જૂન મહિનો પૂર્ણ થઈ ગયો છતાં મોરબી જિલ્લામાં માત્ર 7 ઈંચ જ વરસાદ!

 પ્રદુષિત મોરબીમાં ગ્લોબલ વોર્મિંગ અને ક્લાઈમેટ ચેન્જની અસરથી ચોમાસુ અનિયમિત

ખાસ-ખબર સંવાદદાતા
મોરબી જીલ્લામાં ઔદ્યોગિક વિકાસ ખૂબ તેજ ગતિએ થયો છે ત્યારે જિલ્લામાં રૂૂપિયા કમાવવાની દોડ એટલી હદે વધી ચુકી છે કે લોકોએ ઉધોગના વિકાસ માટે પર્યાવરણનું પતન કરવામાં કશું બાકી રાખ્યું નથી. મોરબી જિલ્લાની સ્થિતિ એટલી હદે ખરાબ થઈ ચુકી છે કે રાજ્યમાં સૌથી ઓછા ગ્રીન બેલ્ટ ધરાવતાં 5 જિલ્લામાં મોરબીનો સમાવેશ થઈ રહ્યો છે. રાજયના પ્રદુષિત શહેરની યાદીમાં પણ મોરબી ઉચ્ચ સ્થાને છે. મોરબી શહેરમાં વધતા પ્રદુષણની અસર વરસાદની સ્થિતિમાં પણ થઈ રહી છે ત્યારે મોરબી જિલ્લામાં ચોમાસુ પણ અનિયમિત થયું હોય તેમ લાગે છે. છેલ્લા કેટલાક વર્ષોથી ચોમાસાનો પ્રારંભ નબળો થઈ રહ્યો છે તો ક્યારેક એક સાથે મોટી માત્રામાં વરસાદ પડી જાય છે જેના પગલે પુરની ઘટના વધી છે. મોરબી જીલ્લામાં 15 જૂન પહેલા ચોમાસાનું આગમન થયું તે પહેલાં પ્રિ મોન્સૂન એક્ટિવિટીના પગલે છૂટાછવાયો વરસાદ થયો હતો. રાજ્યના અનેક જિલ્લામાં તેમાં પણ સૌરાષ્ટ્રના જિલ્લામાં નોંધપાત્ર વરસાદ થયો હતો જોકે ચોમાસુ વિધીવત બેસી ગયુ હોવા છતાં મેઘરાજા જાણે રિસાયા હોય તેમ ચોમાસાનો પ્રારંભ જ નબળો થયો હતો.

મોરબી જિલ્લામાં આ વર્ષે 30 જૂન સુધી પડેલા વરસાદની સ્થિતી જોઈએ તો કુલ 176 મીમી એટલે કે માત્ર 7 ઈંચ જ વરસાદ પડ્યો છે. આ પહેલાના વર્ષોમાં જૂન મહિનામાં થયેલા વરસાદની સ્થિતિ જોઈએ તો જિલ્લામાં જૂન 2021 માં 360 મીમી, જૂન 2020 માં 628 મીમી જયારે જૂન 2019 માં 196 મીમી જ વરસાદ થયો હતો. મોરબી જિલ્લામાં આ વર્ષે છેલ્લા 4 વર્ષ કરતા સૌથી ઓછો વરસાદ છે. 30 જૂન સુધીમાં તાલુકા મુજબ જોઈએ તો, મોરબી તાલુકામાં 29 મીમી, ટંકારામાં 70 મીમી, માળિયામાં 25 મીમી, વાંકાનેરમાં 32 મીમી જ્યારે હળવદ પંથકમાં માત્ર 20 મીમી વરસાદ નોંધાયો છે. ગત વર્ષની વાત કરીએ તો 2021 માં 30 જૂન સુધીમાં મોરબીમાં 36 મીમી, ટંકારામાં 61 મીમી, માળીયામાં 78 મીમી વાંકાનેરમાં 108 મીમી જયારે હળવદમાં 77 મીમી વરસાદ થયો હતો જયારે બે વર્ષની સરખામણી જોઈએ તો માળિયામાં 53 મિમીની ઘટ્ટ, વાંકાનેરમાં 76 મીમીની ઘટ્ટ તો હળવદમાં 57 મીમીની ઘટ્ટ સામે આવી હતી જયારે મોરબીમાં માત્ર 7 મીમી ઘટ્ટ નોંધાઈ છે એટલે કે આ વર્ષે ચોમાસનો પ્રારંભ છેલ્લા 4 વર્ષમાં સૌથી નબળો રહ્યો છે.

ચોમાસાના નબળા પ્રારંભના કારણે મોરબી જિલ્લામાં ચોમાસા પાકના વાવેતરને પણ અસર પહોંચી છે.

તાલુકા મુજબ 4 વર્ષમાં 30 જૂન સુધીનો વરસાદ (મીમી)
તાલુકા    2022 2021 2020 2019 સરેરાશ
ટંકારા       70   61    76      16   55.75
માળીયા    25    78    136     41  71.50
મોરબ      29    36     170   103  65.50
વાંકાનેર   32    108    110   103 88.25
હળવદ     20     77    136     09 60.5
કુલ      176      360   628   196 68.3