કમિશનરના અંદાજપત્રમાં પાણી અને ડ્રેનેજ વેરામાં તોતિંગ વધારાની દરખાસ્ત

જૂનાગઢ મનપાનું વર્ષ 2026-27નું રૂ. 1501 કરોડનું બજેટ રજૂ

1501 કરોડનું બજેટ કમિશનરે સ્ટેન્ડિંગ કમિટીને સુપ્રત કર્યું

કુલ આવક: 1499.08 કરોડ (રેવન્યુ: 339.33 કરોડ, કેપિટલ: 1159.75 કરોડ

ખાસ-ખબર ન્યૂઝ જૂનાગઢ, તા.3

મનપા કમિશનરે 1501 કરોડનું બજેટ સ્થાયી સમિતીને સુપ્રત કર્યું હતું. જેમાં પાણી વેરામાં ત્રણ ગણો અને ડ્રેનેજ ચાર્જમાં બાર ગણો વધારો સુચવાયો છે. આ ઉપરાંત અત્યાસુધી નિ:શુલ્ક રહેલા ભૂગર્ભજળ વપરાશ પેટે 300 રૂપિયા વસુલવા અને દિવાબતી કર મિલ્કત દીઠ રૂ. 100 વધારવા ભલામણ કરવામાં આવી છે. જૂનાગઢ મનપા વિસ્તારમાં પ્રાથમિક સુવિધા મળતી ન હોવાની ફરિયાદો છે ત્યારે વેરામાં વધારો કરવાનું સૂચન થયું છે. હવે સ્થાયી સમિતી દ્વારા શુ નિર્ણય લેવામાં આવે છે એ જોવું રહ્યું.
જૂનાગઢ મનપાનું વર્ષ 2026-27નું 1501 કરોડનું બજેટ તૈયાર કરવામાં આવ્યું છે. કમિશનર તેજસ પરમાર દ્વારા કરોડનું બજેટ સ્થાયી સમિતીના ચેરપર્સન પલ્લવીબેન ઠાકરને સોંપવામાં આવ્યું હતું. જેમાં રેવન્યુ આવક 339.33 અને કેપિટલ 1159,75 કરોડ મળી કુલ આવક 1499,08 કરોડ જ્યારે રેવન્યુ ખર્ચ 339,25 અને કેપિટલ ખર્ચ 1159.75 કરોડ મળી કુલ 1499,40 કરોડનો ખર્ચ અંદાજવામાં આવ્યો છે. કમિશનર દ્વારા સુવિધા ઉપલબ્ધ કરવા માટે વેરામાં વધારો જરૂરી છે એવું કારણ આપી હાલ જે પાણી વેરો 1200 રૂપિયા છે તેમાં રહેણાંક અને બિન રહેણાંક મિલકતના 3500 રૂપિયા કરવા, ટ્રેનેજ ચાર્જ 100-150 વસુલવામાં આવે છે તે રહેણાંક માટે 1250 અને બિનરહેણાંક માટે 2500 કરવા સૂચન કરવામાં આવ્યું છે. જયારે ભૂગર્ભ જળ વપરાશ અત્યારે શૂન્ય છે હવેથી 300 રૂપિયા વસુલ કરવા જયારે હાલ દિવાબતી કર રહેણાંક મિલ્કત માટે 200 છે તેના 300 કરવા અને બિન રહેણાંક મિલ્કતદીઠ 500 રૂપીયા કરવા સૂચન કર્યું છે.
મનપા દ્વારા રહેણાંક અને બિન રહેણાંક મિલ્કતના દર યથાવત રાખવામાં આવ્યા છે પરંતુ ફેક્ટર મુજબ પાંચ ટકાનો વધારો સૂચવવામાં આવ્યો છે. આ ઉપરાંત મિલ્કત વેરામાં 2027-28થી દરવર્ષે ફેક્ટર રેટમાં એક ટકાનો વધારો કરવા ભલામણ કરવામાં આવી છે. જૂનાગઢ મનપા દ્વારા દર વર્ષે કરોડો રૂપિયાની ગ્રાન્ટ ખર્ચ કરવામાં આવે છે પરંતુ લોકોને પ્રાથમિક સુવિધા ઉપલબ્ધ થતી નથી રસ્તા તોડવામાં આવે ત્યારબાદ પાણી, ગટર, ગેસ લાઈન નાખવામાં આવે છે.હજુ માંડ એક બે માસ થાય તો ફરી રસ્તા તોડવામાં આવે છે. પૈસાનું આંધણ થાય છે અને લોકોને તેનો કોઈ ફાયદો મળતો નથી.ત્યારે વેરા વધારવામાં સૂચન કરતી મનપા લોકોને સુવિધા મળે એ દિશામાં પણ નક્કર કામગીરી કરે એવી માંગ ઉઠી છે.

