શ્રીનાથદ્વારા ધ્વજાજીની પધરામણી બાદ ઉકાણી પરિવારમાં લગ્નોત્સવ યોજાશે, રાજકોટમાં રિંગ સેરેમની સહિતનાં પ્રસંગો

શાહી લગ્નોત્સવ પૂર્વે ત્રણ દિવસનો દિવ્ય-ભવ્ય-નવ્ય મનોરથ મહોત્સવનું ઉકાણી પરિવાર દ્વારા આયોજન

ઉકાણી પરિવારની લાડલી રાધા અને ફીલ્ડમાર્શલ ગ્રુપના રીશીના લગ્ન
ખાસ-ખબર ન્યૂઝ રાજકોટ

9 સૌરાષ્ટ્રના અગ્રણી ઉદ્યોગપતિ અને રાજકોટની શાન સમા જાણીતા દાનવીર પરિવાર બાનલેબ પરિવાર બાનલેબ-ઉકાણી પરિવારમાં પુત્રીના લગ્નની શરણાઇઓ ગુંજવા લાગી છે. ઉકાણી પરિવાર દ્રારા રાજકોટના ઇશ્વરીયા ખાતે યોજાનારા આ ’શાહી’ લગ્નોત્સવમાં દેશ-વિદેશના મહેમાનોને લગ્નમાં સામેલ થવા ભાવભર્યુ નોતરૂ મોકલવામાં આવ્યુ છે. ગુજરાતમાં પ્રથમવાર ’યુરોપીયન’ થીમ પર ખાસ તૈયાર કરવામાં આવેલ ભવ્યાતિભવ્ય મંડપમાં પરિવારના મોંઘેરા મહેમાનો સામેલ થઇ આ શાહી લગ્નોત્સવ માણશે. ઉપરાંત લગ્નસ્થાને ઉભા કરવામાં આવેલા ’વૃંદાવન ધામ’માં ત્રણ દિવસીય મનોરથે વૈષ્ણવો તથા જાહેર જનતા માટે ખુલ્લો મુકવામાં આવશે. રાજકોટ સહીત સૌરાષ્ટ્ર માટે આ લગ્નોત્સવ અનોખા અને યાદગાર બની રહેશે.

છેલ્લા છ દાયકાથી તબીબી વ્યવસાયને માનવસેવામાં તબદીલ કરી હજારો દર્દીઓના દિલમાં ચાહના મેળવનાર, બાનલેબના સ્થાપક, પાણીદાર પાટીદાર સમાજના મોભી, જાણીતા દાનવીર, મુંઠી ઉંચેરા માનવી ડો. ડાયાભાઇ પટેલના પરિવારમાં યોજાનારા અનોખા લગ્નોત્સવની વિગત જોઈએ તો, યુવા ઉદ્યોગપતિ, દ્રારકાધીશના પરમ ભકત,જગતમંદિર દ્રારકાના ટ્રસ્ટી, ઉમિયાધામ સિદસરના ચેરમેન, રાજકોટ સહીત સૌરાષ્ટ્રની 100 થી વધુ સંસ્થાઓ સાથે જોડાયેલા મૌલેશભાઈ ઉકાણી તથા સોનલબેન ઉકાણીની લાડકી દિકરી ચિ. રાધાના લગ્ન સૌરાષ્ટ્રના જાણીતા ઉદ્યોગગુહ, દાતા પરિવાર નીતીનભાઈ પોપટભાઈ પટેલના પુત્ર ચિ. રીશી સાથે યોજાશે.

