રાજકોટની યુવતીએ દિલ્હીની કંપની, ડાયરેક્ટર સહિત 9 સામે નોંધાવી ફરિયાદ
એમ્બેસી પહોંચેલા લોકોને ખ્યાલ આવ્યો કે એપોઇન્ટમેન્ટ લેટર, વર્ક પરમીટ ખોટા છે
- Advertisement -
ખાસ-ખબર ન્યૂઝ રાજકોટ
રાજકોટના 78 યુવકને ઓસ્ટ્રિયા સહિતના વિવિધ યુરોપિયન દેશોમાં વર્ક પરમિટ પર મોકલવાના બહાને 3,28,82,500 ઉઘરાવી ન્યૂ દિલ્હીની ઇમિગ્રેશન કંપનીના ડાયરેક્ટરો સહિત સાત શખ્સે છેતરપિંડી આચરતા સાયબર ક્રાઇમ પોલીસમાં આ અંગે ફરિયાદ નોંધાવવામાં આવી છે.
રાજકોટના જામનગર રોડ પર શ્રીજી પાર્કમાં રહેતા અને 150 ફૂટ રિંગ રોડ પર અયોધ્યા ચોક પાસે ‘ધ વન વર્લ્ડ-ડી’ બિલ્ડિંગમાં કે.એમ. ઇમિગ્રેશન ક્ધસલ્ટન્સી નામે છેલ્લા ચાર વર્ષથી વ્યવસાય કરતા મિતલબેન વિજયકુમાર સુરજીવાલાએ ગ્યાનગતિ પ્રાઇવેટ લિમિટેડ, બેડોન એજ્યુકેશન ક્ધસલ્ટન્સીના ડાયરેક્ટર અજય મોહનપાલ તથા વિશાલ સૈની, નેહા ગુપ્તા, શ્વેતા શાહુ, સ્વાતિ મોહપાલ, મનપ્રિત સંધુ અને મોનીકા સૈની રહે તમામ દિલ્હી સામે સાયબર ક્રાઇમ પોલીસમાં નોંધાવેલી ફરિયાદમાં જણાવ્યું હતું કે ગત તા.12 ઓક્ટોબર 2023ના રોજ ન્યૂ દિલ્હીની ગ્યાનગતિ પ્રા.લિ. કંપનીમાં સિનિયર કાઉન્સેલર તરીકે કામ કરતી નેહા ગુપ્તાએ ફરિયાદીનો સંપર્ક કરી ઇઝરાયલ એગ્રિકલ્ચર વર્ક પરમિટ અંગે માહિતી આપી હતી. શરૂઆતમાં ઇઝરાયલ માટેનું કામ આપ્યું હતું, પરંતુ ત્યાં યુદ્ધની સ્થિતિ હોવાનું કહી આરોપીઓએ તે પ્રોજેક્ટ રદ કર્યો અને લેવાયેલી રકમ પરત કરી હતી. ત્યાર બાદ આરોપીઓએ યુરોપના દેશોમાં વર્ક પરમિટ માટે નવી ઓફર આપી હતી ફરિયાદીએ દિલ્હીમાં આવેલી તેમની ઓફિસની મુલાકાત લીધી હતી જ્યાં અજય મોહપાલ, વિકાસ સૈની સહિતના મળ્યા હતા બેઠક દરમિયાન ઓસ્ટ્રિયા માટે એગ્રિકલ્ચર વર્ક પરમિટ અપાવવાનો કરાર થયો હતો અને ફરિયાદીએ પ્રથમ તબક્કામાં 52 ઉમેદવારના દસ્તાવેજો તથા રકમ આપી હતી. આરોપીઓએ ત્રણ મહિનામાં વર્ક પરમિટ અને વિઝા સબમિશન કરાવી આપવાની ખાતરી આપતા ફરિયાદીએ બાદમાં કુલ 78 ઉમેદવારના દસ્તાવેજો તથા રકમ મોકલી હતી. જેમાં એક્સિસ બેન્ક મારફતે 1,04,20,143, એસબીઆઈ મારફતે 1,87,62,357 અને આંગડિયા મારફતે 37 લાખ એમ મળી કુલ 3,28,82,500 ચૂકવ્યા હતા સમયગાળો પૂર્ણ થયા છતાં કામ ન થતાં આરોપીઓએ 48 લોકોના વર્ક પરમિટ અને ઓસ્ટ્રિયા એમ્બેસીમાં વિઝા સબમિશન માટે એપોઇન્ટમેન્ટ લેટર આપ્યા હતા, પરંતુ ઉમેદવારો જ્યારે એમ્બેસી પહોંચ્યા ત્યારે તપાસમાં આ તમામ દસ્તાવેજો બનાવટી હોવાનું બહાર આવ્યું હતું ઓસ્ટ્રિયા એમ્બેસી તથા અખજ વિભાગ સાથે સંપર્ક કરતાં પણ વર્ક પરમિટ ખોટા હોવાનું સ્પષ્ટ થયું હતું. ફરિયાદીએ આરોપીઓ પાસે નાણાં પરત માગ્યા પરંતુ નહીં આપતા અંતે છેતરપિંડીની ફરિયાદ નોંધાતા પોલીસે ગુનો નોંધી વધુ તપાસ હાથ ધરી છે.
