વૈભવની તોફાની બેટિંગ સામે લખનઉ પરાસ્ત: રાજસ્થાન રોયલ્સે લખનઉને 7 વિકેટે હરાવ્યું

મિચેલ માર્શ માત્ર 4 રન માટે સદી ચૂક્યો, 96 રને આઉટ: લખનઉના 220 રનના વિશાળ સ્કોર સામે વૈભવના 10 છગ્ગા અને ધ્રુવ જુરેલની અણનમ ફિફ્ટીથી રાજસ્થાને 19.1 ઓવરમાં ટાર્ગેટ ચેઝ કર્યો

ખાસ-ખબર ન્યૂઝ નવી દિલ્હી, તા.20

IPL 2026માં મંગળવારે રમાયેલી રોમાંચક મેચમાં રાજસ્થાન રોયલ્સે લખનઉ સુપર જાયન્ટ્સને 7 વિકેટે હરાવ્યું છે. જયપુરના સવાઈ માનસિંહ સ્ટેડિયમમાં ટોસ હાર્યા બાદ પહેલી બેટિંગ કરવા ઉતરેલી લખનઉની ટીમે 20 ઓવરમાં 5 વિકેટ ગુમાવીને 220 રનનો વિશાળ સ્કોર બનાવ્યો હતો. જવાબમાં રાજસ્થાનની ટીમે 19.1 ઓવરમાં માત્ર 3 વિકેટ ગુમાવીને આ મસમોટો ટાર્ગેટ આસાનીથી ચેઝ કરી લીધો હતો. આ શાનદાર જીત સાથે રાજસ્થાનના 13 મેચોમાં 14 પોઇન્ટ્સ થઈ ગયા છે અને ટીમની પ્લેઑફમાં પહોંચવાની આશાઓ હજુ પણ જીવંત છે. બીજી તરફ, લખનઉની ટીમ પહેલા જ ટુર્નામેન્ટની પ્લેઑફની રેસમાંથી બહાર થઈ ચૂકી છે.રાજસ્થાનના ઓપનર વૈભવ સૂર્યવંશીએ મેદાનની ચારેય તરફ ચોગ્ગા-છગ્ગાની આતશબાજી કરતા માત્ર 38 બોલમાં 93 રનની મેચ વિનિંગ ઇનિંગ રમી હતી. તેની આ તોફાની ઇનિંગ્સમાં 7 ચોગ્ગા અને 10 ગગનચુંબી છગ્ગા સામેલ હતા. કેપ્ટન યશસ્વી જયસ્વાલે પણ ટીમને શાનદાર શરૂઆત અપાવતા 23 બોલમાં 43 રન ફટકાર્યા હતા. આ બંને ઓપનરો વચ્ચે પહેલી વિકેટ માટે 75 રનની ઝડપી ભાગીદારી થઈ હતી. ઓપનર્સ આઉટ થયા બાદ ધ્રુવ જુરેલે મધ્યક્રમમાં જવાબદારી સંભાળતા અણનમ 53 રન બનાવ્યા હતા અને ટીમને જીત મનગમતી મંઝિલ સુધી પહોંચાડી હતી. ડોનોવન ફરેરાએ પણ અંતમાં 10 બોલમાં 16 રનની ઉપયોગી ઇનિંગ રમી હતી. લખનઉની બોલિંગ સંપૂર્ણપણે નબળી જોવા મળી હતી, જેમાં આકાશ સિંહ સૌથી મોંઘો સાબિત થયો હતો અને તેણે 3 ઓવરમાં 54 રન લૂંટાવ્યા હતા. મોહસિન ખાન અને આકાશ સિંહને એક-એક વિકેટ મળી હતી. આ પહેલા પ્રથમ બેટિંગ કરતા લખનઉ માટે મિચેલ માર્શ સદીથી માત્ર 4 રન દૂર રહી ગયો હતો અને 57 બોલમાં 96 રન બનાવીને રન આઉટ થયો હતો. તેની આ ઇનિંગ્સમાં 11 ચોગ્ગા અને 5 છગ્ગા સામેલ હતા. બીજા ઓપનર જોશ ઇંગ્લિસે 29 બોલમાં ઝડપી 60 રન ફટકાર્યા હતા, જેમાં તેણે 7 ચોગ્ગા અને 3 છગ્ગા લગાવ્યા હતા. ઇંગ્લિશ અને માર્શ વચ્ચે પહેલી વિકેટ માટે 109 રનની મજબૂત ભાગીદારી થઈ હતી.

ઈંઙકમાં વૈભવ સૂર્યવંશીનો જલવો: ઓરેન્જ કેપ સાથે તૂટ્યા અનેક ઐતિહાસિક રેકોર્ડ

236.32ના સ્ટ્રાઈક રેટથી આન્દ્રે રસેલ અને 53 સિક્સર સાથે ક્રિસ ગેલ પછી બીજા નંબરે

વૈભવ સૂર્યવંશી આઈપીએલની વર્તમાન સીઝનમાં શાનદાર ફોર્મમાં જોવા મળી રહ્યો છે. તેણે માત્ર ઓરેન્જ કેપ પર જ કબજો કર્યો નથી, પરંતુ અનેક ઐતિહાસિક રેકોર્ડ પણ પોતાના નામે નોંધાવ્યા છે. વૈભવે અત્યાર સુધી 13 મેચોમાં 44.53ની સરેરાશથી કુલ 579 રન બનાવ્યા છે, જેના કારણે તે આ સીઝનમાં સૌથી વધુ રન બનાવનાર બેટ્સમેન બની ગયો છે. તેની આક્રમક બેટિંગે વિરોધી બોલરોને ભારે મુશ્કેલીમાં મૂકી દીધા છે. 500થી વધુ રન બનાવનાર બેટ્સમેનોમાં વૈભવનો સ્ટ્રાઈક રેટ 236.32 રહ્યો છે, જે ઈંઙક ઇતિહાસમાં અત્યાર સુધીનો સર્વોચ્ચ છે. તેણે 2019માં આન્દ્રે રસેલ દ્વારા બનાવાયેલા 204.8ના સ્ટ્રાઈક રેટનો રેકોર્ડ પણ તોડી નાખ્યો છે. વૈભવે આ સીઝનમાં અત્યાર સુધી 53 છગ્ગા ફટકાર્યા છે અને હવે તે એક સીઝનમાં સૌથી વધુ સિક્સર મારવાના મામલે બીજા સ્થાને પહોંચી ગયો છે. આ યાદીમાં માત્ર ક્રિસ ગેલ જ તેની આગળ છે, જેમણે 2012માં 59 સિક્સર ફટકારી હતી. એક જ ઇનિંગમાં 10 કે તેથી વધુ સિક્સર વૈભવે આ સીઝનમાં ત્રીજી વખત ફટકારી છે. આ મામલે હવે તેની આગળ માત્ર ક્રિસ ગેલ છે, જેમણે ચાર વખત આ સિદ્ધિ મેળવી હતી. વૈભવની આ ધમાકેદાર બેટિંગે તેને આ સીઝનનો સૌથી ચર્ચિત યુવા સ્ટાર બનાવી દીધો છે.