જૂનાગઢ રેન્જમાં ‘ઓપરેશન સજ્જતા’ અસામાજિક તત્ત્વો પર પોલીસનો સપાટો

જૂનાગઢ, ગીર સોમનાથ, પોરબંદરમાં ચૂંટણી પૂર્વે રેન્જ આઇજી રાજેન્દ્રસિંહ ચુડાસમાનો સપાટો

6545 તત્ત્વો સામે અટકાયતી પગલા, રેન્જમાંથી 56.23 લાખનો દારૂ જપ્ત

1659 હથિયારો જમા, 1142 વોરંટની બજવણી સાથે પોલીસની કાર્યવાહી

ખાસ-ખબર ન્યૂઝ જૂનાગઢ, તા.18

લોકશાહીના મહાપર્વ સમાન સ્થાનિક સ્વરાજ્યની ચૂંટણીઓ જ્યારે નજીક આવી રહી છે, ત્યારે જૂનાગઢ રેન્જ પોલીસે કાયદો અને વ્યવસ્થાની પરિસ્થિતિને સુદ્રઢ બનાવવા માટે કમર કસી લીધી છે. જૂનાગઢ રેન્જ આઈજીપી રાજેન્દ્રસિંહ ચુડાસમાના સીધા માર્ગદર્શન હેઠળ, સમગ્ર જૂનાગઢ રેન્જમાં એક ચૂંટણીલક્ષી સુરક્ષા અભિયાન હાથ ધરવામાં આવ્યું છે. આ અભિયાનનો મુખ્ય ઉદ્દેશ્ર્ય માત્ર ચૂંટણીને શાંતિપૂર્ણ રીતે પાર પાડવાનો નથી, પરંતુ દરેક નાગરિક ભયમુક્ત વાતાવરણમાં પોતાના મતાધિકારનો ઉપયોગ કરી શકે તેવો વિશ્ર્વાસ અપાવવાનો છે.
જૂનાગઢ, પોરબંદર અને ગીર સોમનાથ જિલ્લાઓનો સમાવેશ કરતી જૂનાગઢ રેન્જમાં આદર્શ આચાર સંહિતા લાગુ થયા બાદથી જ પોલીસ તંત્ર દ્વારા આક્રમક અને અસરકારક કામગીરી કરવામાં આવી રહી છે. કોઈ પણ પ્રકારના અનિચ્છનીય બનાવ ન બને અને અસામાજિક તત્વો માથું ન ઉંચકે તે માટે રેન્જ પોલીસ દ્વારા સતત મોનિટરિંગ કરવામાં આવી રહ્યું છે. પોલીસ મહાનિરીક્ષકના સૂચન મુજબ, ફિલ્ડમાં કામ કરતા તમામ અધિકારીઓને સ્પષ્ટ સૂચનાઓ આપવામાં આવી છે કે ગુનાહિત પ્રવૃત્તિઓ ધરાવતા વ્યક્તિઓ પર કડક નજર રાખવામાં આવે. ચૂંટણી દરમિયાન શાંતિ ડહોળવા માંગતા તત્વો સામે પોલીસ અત્યંત કડક વલણ અપનાવી રહી છે. આદર્શ આચાર સંહિતાના અમલથી લઈને આજ દિન સુધી, પોલીસ દ્વારા વિવિધ કલમો તેમજ પ્રોહિબિશન (દારૂૂબંધી)ની કલમો હેઠળ આશરે 6545 જેટલા શખ્સો સામે અટકાયતી પગલાં લેવામાં આવ્યા છે. જેમાં પાસા અને તડીપાર જેવી ગંભીર કાર્યવાહીનો પણ સમાવેશ થાય છે. આ આંકડો દર્શાવે છે કે પોલીસ કોઈપણ સંજોગોમાં શાંતિ ભંગ થવા દેવા માંગતી નથી.
ચૂંટણી ટાણે હિંસા કે ડરનો માહોલ ન સર્જાય તે માટે પોલીસ દ્વારા હથિયાર ધારકો પર પણ સખત નજર રાખવામાં આવી રહી છે. જૂનાગઢ રેન્જમાં કુલ 1874 પરવાનાવાળા હથિયારોમાંથી 1659 હથિયારો પોલીસ મથકોએ જમા કરાવી લેવામાં આવ્યા છે. આ ઉપરાંત, 213 હથિયારો મુક્ત, જપ્ત કે રદ કરવાની કાર્યવાહી કરવામાં આવી છે. હાલમાં સમગ્ર રેન્જમાં માત્ર 02 હથિયારો જ જમા કરાવવાના બાકી છે, જે દર્શાવે છે કે પોલીસનું વહીવટી તંત્ર કેટલું સજ્જ અને સતર્ક છે.
કાયદાના હાથ લાંબા હોય છે, તે વાતને સાર્થક કરતા પોલીસે વોરંટની બજવણીમાં પણ આક્રમકતા દાખવી છે. ચૂંટણીને ધ્યાનમાં રાખીને કુલ 1480 બિન-જામીનપાત્ર વોરંટ પૈકી 1142 વોરંટની બજવણી કરી દેવામાં આવી છે. આ ઉપરાંત, લાંબા સમયથી પોલીસને થાપ આપી ફરાર રહેલા 15 જેટલા નાસતા-ફરતા અને પેરોલ જમ્પ કરીને નાસી ગયેલા આરોપીઓને પકડી પાડી જેલના સળિયા પાછળ ધકેલી દેવામાં આવ્યા છે.
ચૂંટણીના સમયે મતદારોને લલચાવવા કે પ્રભાવિત કરવા માટે અસામાજિક તત્વો દ્વારા દારૂૂનો ઉપયોગ થવાની શક્યતા રહેલી હોય છે. જૂનાગઢ રેન્જ પોલીસે આ દિશામાં પણ સફળ કામગીરી કરી છે. આદર્શ આચાર સંહિતા દરમિયાન 3884 લીટર દેશી દારૂ રૂ. 7,76,800 અને 15,901 બોટલ વિદેશી દારૂ રૂ. 48,47,042 મળીને કુલ રૂ. 56,23,842નો મુદ્દામાલ પકડી પાડ્યો છે. આ આંકડો સૂચવે છે કે ચૂંટણી પ્રક્રિયાને પ્રભાવિત કરી શકે તેવા તમામ ગેરકાયદેસરના પ્રયાસોને પોલીસે નાકામ કરી દીધા છે. રેન્જમાં નોંધાયેલા 207 હિસ્ટ્રીશીટરોને પોલીસે ખાસ તપાસ હેઠળ લીધા છે. લીસ્ટેડ બુટલેગર્સ અને જુગારધામ ચલાવનારાઓ વિરુદ્ધ પોલીસનું સર્ચ ઓપરેશન ચાલુ છે, જેમાં 64 સફળ રેઈડ અને 924 નિલ રેઈડ (સતત પેટ્રોલિંગ) કરવામાં આવી છે. આ કામગીરીથી ગુનેગારોમાં પોલીસનો ખોફ અને કાયદાનો ડર જળવાઈ રહ્યો છે. જૂનાગઢ રેન્જ પોલીસની આ સમગ્ર કામગીરી દર્શાવે છે કે તેઓ આગામી સ્થાનિક સ્વરાજ્યની ચૂંટણીને સંપૂર્ણપણે ન્યાયી, મુક્ત અને ભયમુક્ત રીતે સંપન્ન કરાવવા માટે કટિબદ્ધ છે. નાગરિકો માટે પોલીસનો આ અભિગમ એક સુરક્ષા કવચ સમાન છે. જ્યારે પોલીસ તંત્ર આટલી સજ્જતા સાથે મેદાનમાં હોય, ત્યારે લોકશાહીના આ ઉત્સવમાં મતદારો નિર્ભયપણે સહભાગી થઈ શકશે તેવો વિશ્ર્વાસ આ કામગીરી પરથી ચોક્કસપણે કહી શકાય.

