લાંબા રૂટની ફિકવન્સી વધશે
ખાસ-ખબર સંવાદદાતા
રાજ્યના વાહન વ્યવહાર નિગમ દ્વારા રાજકોટ સહિત રાજ્યના 16 એસ.ટી. ડિવિઝનને નાતાલની ભેટ સ્વરૂપે નવી ડીલકસ બસોની ફાળવણીનો નિર્ણય કરવામાં આવ્યો છે. જેના ભાગરૂપે રાજકોટ એસ.ટી. ડિવિઝનને આવતા અઠવાડિયે 10 નવી ડીલકસ બસ ફાળવવામાં આવશે. જેનાથી મુસાફરોને લાંબા રૂટમાં મળતી ફ્રિકવન્સીમાં વધારો થશે. રાજ્યના વાહન વ્યવહાર નિગમ દ્વારા 16 એસ.ટી. ડિવિઝનને આવતા અઠવાડિયાથી નવી ડીલકસ બસોની ફાળવણી કરવાનો નિર્ણય લેવાયો છે. જેમાં નવા વર્ષના પહેલા અઠવાડિયાથી તબક્કાવાર 1,000થી વધુ બસોની ફાળવણી કરવામાં આવશે એવું સૂત્રો જણાવી રહ્યા છે. આ દરમિયાન રાજકોટ એસ.ટી.ના વિભાગીય નિયામક જે. બી. કલોતરાએ જણાવ્યું હતું કે, રાજકોટ એસ.ટી. વિભાગને આવતા અઠવાડિયે 10 જેટલી નવી ડીલકસ બસની ફાળવણી કરવામાં આવશે.
તેમણે વધુમાં જણાવ્યું હતું કે રાજકોટ એસ.ટી. વિભાગ પાસે હાલ કુલ 550થી વધુ બસો છે, જેમાં 350 જેટલી ડીલકસ બસો છે. જ્યારે બાકીની મીડી બસ (મીની બસ) છે. જોકે, હવે આવતા અઠવાડિયે નવી ડીલક્સ બસોની ફાળવણી કરવામાં આવતા મુસાફરોને લાંબા રૂટમાં મળતી ફ્રિકવન્સીમાં વધારો થશે.
અંતમાં તેમણે કહ્યું કે, વાહન વ્યવહાર નિગમ દ્વારા વર્ષ દરમિયાન નવી બસોની ફાળવણી થતી હોય છે. જોકે, વર્ષ 2024ની શરૂઆતમાં એટલે કે નવા વર્ષની ભેટ સ્વરૂપે નવી ડીલકસ બસોની ફાળવણી કરવામાં આવશે. જેનાથી નવા રૂટ શરૂ કરવા હોય તો પણ થઈ શકશે