે લખાણનો ઉપયોગ કરવો તથા નંબર પ્લેટમાં અન્ય પ્રકારના ચેડાં કરતા હોવાની બાબતો
સામે આવી છે. વાહનની સચોટ ઓળખ ગુનાખોરી નિયંત્રણ, વાહનચોરી અટકાવવા અને કાયદો-વ્યવસ્થા જાળવવા માટે મહત્વપૂર્ણ હોવાથી આ પ્રકારના નિયમભંગને ગંભીરતાથી લેવામાં આવી રહ્યો છે. નંબર પ્લેટ અંગેની
ડ્રાઇવનો મુખ્ય હેતુ માત્ર ટ્રાફિક નિયમોનું પાલન કરાવવાનો નથી. પોલીસના જણાવ્યા મુજબ માન્ય અને સ્પષ્ટ નંબર પ્લેટથી વાહનની ઓળખ વધુ સુદૃઢ બનશે, ચોરી થયેલા વાહનો શોધવામાં મદદ મળશે અને ગુનાહિત
પ્રવૃત્તિઓમાં વાહનોના સંભવિત દુરુપયોગને રોકી શકાશે. સ્ટેટ ટ્રાફિક બ્રાન્ચના SP વી. સાહિત્યાએ નાગરિકોને અપીલ કરી છે કે પોતાના વાહનમાં RTOના નિયમો મુજબની માન્ય, સ્પષ્ટ અને યોગ્ય નંબર પ્લેટ લગાવેલી છે કે
નહીં તેની તાત્કાલિક ખાતરી કરે અને નંબર પ્લેટ સાથે કોઈપણ પ્રકારના ચેડાં ન કરે. વાહનચાલકોએ નિયત સ્પીડ લિમિટમાં વાહન ચલાવવું, પોતાની લેનમાં જ રહેવું, રોંગ સાઈડ ડ્રાઇવિંગ ન કરવું તેમજ નેશનલ-સ્ટેટ હાઇવે
અને મુખ્ય માર્ગો પર બેદરકારીપૂર્વક વાહન પાર્ક કરીને ટ્રાફિકમાં અડચણ ઊભી ન કરવી તેવી અપીલ કરવામાં આવી છે.
- Advertisement -
