પ્રસ્થાન:
ચોપડા અને હોશિયારી! આના કરતાં પણ મહત્વની વસ્તુઓ છે દોસ્તી અને બહાદુરી
– હરમાયોની ગ્રેન્જર
હેરી પોટરની મજા એ છે કે તેમાં ઘણી બધી જગ્યાએ રોલિંગે બહુ મસ્ત ફિલોસોફી મૂકી છે પણ તે પામવા માટે મારા માટે મૂળ પુસ્તકો વાંચવા વધુ યોગ્ય રહે. ફિલ્મોમાં અવનવા કેરેક્ટર્સની ઝાકમઝાળ વચ્ચે દર્શક કદાચ રોલિંગ બેને મૂકેલી નાનીનાની વાતો ચૂકી જાય જ્યારે પુસ્તકોમાં તે વીજળીની જેમ અચાનક ચમકારો કરી દે.
યરુવમળઈં ઇંળ ડક્ષૃઞ
હેરી પોટરના ભાગ નાનપણમાં હિન્દીમાં વાંચ્યા હતા તેમાં પહેલા ભાગમાં આ અરીસાનો ઉલ્લેખ આવતો. અહીં વાત થાય છે એક અરીસાની. તે અરીસો માનવીને તેની અતૃપ્ત ઈચ્છા બતાવે છે. હેરી તે અરીસાની સામે જાય તો તેને તેમાં પોતાની સાથે માતાપિતા દેખાય છે. પછી તો તેને તે અરીસાની લત લાગી જાય છે. આખરે હેરીને એક વાસ્તવિકતા સમજાય જાય છે. તે અરીસો તમને તમારી અતૃપ્ત ઈચ્છાઓ બતાવીને લુભાવવાનું જ કામ કરે છે બાકી કોઈ ઈચ્છા તે પૂરી કરતો નથી. તે જીવતો બચેલો છોકરો એ વાતને સ્વીકારી લે છે કે અરીસામાં જોવાથી તેના માબાપ મરી ગયા છે એ હકીકત નહિ બદલાય અને તે અરીસાની મુલાકાત લેવાનું બંધ કરે છે. કલાઈમેક્સમાં તે અરીસામાં જ પહેલીવાર તેને વોલ્ડેમોર્ટ દેખાય છે.
વાસ્તવિકતા સ્વીકારવાની હિંમત જ એક છોકરાને પુરુષ અને એક છોકરીને સ્ત્રી બનવાના માર્ગ પર અગ્રેસર કરે છે.
જોકે, કોરી વાસ્તવિકતા જિંદગીને શુષ્ક બનાવી દે છે અને અતિશય ભ્રમ જીવનને નરક (ઓક્યુલસનો અરીસો યાદ આવે છે?!)!
‘આપણે શું છીએ તે આપણી યોગ્યતા નહીં પણ આપણા નિર્ણયોથી નક્કી થાય છે’ – પ્રોફેસર એલ્બસ ડમ્બલડોર
હેરી જ્યારે જાદુગરોની સ્કૂલ હોગવર્ટ્સમાં પહેલા વર્ષમાં જાય ત્યારે બોલતી ટોપી તેને પહેલા નાગશક્તિ હાઉસમાં મોકલવા માંગતી હોય છે પણ હેરીને તે હાઉસના વિદ્યાર્થીઓ વિશે પહેલેથી જ ખબર હોય એટલે તે ટીપીને પોતાને તે હાઉસમાં મૂકવાની ના પાડી દે છે. અંતે ટોપી તેને ગરુડદ્વાર હાઉસમાં મૂકે છે. બીજા ભાગમાં હેરીને ખબર પડે કે લોર્ડ વોલ્ડેમોર્ટ ઉર્ફે ટોમ રિડલ અને તેનામાં ઘણી સમાનતા હોય છે જેમ કે તે પણ ટોમની જેમ સર્પભાષા જાણતો હોય છે. ત્યારે, તે નિરાશ થઈ જાય છે કે ખરેખર તે ટોમની જેમ આગળ જઈને શેતાની જાદુગર વોલ્ડેમોર્ટ બની જશે કે કેમ. જ્યારે તે સવાલ પોતાના ગુરુ જેવા પ્રોફેસર ડમ્બલડોરને પૂછે ત્યારે તે ઉપરોક્ત વાક્ય કહે છે. જ્યાં સુધી આપણે શેતાનને પોતાનો કબજો લેવા માટે રજા નથી આપતા ત્યાં સુધી તે આપણી ઉપર હાવી થઈ શકતો નથી. આપણા નિર્ણયો જ આપણેને સારા કે ખરાબ બનાવે છે. આપણા સંસ્કૃત સુભાષિતોમાં એક વેધક ઉપમા આપી છે:
ગીધ પહાડોની ઊંચાઈ પર ઉડે છે પણ તેની નજર હંમેશા ખીણમાં રહેલા જોઈ મડદા પર ટકેલી હોય છે.
