મોરબીના પાડાપુલ પરથી મહિલાએ મોતની છલાંગ લગાવી, ફાયર ટીમે જીવ બચાવ્યો

ખાસ-ખબર સંવાદદાતા
મોરબીના સુસાઈડ પોઈન્ટ એવા પાડા પુલ પર સવારે એક મહિલાએ અચાનક છલાંગ લગાવી આપઘાતનો પ્રયાસ કર્યો હતો પરંતુ સદનસીબે પુલ નીચે પાણી હોવાથી તેનો જીવ બચી ગયો હતો. આ ઘટનાની જાણ થતા આસપાસના લોકો તેમજ પોલીસની ટીમ સ્થળ પર દોડી ગઈ હતી અને મહિલાને પાણીમાંથી બહાર કાઢવામાં આવી હતી તો બીજી તરફ મોરબી 108 ની ટીમ પણ તુરંત ઘટનાસ્થળ પર પહોંચી ગઈ હતી અને મહિલાને ઈમરજન્સી સારવાર આપી હતી બાદમાં મહિલાને વધુ સારવાર અર્થે સિવિલ હોસ્પિટલ ખસેડવામાં આવી હતી. પ્રાથમિક તપાસમાં મહિલાનું નામ અનસોયાબેન નરેશભાઈ હોવાનું સામે આવ્યું હતું અને મહિલા માળીયા તાલુકાના ખાખરેચી ગામના વતની હોવાનું અને મોરબીમાં છેલ્લા 5 મહિનાથી રહેતી હોવાનું પણ સામે આવ્યું છે. આ બનાવ સમયે તેના પરિવારજનો પણ હાજર હોય ઘર કંકાસથી કંટાળી મહિલાએ આ પગલું ભર્યું હોય તેવી પણ આશંકા સેવાઈ રહી છે. મચ્છુ નદીમાં પુલ પરથી કોઈ મહિલાએ છલાંગ લગાવી હોવાની જાણ થતા ત્યાંથી નીકળતા વાહન ચાલકો મોટી સંખ્યામાં એકઠા થઈ ગયા હતા જેના કારણે ટ્રાફિકજામ પણ સર્જાયો હતો.