AAPના ઉમેદવાર નીલેશ માલમના ગોડાઉનમાંથી ઈંગ્લિશ દારૂ ઝડપાયો

ઓસા બેઠકના તાલુકા પંચાયત ઉમેદવારની પોલીસે ધરપકડ કરી, ગુનો દાખલ

ચૂંટણી ટાણે જ જૂનાગઢ ક્રાઇમ બ્રાન્ચ ઈંગ્લિશ દારૂના બુટલેગરો પર ત્રાટકી

જિલ્લામાં ત્રણ જગ્યા રેઇડ, 2090 બોટલ દારૂ સાથે બે ઝડપાયા, 4 ફરાર

ખાસ-ખબર ન્યૂઝ જૂનાગઢ, તા.15

જૂનાગઢ જિલ્લાના રાજકારણમાં ભારે ખળભળાટ મચી ગયો છે. ઓસા બેઠકના આમ આદમી પાર્ટીના તાલુકા પંચાયત ઉમેદવાર નીલેશ માલમના ગોડાઉન પર પોલીસે દરોડા પાડ્યા હતા. આ કાર્યવાહી દરમિયાન મોટા પ્રમાણમાં વિદેશી દારૂૂનો જથ્થો મળી આવતા પોલીસે ઉમેદવારની ધરપકડ કરી છે. ચૂંટણીના માહોલ વચ્ચે જ પક્ષના ઉમેદવાર આ રીતે વિવાદમાં સપડાતા અનેક સવાલો ઉભા થયા છે. પોલીસને મળેલી ચોક્કસ બાતમીના આધારે આ ઓપરેશન હાથ ધરવામાં આવ્યું હતું. નીલેશ માલમના ગોડાઉનમાંથી વિદેશી દારૂૂની કુલ 96 બોટલો મળી આવી છે. પોલીસે દારૂૂના આ જથ્થા સાથે મોબાઈલ ફોન અને અન્ય સાધન-સામગ્રી સહિત કુલ 1 લાખથી વધુની કિંમતનો મુદ્દામાલ કબજે કર્યો છે. પોલીસ દ્વારા તમામ માલ જપ્ત કરીને કાયદેસરની કાર્યવાહી તેજ કરવામાં આવી છે. ચૂંટણીના ટાણે જ આમ આદમી પાર્ટીના ઉમેદવારના ગોડાઉનમાંથી દારૂૂ ઝડપાવવો એ વિરોધ પક્ષો માટે મોટો મુદ્દો બની ગયો છે. જૂનાગઢના રાજકારણમાં આ ઘટનાને લઈ ભારે ચર્ચાઓ જાગી છે. એક તરફ પક્ષ ભ્રષ્ટાચાર મુક્ત અને નૈતિક રાજનીતિની વાતો કરે છે, ત્યારે બીજી તરફ તેના જ ઉમેદવાર દારૂૂના ગુનામાં પકડાયા હોવાથી પક્ષની છબી ખરડાઈ છે. આગામી દિવસોમાં આ મુદ્દો ચૂંટણી પ્રચારમાં પણ મુખ્ય કેન્દ્ર બની શકે છે. જૂનાગઢ રેન્જ આઇજી રાજેન્દ્રસિંહ ચુડાસમા અને પોલીસ અધિક્ષક સુબોધ ઓડેદરાની કડક સૂચના અને માર્ગદર્શન હેઠળ, જૂનાગઢ જિલ્લામાં નશાકારક પદાર્થો અને દારૂની ગેરકાયદેસર પ્રવૃત્તિઓને નેસ્તનાબૂદ કરવા માટે ક્રાઇમ બ્રાન્ચ દ્વારા એક આક્રમક અભિયાન હાથ ધરવામાં આવ્યું છે. આ અભિયાનના પરિણામે માંગરોળ અને કેશોદ પંથકમાં દારૂના કાળા કારોબારનો પર્દાફાશ કરી લાખો રૂપિયાનો મુદ્દામાલ જપ્ત કરવામાં આવ્યો છે, જેણે બૂટલેગરોમાં ભારે ફફડાટ ફેલાવી દીધો છે. ક્રાઇમ બ્રાન્ચને મળેલી બાતમીના આધારે માંગરોળ તાલુકાના ઓસા (ઘેડ) ગામની સીમમાં એક ગોડાઉન પર દરોડા પાડવામાં આવ્યા હતા. તપાસ દરમિયાન ચોંકાવનારી વિગત સામે આવી હતી કે આ ગોડાઉન આમ આદમી પાર્ટીના તાલુકા પંચાયત માંગરોળના ઓસા બેઠકના ઉમેદવાર નિલેશભાઈ હરદાસભાઈ માલમના કબજાનું હતું. પોલીસની સઘન તપાસમાં અહીંથી ભારતીય બનાવટના વિદેશી દારૂૂની 96 બોટલ મળી આવી હતી, જેની અંદાજિત કિંમત રૂ. 96,000 થાય છે. કુલ રૂ. 