મનપાની વેરા સ્વરૂપે આવક 179 કરોડ અને ખર્ચ 231 કરોડનો !

જૂનાગઢ મહાપાલિકાને સામાન્ય કર દિવાબતી કર પેટે 80 કરોડ,યુઝર ચાર્જ 22 કરોડ, પાણી વેરો 20 કરોડ, ઈમ્પેકટ ફી12 કરોડ, ગટર જોડાણ પેટે 10 કરોડ, સફાઈ વેરા પેટે 8 અને ડ્રેનેજ ફી સ્વરૂપે 2 કરોડ મળી કુલ 179 કરોડની આવક થાય છે. જ્યારે પગાર ખર્ચ 87 કરોડ, ગ્રાન્ટ મેચિંગ શેર 26 કરોડ, ડોર ટુ ડોર કલેક્શન 20 કરોડ, વિજબીલ 12 કરોડ ઓપરેશન એન્ડ મેઇન્ટેનન્સ ખર્ચ 50 કરોડ વોટર વર્કસ સરકારી બિલ 17 કરોડ અને સ્વ ભંડોળ પ્રોજેકટ પેટે 19 કરોડ મળી કુલ 231 કરોડનો ખર્ચ થાય છે.વધારાની રકમ માટે ગ્રાન્ટ પર જ મદાર રાખવામાં આવે છે.

સૂચિત બજેટમાં મોટાભાગની બાબતો રિપીટ

1, પ્રદુષણ ઘટાડવા 50 ઇ બસથી પબ્લિક ટ્રાન્સપોર્ટ શરૂ કરવા આયોજન-જે વષીથી વાતો થાય છે.
2, વોટર રિચાર્જ અને જાહેર સહભાગિતાને પ્રોત્સાહન માટે કામગીરી-હાલ થઈ રહી છે.
3, એસ.ટી.પી.માંથી નીકળતું વેસ્ટ વોટર રી યુઝ કરવા પ્રોજેકટ હાથ ધરાશે. “શહેર વિસ્તારની શાળાઓમાં સેનેટરી વેન્ડીંગ મશીન માટે પાયલોટ પ્રોજેક્ટ શરૂ કરવામાં આવશે”
4, ચોબારી ગામ નજીક ટીપી અનામત પ્લોટમાં 14 કરોડના ખર્ચે આધુનિક ગૌશાળા કમ હોસ્પિટલ બનશે જ્યાં એક હજાર ગૌવંશ રાખી શકાશે. સાબલપુર લોલ નદી, કાળવા બ્રિજ,રાયજીબાગ બ્રિજ પર હેરિટેજ, ધામક અને વાઈલ્ડ લાઈફ થીમ આધારિત બ્યુટીફીકેશન કરવાનો દાવો
5, તમામ સર્કલનું ડેવલપમેન્ટ થીમ આધારિત કરી બ્યુટીફીકેશન કરાશે.
6, મુખ્ય રોડ અને જાહેર સ્થળોએ પાંચ કરોડના ખર્ચે સ્માર્ટ પબ્લિક ટોઇલેટ બનાવવાનું આયોજન. જે અગાઉ પણ થઈ ગયું છે.