વિકાસકાર્યોના બણગાં ફૂંકતા સદસ્યો પ્રજાલક્ષી કામોમાં સદંતર નિષ્ફળ !
સત્તા પક્ષને ઘેરવાના વિપક્ષના બહોળા પ્રયાસ !
ખાસ-ખબર સંવાદદાતા
મોરબી જિલ્લા પંચાયત કચેરી ખાતે જિલ્લા પંચાયત પ્રમુખ ચંદુભાઈ શિહોરા અને જિલ્લા વિકાસ અધિકારી પરાગ ભગદેવના અધ્યક્ષસ્થાને સામાન્ય સભા મળી હતી જેમાં વિવિધ વિકાસલક્ષી એજન્ડાઓને બહાલી આપવામાં આવી હતી તો વિપક્ષના સભ્યોએ તળાવો ઉંડા ઉતારવા અને સિંચાઈના મુદે બઘડાટી બોલાવી હતી જયારે ગત સભાને બહાલી આપવામાં આવી હતી. આ ઉપરાંત ગુજરાત પંચાયત અધિનિયમ 1993 અંતર્ગત બિન ખેતી થયેલ જમીન પર લેવામાં આવતા દર દરેક તાલુકામાં એકસમાન રાખવાના ઠરાવને મંજૂરી આપવામાં આવી હતી તેમજ સ્ટેમ્પ ડ્યુટી ગ્રાન્ટમાં મંજુર થયેલ કામોની મુદત વધારવાની મંજુરી આપવામાં આવી હતી.
- Advertisement -
મોરબી જિલ્લા પંચાયતની સામાન્ય સભામાં અગાઉની અપેક્ષા મુજબ સિંચાઈ, શિક્ષણ, આરોગ્ય, પશુપાલન અને આઈસીડીએસ સહિતના અલગ અલગ પ્રશ્નોને લઈ વિરોધ પક્ષે સતા પક્ષને ઘેરવા પ્રયાસ કર્યો હતો અને જિલ્લામાં છેલ્લા ચાર વર્ષથી 334 જેટલા ચેકડેમ રીપેર કરવા અને તળાવ ઉંડા કરવા સહિત નાની સિંચાઈના કામ બાકી હોવાથી ખેડૂતોને સિંચાઈનું પાણી મળતું ન હોવાનો પ્રશ્ન વિપક્ષી સભ્ય ભૂપતભાઈ ગોધાણીએ ઉઠાવ્યો હતો. આ ઉપરાંત આરોગ્ય બાબતમાં પણ રાજ્ય સરકાર અને જિલ્લા પંચાયતના હોદેદારોની અણઆવડતથી પીએચસી-સીએચસી મેડીકલ ઓફિસરની જગ્યા ખાલી છે તેમજ જિલ્લા પંચાયતમાં આઉટ સોર્સથી કામ કરતા કર્મચારીઓનું પણ મોટા પાયે શોષણ થતું હોય છે જેની અસર કામગીરીમાં થતી હોય છે જેથી જિલ્લા પંચાયતમાં કામ કરતા કર્મચારીઓને પગારમાં થતું શોષણ અટકાવવા પણ સરકારમાં રજૂઆત કરવા મોરબી જિલ્લા પંચાયતના કોંગી સભ્યોએ માંગણી કરી હતી તેમજ પશુઓના રોગચાળાને અટકાવવા માટે થતા રસીકરણના અભાવ સહિતના મુદ્દે ચર્ચાઓ કરવામાં આવી હતી.
નાની સિંચાઈ યોજનામાં થયેલાં કૌભાંડનું ભુત ફરી ધૂણ્યું !
મોરબી જિલ્લામાં તત્કાલીન કાર્યપાલક ઈજનેર સી ડી કાનાણીના સમયમાં નાની સિંચાઈ યોજનામાં કૌભાંડ થયું હતું જેથી સામાન્ય સભામાં આરોગ્ય સમિતિના ચેરમેને કોંગ્રેસના શાસનમાં કૌભાંડ થયું હતું જેનું પરિણામ ખેડૂતો ભોગવે છે તેવો આક્ષેપ કરતા કોગ્રેસના સભ્યોએ જણાવ્યું હતું કે, તમે જે કૌભાડમાં ધારાસભ્ય પરસોતમ સાબરીયા સામે આક્ષેપ કર્યા અને દોઢથી બે મહિના જેલમાં રાખ્યા હતા જો તેઓ કૌભાંડમાં સંડોવાયેલ હતા તો તેમને જેલમાં નાખી દેવા જોઈતા હતા, તમે તો ભાજપમાં લાવી ટીકીટ આપીને પાછા ધારાસભ્ય બનાવી દીધા તેમજ ભૂતકાળમાં જિલ્લા પંચાયતના અધિકારીઓ અને ભાજપના કાર્યકરો સહીતનાએ સાથે મળી કૌભાંડ કર્યા અને ખેડૂતો છેલ્લા ચાર વર્ષથી ભોગવી રહ્યા છે.
મોરબી જિલ્લાની 19 શાળાઓમાં માત્ર એક જ શિક્ષક !
મોરબી જિલ્લાની સરકારી શાળાઓમાં શિક્ષકોની ઘટનો મુદો પણ સામાન્ય સભામાં ગુંજ્યો હતો જે મામલે વિપક્ષી સભ્ય ભૂપત ગોધાણીએ જણાવ્યું હતું કે, મોરબી જિલ્લાની 19 શાળાઓમાં માત્ર એક જ શિક્ષક છે અને 251 શિક્ષકોની ઘટ છે ઉપરાંત લવણપુર અને રાજપર (કું) ની બે શાળાઓ બંધ કરવામાં આવી છે જેના કારણે બાળકોના અભ્યાસમાં અસર પડી છે જેથી શિક્ષકોની ઘટ તાકીદે પૂર્ણ કરવા અને ભરતી કરવા માંગ ઉઠાવવામાં આવી હતી.
- Advertisement -
પ્લાસ્ટિકના ડ્રમ આપવાની સરકારી યોજનામાં ખેડૂતો સાથે મજાક !
ખેડૂતોને પ્લાસ્ટિકના ડ્રમ આપવાની સરકાર દ્વારા યોજના બહાર પાડવામાં આવી છે. આ યોજના ચાલુ થઈ ત્યારથી અત્યાર સુધીમાં મોરબી જિલ્લામાંથી 31788 અરજીઓ મળેલ છે જેમાંથી આ યોજનાનો લાભ મેળવવા પાત્ર 31684 માંથી આજ સુધી એક પણ ખેડૂતને આ યોજનાનો લાભ મળ્યો નથી અને ખેડૂતો સાથે મજાક થઈ રહી હોય તેવું લાગી રહ્યું હોવાનો કોંગ્રેસે આક્ષેપ કર્યો છે.
વિપક્ષી સદસ્યની આત્મવિલોપનની ચીમકી !
વાંકાનેરના ઠીકરિયાળા ગામે તળાવની પાળ બાંધવાના કામમાં વિલંબ થશે તો ખેડૂતોની જમીન ધોવાશે અને જો આવું થશે તો વિપક્ષના જિલ્લા પંચાયત સદસ્ય નવઘણભાઈ મેઘાણી દ્વારા આત્મવિલોપન કરવાની ચીમકી આપવામાં આવી હતી.
