ખાસ-ખબર ન્યૂઝ જૂનાગઢ, તા.9
મહાનગરપાલિકા વિસ્તારમાં ગેરકાયદેસર અને મંજૂરી વગર દિવાલો પર જાહેરાત માટેના પોસ્ટર, સ્ટિકર વગેરે લગાડવાની મનાઇ છે. તેમ છતા આરીતે વોલ પેન્ટિંગ, સ્ટીકર, પોસ્ટર, સાઇનબોર્ડ, કિયસ્ક પોલ અને હોર્ડીંગ્સ લગાવાશે તો આવી રીતે જાહેરાત કરનાર પાસેથી બોર્ડનું ભાડુ ઉપરાંત દંડની વસુલાત કરવાની કમિશનર ડો.ઓમ પ્રકાશે સુચના આપી છે. ત્યારે આ સુચનાના પગલે ડીએમસી ડી.જે.જાડેજાના માર્ગદર્શનમાં શહેરમાં ચેકીંગ હાથ ધરવામાં આવ્યુ હતુ.
આવી રીતે પ્રચાર પ્રસારથી શહેરની શોભા તથા એકરૂપતા જળવાતી ન હોય આવા આસામીઓ સામે ભાડા ઉપરાંત દંડની રકમ તથા કસુરવારના બોર્ડ, સ્ટીકર, પોસ્ટર, હોડીંગ્સ મનપા દ્વારા દૂર કરવામાં આવેલ છે. જયારે આ કાર્યવાહીના ખર્ચની રૂા.22,000ની રકમ દંડ સહિત વસુલ કરવામાં આવેલ છે. જયારે સ્ટીકર, પોસ્ટર, ધજા, પતાકા, બોર્ડ, સોડિયમ પોલ કે સરકારી તથા અર્ધ સરકારી મિલકતોની દીવાલો ઉપર મંજૂરી વગર લગાડવામાં ાવેલ હોય તો પ્રથમ વખત ભાડા ઉપરાંત રકમ રૂા.200 પ્રતિદિનનો દંડ તથા બીજી વખત ભાડા ઉપરાંત રકમ રૂા.500નો દંડ વસુલ કરવામાં આવશે.
