308 પૈડાં ધરાવતી 200 ટન વજનની મહાકાય ટ્રક વાઈરલ

ટ્રકમાં ઇન્ડસ્ટ્રીયલ વેક્યુમ બોઇલર લાદેલું છે, પુલ અને વીજળીના તાર હટાવીને આગળ વધી રહી છે ટ્રક

મશીન બેલ્જિયમથી ઓડિશાના પારાદીપ બંદર પર આવ્યું, એશિયાનો પ્રથમ બાયોપ્લાસ્ટિક પ્લાન્ટ બનશે

એક ટ્રકમાં કેટલા પૈડાં હોય? ૧૦, ૧૪ કે ૨૦ પૈડાં? પણ જો કોઈ એમ કહે કે ટ્રકમાં ૩૦૮ પૈડાં પણ હોઈ શકે, તો તમે માનો? માન્યામાં ન આવે એવું એક દૃશ્ય હાલમાં ઉત્તરભારતમાં જોવા મળી રહ્યું છે. પૂરા ૩૦૮ પૈડાં ધરાવતી એક વિશાળ ટ્રક હાલમાં ઉત્તરપ્રદેશના રસ્તાઓ પર ચાલી રહી છે અને લોકોના આશ્ચર્ય અને આકર્ષણનું કેન્દ્ર બની રહી છે. સોશિયલ મીડિયા પર વાયરલ થઈ રહેલી આ મહાકાય ટ્રક માત્ર એક વાહન નથી પરંતુ એન્જિનિયરિંગ અને ટેક્નોલોજીનો એક અદ્ભુત નમૂનો છે. આ ટ્રકમાં ૨૦૦ ટન વજનનું એક વિશાળ ઇન્ડસ્ટ્રીયલ વેક્યુમ બોઈલર છે. આ મશીન લગભગ ૧૦૦ ફૂટ લાંબુ, ૭મીટર પહોળું અને ૮ મીટર ઊંચું છે. આ બોઈલર એપ્રિલ મહિનામાં બેલ્જિયમથી દરિયાઈ માર્ગે નીકળ્યું હતું અને ઓડિશાના પારાદીપ બંદર પર પહોંચ્યું હતું. ત્યાંથી તે રોડ માર્ગે ઝારખંડ અને બિહાર થઈને હાલમાં ઉત્તર પ્રદેશ પહોંચ્યું છે અને લખીમપુર ખેરીમાં આવેલી બલરામપુર સુગર મિલ (કુંભી યુનિટ) જઈ રહ્યું છે. આ બોઈલરની મદદથી ત્યાં એશિયાનો પ્રથમ બાયોપ્લાસ્ટિક (પોલિલેક્ટિક એસિડ PLA) પ્લાન્ટ બનાવવામાં આવી રહ્યો છે. આ પ્લાન્ટમાં શેરડીમાંથી ઈથેનોલ અને ઈથેનોલમાંથી પર્યાવરણને અનુકૂળ એવું બાયોપ્લાસ્ટિક બનશે. આ મશીન એક જ સળંગ ભાગમાં બનાવેલું છે, એટલે કે તેને તોડીને અથવા અલગ-અલગ ભાગોમાં વહેંચીને લાવી શકાય તેમ નથી.