3 જિલ્લામાં 23 ચેકપોસ્ટ ઉભી કરીને સઘન વાહન ચેકિંગ

સીમાવર્તી વિસ્તારો અને જિલ્લાના પ્રવેશદ્વારો પર કડક સુરક્ષા વ્યવસ્થા ગોઠવવામાં આવી છે. સમગ્ર રેન્જમાં 23 જેટલી ચેકપોસ્ટ કાર્યરત કરવામાં આવી છે. આ ચેકપોસ્ટ પર રાત-દિવસ વાહનોનું ચેકિંગ હાથ ધરવામાં આવી રહ્યું છે, જેના ભાગરૂપે અત્યાર સુધીમાં 14,765થી વધુ વાહનોનું ઝીણવટભર્યું નિરીક્ષણ કરવામાં આવ્યું છે. શંકાસ્પદ વાહનો, અજાણી વ્યક્તિઓની અવરજવર અને પ્રતિબંધિત ચીજવસ્તુઓની હેરાફેરી અટકાવવા માટે પોલીસ કાફલો સજ્જ છે. ચૂંટણીના દિવસો નજીક આવતા પોલીસની આ કામગીરીમાં હજુ પણ વેગ આવવાની શક્યતા છે, જેથી કરીને કોઈ પણ પ્રકારના અનિચ્છનીય બનાવોને અગાઉથી જ ડામી શકાય. જૂનાગઢ રેન્જ પોલીસની આ સક્રિયતા રાજ્યમાં એક આદર્શ સુરક્ષા મોડેલ તરીકે ઉપસી આવી છે.