1,06,480ના મુદ્દામાલ સાથે આરોપીને પકડી પાડવામાં આવ્યો છે. આરોપી નિલેશ માલમનો ગુનાહિત ઇતિહાસ તપાસતા પોલીસ પણ ચોંકી ઉઠી હતી. તેની સામે શીલ પોલીસ સ્ટેશનમાં જુગારધારા અને મારામારીના 6 ગુના, કેશોદમાં 1 જુગારનો ગુનો અને માંગરોળમાં બી.એન.એસ. તથા જી.પી. એક્ટ હેઠળ ગંભીર ગુનાઓ નોંધાયેલા છે. આટલી વાર ગુનાઓ કર્યા હોવા છતાં તેની નશાના કારોબારમાં સંડોવણી સ્પષ્ટ કરે છે કે તે કેટલો કુખ્યાત છે. ક્રાઇમ બ્રાન્ચના પો.ઇન્સ. કૃણાલ પટેલ અને તેમની ટીમ સતત પેટ્રોલીંગમાં હતી, ત્યારે તેમને ચોક્કસ બાતમી મળી હતી કે કેશોદના અજાબ રોડ પરથી એક સેન્ટ્રો કાર જીજે 01 એચજી 5182 વિદેશી દારૂ ભરીને પસાર થવાની છે. આ બાતમીના આધારે ટીમે વોચ ગોઠવી કારને ઝડપી પાડી હતી. કારની તપાસ કરતા તેમાંથી અલગ-અલગ બ્રાન્ડની કુલ 1,032 વિદેશી દારૂની બોટલ મળી આવી હતી, જેની કિંમત રૂૂ. 3,24,000 જેટલી હતી. પોલીસે ઘટનાસ્થળેથી કારચાલક અભીજીત કનુભાઈ દયાતરની અટકાયત કરી હતી. પૂછપરછ દરમિયાન આ દારૂનો જથ્થો મંગાવનાર કેશોદના રાજેશ ઉર્ફે રાજુ રાણાભાઈ બાબરીયા અને બાવન ધના ગરચરના નામ ખુલ્યા હતા, જે હાલ પોલીસની પકડથી દૂર છે. આ કેસમાં દારૂ, કાર અને મોબાઈલ મળીને કુલ રૂ 4,24,000નો મુદ્દામાલ જપ્ત કરવામાં આવ્યો છે. ત્રીજી મોટી કાર્યવાહી કેશોદની પ્રજાપતિ સોસાયટીમાં કરવામાં આવી હતી. પોલીસને માહિતી મળી હતી કે રમેશ ઉર્ફે રામો જેતા ગરચર અને રવિ ભુપતભાઈ રબારી પોતાના રહેણાંક મકાનમાં ભાગીદારીમાં વિદેશી દારૂનું કટીંગ કરી રહ્યા છે. ક્રાઇમ બ્રાન્ચની ટીમે ત્વરિત દરોડો પાડીને મકાનમાંથી 960 વિદેશી દારૂની બોટલ કબ્જે કરી હતી. જોકે, પોલીસને આવતા જોઈ બંને મુખ્ય આરોપીઓ ફરાર થઈ ગયા હતા. પોલીસે આ સ્થળેથી દારૂ ઉપરાંત એક રિક્ષા અને એક મોટરસાયકલ પણ કબ્જે કરી છે. આ કાર્યવાહીમાં કુલ રૂ. 4,25,200નો મુદ્દામાલ જપ્ત કરી પોલીસે ફરાર આરોપીઓને પકડવા ચક્રો ગતિમાન કર્યા છે. જૂનાગઢ ક્રાઇમ બ્રાન્ચની આ ત્રણેય સફળ કાર્યવાહી એ વાતનો સંકેત આપે છે કે જિલ્લામાં ગેરકાયદેસર પ્રવૃત્તિઓ ચલાવનારાઓ માટે કોઈ સ્થાન નથી. પોલીસ દ્વારા જે રીતે સઘન વોચ ગોઠવીને અને ટેકનિકલ સર્વેલન્સ દ્વારા આ બૂટલેગરો સુધી પહોંચવામાં આવ્યું છે, તે પોલીસની સજ્જતા દર્શાવે છે. નાયબ પોલીસ મહાનિરીક્ષક રાજેન્દ્રસિંહ ચુડાસમા અને પોલીસ અધિક્ષક સુબોધ ઓડેદરાએ સ્પષ્ટ શબ્દોમાં જણાવ્યું છે કે, જિલ્લામાં દારૂૂ, જુગાર કે અન્ય કોઈ પણ અસામાજિક પ્રવૃત્તિ કરનારને છોડવામાં આવશે નહીં. આગામી સમયમાં પણ આ પ્રકારના દરોડા યથાવત રહેશે. પોલીસે નાગરિકોને પણ અપીલ કરી છે કે તેઓ આવી ગેરકાયદેસર પ્રવૃત્તિઓ વિશે પોલીસને જાણ કરે જેથી સમાજમાં સ્વસ્થ વાતાવરણ જાળવી શકાય. જૂનાગઢ જિલ્લા પોલીસે જે રીતે એક પછી એક સફળ ઓપરેશન કરીને લાખોનો મુદ્દામાલ જપ્ત કર્યો છે, તેનાથી બૂટલેગર આલમમાં ભારે ગભરાટ ફેલાયો છે.