આ કોઈ સામાન્ય ટ્રક નથી, પરંતુ વોલ્વો કંપનીનું સૌથી શક્તિશાળી ‘મલ્ટી-એક્સલ મોડયુલર હાઈડ્રોલિક ટ્રેલર’ છે. જો ૨૦૦ ટન જેટલું વજન થોડા જ પૈડાં પર મૂકવામાં આવે, તો રસ્તા પર તિરાડો પડી જાય અને પુલ તૂટી જાય. ભારત સરકારના રોડ ટ્રાન્સપોર્ટ અને હાઇવે મંત્રાલયના નિયમ મુજબ, આવા ટ્રેલરમાં એક એક્સલ પર ૧૮ ટનથી વધુ વજન ન હોવું જોઈએ. ૨૦૦ ટન વજનને સમાન રીતે વહેંચવા માટે આ ટ્રકમાં ઘણા બધા એક્સલ લગાવવામાં આવ્યા છે અને દરેક એક્સલમાં ઓછામાં ઓછા ૪ પૈડાં છે. આથી કુલ ૩૦૮ પૈડાંનો ઉપયોગ કરવામાં આવ્યો છે. આ પૈડાં હાઇડ્રોલિક સસ્પેન્શન સિસ્ટમ દ્વારા ભારને બેલેન્સ કરે છે, જેથી રસ્તાઓને કોઈ નુકસાન ન થાય. મશીન એટલું મોટું છે કે તેને ટ્રેનમાં ફીટ કરી શકાય તેમ નથી. વળી, બંદરથી સીધી ફેક્ટરી સુધી કોઈ રેલવે લાઇન પણ નથી. ભારત સરકાર યોગ્ય પરવાનગી સાથે આવા મોટા આકારના ‘ઓવર-ડાયમેન્શનલ કાર્ગો’ને રસ્તા પર લઈ જવાની મંજૂરી આપે છે. આથી જ આ મહાકાય ટ્રકનો સહારો લેવામાં આવ્યો છે. આ ટ્રકની સફર ખૂબ જ પડકારજનક છે. તેની સાથે ૬૪થી વધુ એન્જિનિયરો અને કામદારોની ટીમ, ૨ મોટી ક્રેન અને અન્ય ર ખેંચવા વાળા ટ્રેલર ચાલી રહ્યા છે. આટલા વજન સાથે ટ્રક દિવસમાં માત્ર ૧૦ થી ૨૦ કિલોમીટર જ આગળ વધી શકે છે. રસ્તામાં આવતા વીજળીના તાર અને પુલને હટાવવા પડે છે. હાલમાં વારાણસીના દાફી ટોલ પ્લાઝા પાસે રસ્તો પહોળો કરવામાં આવ્યો છે.

ટ્રકમાં મશીન પહોંચાડવાનો ખર્ચ આશરે 15-20 કરોડ રૂપિયા થશે!
આ સફરનો ખર્ચ પણ ચોંકાવી દે એવો છે. આ ટ્રક દરરોજ આશરે ૨૦૦ લિટર ડીઝલ વાપરે છે અને અત્યાર સુધીમાં ૨ કરોડ રૂપિયાનું ડીઝલ વાપરી ચૂકી છે. પારાદીપ બંદરથી લખીમપુર સુધીના આખા ઓપરેશનનો કુલ ખર્ચ ૧૫થી ૨૦ કરોડ રૂપિયાની વચ્ચે થવાનો અંદાજ છે. લગભગ ૧૪૦૦ કિલોમીટર લાંબી આ યાત્રા ભારતના ‘હેવી-હોલ એન્જિનિયરિંગ’નો એક ઉત્તમ પુરાવો છે. આ કામ ઉંખ ઇફશ ગ્રુપ દ્વારા કરવામાં આવી રહ્યું છે, જેઓ આવા મોટા ઓપરેશનના નિષ્ણાત છે. ૬ મહિના પછી પણ આ મશીન હજુ રસ્તામાં જ છે. એવું માનવામાં આવે છે કે તે નવરાત્રિ પહેલા તેના ગંતવ્ય સ્થાને પહોંચી જશે. જે પણ શહેરમાંથી આ ટ્રક પસાર થાય છે, ત્યાં લોકોની ભીડ જમા થઈ જાય છે. એન્જિનિયરિંગના આ કમાલ સાથે લોકો સેલ્ફી લઈ રહ્યા છે અને સોશિયલ મીડિયા પર વીડિયો પોસ્ટ કરી રહ્યા છે, જે વાયરલ થઈ રહ્યા છે.