ભારતીય સિને જગતનો ‘ક્રાંતિવીર’ અસ્ત : નાના પાટેકરનું 75 વર્ષની ઉંમરે નિધન

કાર્ડિયાક અરેસ્ટ આવ્યો, 45 મિનિટ સુધી CPR આપ્યા બાદ પણ જીવ બચાવી શકાયો નહીં

અદભૂત ડાયલોગ-એક્ટિંગથી ફેન્સના હૃદયમાં અમર થયા નાના પાટેકર

સમાજની વેદના અને સિનેમાને નાનાએ આપેલી અમૂલ્ય ભેટ

ભારતીય અને મરાઠી સિનેમામાં પોતાના બુલંદ અવાજ, તીખા સંવાદો અને દમદાર અભિનયથી દાયકાઓ સુધી દર્શકોના દિલ પર રાજ કરનાર દિગ્ગજ અભિનેતા નાના પાટેકર (વિશ્વનાથ પાટેકર)નું ૭૫ વર્ષની વયે ગોવા ખાતે હૃદયરોગના હુમલાના કારણે દુઃખદ અવસાન થયું છે. ગુરુવારે સવારે ગોવા સ્થિત પોતાના ફ્લેટ પર છાતીમાં અસહ્ય દુઃખાવાની ફરિયાદ બાદ તેઓ બેભાન થઈ ગયા હતા. હોસ્પિટલ પહોંચાડતાં પહેલાં જ તેમનું નિધન થતાં સમગ્ર બોલિવૂડ, મરાઠી સિનેમા જગત અને રાજકીય જગતમાં ઘેરો શોક છે. ગોવાની મણિપાલ હોસ્પિટલના ઓન્કોલોજી વિભાગના હેડ ડો. શેખર
સાલકરે ઘટના અંગે વિગતો આપતાં જણાવ્યું હતું કે, ‘નાના પાટેકરે રાત્રે ૨:૩૦ વાગ્યાની આસપાસ પોતાના એક મિત્રને તબિયત સારી ન હોવાનો મેસેજ કર્યો હતો. મોડી રાત્રે મિત્રની નજર મેસેજ પર પડતાં તેઓ સવારે ૪:૦૦ વાગ્યે નાનાના ફ્લેટ પર પહોંચ્યા હતા, જ્યાં તેઓ ભારે પરસેવાથી રેબઝેબ હતા અને હાલત લથડી રહી હતી. તુરંત જ એમ્બ્યુલન્સ અને મેડિકલ ટીમને બોલાવવામાં આવી હતી.’ ડોક્ટરે વધુમાં કહ્યું કે, ટીમે તેમને એમ્બ્યુલન્સમાં જ CPR આપવાનું શરૂ કર્યું હતું. હોસ્પિટલમાં લાવ્યા બાદ પણ ડોક્ટરોએ સતત ૪૫ મિનિટ સુધી કાર્ડિયાક મસાજ આપી તેમને બચાવવાનો પ્રયાસ કર્યો હતો, પરંતુ સવારે ૫:૨૦ વાગ્યે ડોક્ટરોએ તેમને મૃત જાહેર કર્યા હતા.

બોલિવૂડમાં કેટલાક કલાકારો આવે છે અને પોતાનું પાત્ર ભજવીને ચાલ્યા જાય છે, પરંતુ કેટલાક કલાકારો એવા હોય છે કે તેમનું પાત્ર પૂરું થયા પછી પણ તેમનો અવાજ કાનમાં ગુંજતો રહે છે. દિવંગત દિગ્ગજ અભિનેતા નાના પાટેકર પણ એવા જ અદભુત કલાકારોમાંના એક હતા. ક્યારેક કોઈ અભિનેતાની ઓળખ તેનું નામ નહીં, પરંતુ તેનો અવાજ બની જાય છે. નાના પાટેકરના કિસ્સામાં પણ કંઈક આવું જ હતું. તેઓ પડદા પર આવે ત્યારે જ અંદાજ આવી જતો કે કંઈક વિશેષ થવાનું છે. તેમની આંખો, તેમનો રોષ, બોલવાની અનોખી શૈલી અને સંવાદો પરની મજબૂત પકડ તેમના પાત્રોને બેજોડ બનાવતી હતી. ફિલ્મ ‘ક્રાંતિવીર’નો તેમનો ડાયલોગ ‘આ ગયે મેરી મોત કા તમાશા દેખને’ માત્ર એક લાઇન નહોતી, પણ દર્શકોના દિલમાં કોતરાઈ ગયેલું વાક્ય હતું. આ સિવાય ફિલ્મ ‘તિરંગા’માં ‘અપના તો ઉસૂલ હૈ પહેલે લાત, ફિર બાત, ઉસકે બાદ મુલાકાત!’ અને ‘પ્રહાર’ ફિલ્મમાં ‘તું શેર હૈ, શેર કી તરહ દહાડ વર્ના કુત્તો કી તરહ ભોંકતે રહ જાઓગે!’ જેવા સંવાદો આજે પણ લોકોની યાદોમાં જીવંત છે.

નાના પાટેકરે ‘પરિંદા’, ‘પ્રહાર’, ‘તિરંગા’, ‘ક્રાંતિવીર’ અને ‘ખામોશી: ધ મ્યુઝિકલ’ જેવી શાનદાર ફિલ્મોમાં યાદગાર ભૂમિકાઓ ભજવી હતી. તેમના સંવાદોમાં ગુસ્સો હતો, દર્દ હતો, વ્યવસ્થા સામે સવાલ હતો અને સામાન્ય માણસની બેચેની પણ સ્પષ્ટ દેખાતી હતી. સિનેમા જગતમાં તેમના ઉત્કૃષ્ટ યોગદાન બદલ તેમને નેશનલ ફિલ્મ અવોર્ડ, ફિલ્મફેયર અવોર્ડ અને ‘પદ્મ શ્રી’ જેવા પ્રતિષ્ઠિત સન્માનથી નવાજવામાં આવ્યા હતા. અવોર્ડ્સ પોતાની જગ્યાએ છે, પરંતુ દર્શકોના દિલમાં કોઈ પણ કલાકારની અસલી જગ્યા તેના પાત્રો અને અવાજ બનાવતા હોય છે. આજે ભલે નાના પાટેકર શારીરિક રીતે આપણી વચ્ચે નથી, પરંતુ તેમની અનોખી શૈલી અને ગુંજતો અવાજ હંમેશાં અમર રહેશે.