રાજકોટની ભાગોળે ઇશ્વરીયામાં દ્રારકાધીશ ફાર્મ ખાતે યોજાનારા બાનલેબ- ઉકાણી પરિવારના ’શાહી લગ્નોત્સવમાં’ દેશ-વિદેશના મહેમાનો ઉપરાંત દેશભરના દિગ્ગજ રાજકીય સામાજીક હસ્તીઓ ને આમંત્રણ આપ્યું છે. આ શાહી લગ્નોત્સવમાં આમંત્રિત મહેમાનો ઉપરાંત ઉકાણી પરિવાર દ્વારા અનોખો ત્રિદિવસીય મનોરથ યોજાશે. ઉકાણી પરિવારની લાડકી ચિ. રાધાના લગ્નપ્રસંગના ભાગરૂપે લગ્નોત્સવ પૂર્વ આગામી તા. 7,8,9 જાન્યુઆરીના રોજ વૃંદાવન ધામ ખાતે ભવ્ય મનોરથ યોજાશે. મૌલેશભાઇ ઉકાણીના જણાવ્યા અનુસાર આગામી તા. 6 જાન્યુઆરી એ વૈષ્ણવોના તીર્થ ધામ શ્રીનાથદ્રારાની લાંબા અંતરાળ બાદ ગુજરાતમાં પ્રથમવાર ’શ્રીનાથજીની ધ્વજાજી આરોહણ’ ઉત્સવ યોજાશે. જેમાં શ્રી નાથદ્રારાથી આવેલ ’ધ્વજાજી’નું વાજતે-ગાજતે સામૈયુ કરી ’વૃંદાવન ધામ’ ખાતે લઇ જવાશે. રાજકોટ સહીત સૌરાષ્ટ્રમાં વૈષ્ણવોના તીર્થધામ નાથદ્રારાની ધ્વજાજીના આરોહણનો અન્નય અને અદભૂત પ્રસંગ ઉજવાશે. લગ્નોત્સવ પૂર્વ ઉકાણી પરિવાર દ્રારા વૈષ્ણવો તથા જાહેર જનતા માટે યોજાનારા ત્રિદિવસીય મનોરથ માટે ખાસ ઉભા કરાયેલા વૃંદાવનધામમાં દ્રારકાધીશ મંદિર, શામળાજી મંદિર, ડાકોર મંદિર, શ્રીનાથજીના મોતી મહેલ, શ્રીજી બાવાના પ્રેમ મંદિર, ગીરીરાજ પર્વતની આબેહુબ પ્રતિકૃતિ ઉભી કરવામાં આવી રહી છે. ત્રિદિવસીય મનોરથ યોજાશે જેમાં તા. 7 જાન્યુ.ના રોજ છપ્પન ભોગ મનોરથ, તા. 8 જાન્યુઆરીના રોજ ગૌ-ચરણ મનોરથ, તા. 9 જાન્યુના રોજ દિપદાન મનોરથ યોજાશે. તા. 7 થી 9 દરમ્યાન યોજાનારા ત્રિદિવસીય મનોરથમાં પધારવા સર્વે વૈષ્ણવો તથા જાહેર જનતાને બાનલેબ તથા ઉકાણી પરિવારનું નિમંત્રણ આપવામાં આવ્યુ છે.
ઉકાણી પરિવાર દ્રારા ત્રીદિવસીય મનોરથ માટે વૃંદાવન ધામ તથા તા. 11 થી શરૂ થનાર અનોખા અને યાદગાર લગ્નોત્સવ માટે યુરોપીયન થીમનો વિશાળ સેટ તૈયાર થઇ રહયો છે. વૃંદાવનધામની પાવન ભૂમીમાં મનોરથમાં કાર્યક્રમ સવારે 8:30 થી અને સાંજે 4:30 થી 8:30 દર્શન તથા ધ્વજાજી આરોહણના પ્રસંગો ભવ્યાતિભવ્ય રીતે ઉજવવાનું આયોજન થઇ રહયુ છે. રાજકોટની જનતાને 10 વર્ષ પૂર્વ ઘેલુ લગાડનાર અનોખા લગ્નની ઉજવણી અને 5 વર્ષ પૂર્વ ’કૃષ્ણચરિત્ર કથા’ સપ્તાહમાં ભવ્ય વિશાળ સેટ સાથેનું યાદગાર આયોજન ની ભેટ આપનાર બાનલેબ ઉકાણી પરિવાર દ્રારા આગામી જાન્યુઆરી -2025માં વધુ એક યાદગાર લગ્નોત્સવની ઉજવણી કરશે.