જૂનાગઢ જિલ્લામાં પલ્સ પોલીયો રસીકરણ અભિયાનમાં પ્રથમ દિવસે કુલ 94,409 બાળકોને રસી પીવડાવી

ખાસ-ખબર ન્યૂઝ જૂનાગઢ, તા.9
જૂનાગઢ જિલ્લામાં પલ્સ પોલિયો રસીકરણ અભિયાન અંતર્ગત પાદરીયા ગામે જિલ્લા કલેકટર અનિલ કુમાર રાણાવસિયા અને જિલ્લા વિકાસ અધિકારી નીતિન સાંગવાને બાળકોને પોલિયો રસીના ટીપા પીવડાવી આ અભિયાનનો શુભારંભ કરાવ્યો હતો. ઉપરાંત સમગ્ર જિલ્લામાં પણ જુદા જુદા પોલિયો બુથ ખાતે પદાધિકારીઓ, અધિકારીઓ તથા આગેવાનોના વરદ હસ્તે બાળકોને પોલિયો રસીના ટીપા પીવડાવવામાં આવ્યા હતા. જિલ્લાના તમામ ગામો અને શહેરોમાં પલ્સ પોલીયો રસીકરણ અભિયાન અંતર્ગત 766 બુથ ઉપર તેમજ મોબાઈલ અને ટ્રાન્ઝીટ ટીમના કુલ 2386 કર્મચારીઓ દ્વારા કુલ 94409 બાળકોને પોલીયોની રસી પીવડાવવામાં આવી.બાકી રહેલ બાળકોને બીજા અને ત્રીજા દિવસે ડોર ટુ ડોર ફરીને ટીમો દ્વારા પોલીયોની રસી પીવડાવી રક્ષિત કરવામાં આવનાર છે.