કામ પ્રત્યેનું સમર્પણ

જ્યારે વ્યક્તિ પોતાના કામમાં લીન હોય છે, ત્યારે તેને આસપાસની કોઈ વસ્તુનું ભાન રહેતું નથી

એકવાર આઇન્સ્ટાઇન પોતાની લેબોરેટરીમાં કામ કરવા માટે વહેલી સવારના ગયા તે જમવા માટે બહાર જ ન આવ્યા. સાંજ પડવા આવી, આથી આઇન્સ્ટાઇનનો એક આસિસ્ટન્ટ લેબોરેટરીમાં ગયો અને જોયું તો આઇન્સ્ટાઇન પોતાના કામમાં ખૂબ જ વ્યસ્ત હતા. આસિસ્ટન્ટે જમવાનું પૂછ્યું તો આઇન્સ્ટાઇને ના પાડી.
પેલો આસિસ્ટન્ટ આઇન્સ્ટાઇનનું ખૂબ જ ધ્યાન રાખતો હતો, એટલે એણે એક કપ કોફી તૈયાર કરી અને એ કોફીનો કપ લઈને આઇન્સ્ટાઇન જે ટેબલ પર કામ કરતા હતા ત્યાં ગયો; અને કોફીનો કપ ટેબલ પર મૂકીને કહ્યું, તમે સવારથી કંઈ જ જમ્યા નથી આટલી કોફી પી લેજો.
થોડા સમય પછી પેલો આસિસ્ટન્ટ કોફીનો ખાલી કપ લેવા આવ્યો અને ટેબલ પર નજર કરી તો કોફીનો કપ એમ જ ભરેલો પડ્યો હતો. આઇન્સ્ટાઇને એક ઘૂંટડો પણ કોફી પીધી ન હતી. આથી પેલો આસિસ્ટન્ટ થોડો ખીજાયો અને કહ્યું, તમારા માટે કોફીનો એક કપ તૈયાર કરીને તમારા ટેબલ સુધી મૂક્યો અને તમે એ પણ પીધી નહીં? કોફી તો તમે કામ કરતા-કરતા પણ પી શક્યા હોત !
આઇન્સ્ટાઇને ટેબલ પર જોયું તો કોફીનો કપ આખો એમ જ ભરેલો હતો. આઇન્સ્ટાઇન પોતાના માથા પર હાથ ફેરવવા લાગ્યા અને કંઈક વિચારવા લાગ્યા. પેલા આસિસ્ટન્ટે પૂછ્યું, શું થયું ? ત્યારે આઇન્સ્ટાઇને કહ્યું, મેં કંઈક પીધું તો ખરું. જો કોફીનો કપ એમ જ ભરેલો છે, તો મેં શું પીધું એ વિચારું છું.
આઇન્સ્ટાઇનના કાળા હોઠ જોઈને આસિસ્ટન્ટને તુરંત જ ખ્યાલ આવી ગયો અને ટેબલ પર જોતા જ એ હસવા લાગ્યો. આઇન્સ્ટાઇને પૂછ્યું, કેમ હસે છે ? ત્યારે આસિસ્ટન્ટ બોલ્યો, તમે ટેબલ પર કોફીના કપની બાજુમાં પડેલો પેનમાં પૂરવાની શાહીનો કપ ઉપાડીને તે પી ગયા છો.
આઇન્સ્ટાઇન પોતાના કામમાં એવા મશગૂલ હતા કે એ કોફી પીવે છે કે શાહી પીવે છે; એ પણ એને ખબર નહોતી. કામ પ્રત્યેનું કેવું સમર્પણ !
કાશ આપણે પણ અભ્યાસ કે આપણા કામ પ્રત્યે આવા જ સમર્પિત થઈ શકીએ.

મારી સફળતાનું રહસ્ય એ હતું કે હું મારા કામ કરવાના ખંડમાં કદી ઘડિયાળ રાખતો ન હતો.
– એડિસન