હાફ બ્લડ પ્રિન્સની વાર્તા
સાવ પહેલા ભાગથી જો કોઈ પાત્ર હેરી પોટરને ખાલિસ નફરત કરતું હોય તો તે છે પ્રોફેસર સ્નેપ. ઘણા સમય સુધી તો આપણને સ્નેપની હેરી પ્રત્યેની દુર્ભાવનાનું કારણ માલૂમ થતું નથી પણ સાવ છેલ્લા ભાગમાં સ્નેપની બેક સ્ટોરી આવે છે અને ખબર પડે છે કે હેરીના પપ્પા અને તેના મિત્રો એટલે કે જેમ્સ પોટર, સિરિયસ બ્લેક અને રીમસ લ્યુપીન નાના સ્નેપને બહુ જ ચીડવતા હોય છે. જેમ્સ પોતાની ક્લાસમેટ લિલીને પ્રેમ કરતો હોય છે અને સામે પક્ષે લિલીને પણ તેના માટે લાગણી હોય છે પણ સ્નેપ લિલીને છૂપો પ્રેમ કરતો હોય છે. અંતે જેમ્સ લિલીને પરણી જતા સ્નેપ મારા કર્મે લખ્યું કથીર માનીને નિયતિને સ્વીકારી લે છે. જ્યારે લોર્ડ વોલ્ડેમોર્ટ પોટર પરિવાર પર હુમલો કરીને હેરીના માતાપિતાને મારી નાંખે ત્યારે સ્નેપ લિલીના શબને વળગીને રોવે છે. આમ, હેરી સાથે સ્નેપનો સંબંધ લવ હેટ જેવો હોય છે જેમ્સના દીકરા હોવાના નાતે સ્નેપ તેને સાવ નફરત કરે છે તો લિલીના અંશ તરીકે હેરીને સ્નેપ અખૂટ પ્રેમ પણ કરે છે. સ્નેપનું હુલામણું નામ હાફ બ્લડ પ્રિન્સ આમ હેરી માટે પણ બંધબેસતું લાગે છે. સ્નેપ માટે હેરી હાફ બ્લડ પ્રિન્સ છે. અને લિલીની મોત પછી સ્નેપ તેના અંશ એવા હેરીની રક્ષાનો ભેખ ધરે છે અને આપણા હમઝા અલી મઝારી ઉર્ફે જસકિરત સિંહ રંગીની જેમ વોલ્ડેમોર્ટની પ્રાણભક્ષી સેનાની ઘોર ખોદે છે. અને આ બધા સમય દરમિયાન તેને સતત એ વસ્તુનું ભાન હોય છે કે હેરી તો તેને નફરત જ કરે છે. પણ આ મિશ્ર લોહીવાળા રાજકુમારના દોરંગા રુધિરમાં પ્રેમનો રાતો રંગ ચડિયાતો નીવડે છે નફરત અને હિંસાનો લાલ રંગ નહીં. આ સંઘર્ષ આ કશ્મકશ જ સ્નેપને સમગ્ર સિરીઝનું સૌથી મહાન પાત્ર બનાવે છે.
પૂર્ણાહુતિ:
આપણને ચાહનારા આપણને મૂકીને ક્યાંય જતા નથી, કયારેક ને ક્યાંક આપણેને તે મળી જ જતા હોય છે
– સિરિયસ બ્લેક
