રાજકોટમાં વધુ ત્રણ હથિયારો, આઠ કાર્ટિસ સાથે બે શખ્સો ઝડપાયા

રાજકોટ શહેર અને જિલ્લાના ક્રાઇમના સમાચાર

પીસીબીએ વેપન કાર્ટેલ ગેંગ પકડ્યા બાદ ડીસીબી પણ મેદાનમાં

એમપીથી હથિયાર ખરીદી તેને સૌરાષ્ટ્રમાં વેચવાનું કૌભાંડ પીસીબીએ પકડી પાડી કુલ ૩૮ હથિયારો સાથે ૨૦ શખ્સોની ધરપકડ કર્યા બાદ ક્રાઈમ બ્રાંચે પણ હવે ગેરકાયદે હથિયારો રાખનારાઓ ઉપર ધોંસ બોલાવી છે. જેના ભાગરૂપે બે શખ્સો પાસેથી કુલ ત્રણ હથિયારો કબજે કર્યા હતા. આગામી દિવસોમાં વધુ હથિયારો કબજે થાય તેવી શક્યતા છે. રાજકોટમાં હથિયારોની હેરાફેરી ઉપર ખાસ વોચ રાખવાની સૂચના અન્વયે ક્રાઈમ બ્રાંચ પીઆઇ એ એસ ચાવડાની ટીમે વાવડી નજીકના રસુલપરા રોડ પરથી રસુલપરાના રહીમ ઉર્ફે જામનગરી સીદ્દીક સાંધને દેશી બનાવટની પિસ્તોલ અને બે કાર્ટીસ સાથે ઝડપી લીધો હતો. તેની પૂછપરછ બાદ તેના મકાનમાં દરોડો પાડી ત્યાંથી દેશી બનાવટનો એક તમંચો અને ચાર કાર્ટીસ કબજે કર્યા હતા. આરોપી રહીમે પોતે પોતે મજૂરી કરતો હોવાનું પોલીસને જણાવ્યું છે. તેના વિરૂધ્ધ મારામારી, આર્મ્સ એકટ, ધમકી આપવા સહિતના પાંચ ગુના નોંધાયેલા છે. 2022માં તેની પાસા પણ થઈ હતી. આ બંને હથિયારો કયાંથી લીધા તે અંગે હવે કાઈમ બ્રાંચ તપાસ કરશે તેમજ ક્રાઈમ બ્રાંચની બીજી ટીમે દૂધસાગર રોડ પર ગામેતી હોલની સામે મનહર સોસાયટી મેઈન રોડ પર રહેતાં વસીમ ઉર્ફે શાહબાઝ હબીબ કુરેશી ઉ.37ને દેશી બનાવટની પિસ્તોલ અને બે જીવતા કાર્ટીસ સાથે અમૂલ સર્કલ નજીકથી ઝડપી લીધો હતો. ભંગારનો ડેલો ધરાવતા વસીમ સામે આ અગાઉ મારામારી અને આર્મ્સ એકટ સહિત બે ગુના નોંધાયા છે.

જેતપુરમાં હોર્ન મારતા માથાકૂટ કરી ટ્રકચાલક પાસેથી ચાવી-રોકડની લૂંટ

રાજકોટ જિલ્લાના જેતપુર-ધોરાજી રોડ પર આવેલા નવા બ્રિજ નજીક મોડી રાત્રે રોડ વચ્ચે વગર નંબર પ્લેટનું એક્ટિવા ઊભું રાખવા મુદ્દે હોર્ન મારતા ઉશ્કેરાયેલા બે શખ્સોએ ટ્રક ડ્રાઈવરને આંતરી લૂંટ ચલાવ્યાની સનસનાટીભરી ઘટના સામે આવી છે. મૂળ દાહોદના અને હાલ ડ્રાઇવિંગ કામ કરતા મહેશભાઈ રસુલભાઈ નિનામા પોતાનો ટ્રક લઈને જેતપુર થઈને પસાર થઈ રહ્યા હતા. તે દરમિયાન રોડ પર અડચણરૂપ ઊભેલા નંબર પ્લેટ વગરના એક્ટિવા પરના શખ્સોને ડ્રાઈવરે હોર્નમારતા તેઓ ઉશ્કેરાયા હતા. ખાર રાખીને આ શખ્સોએ ટ્રકનો પીછો કરી આગળ એક્ટિવા આડું રાખી ટ્રક | રોકાવી દીધો હતો. ધોરાજીના સિદ્ધાર્થનગરમાં રહેતા આરોપી મયુર અશોકભાઈ સોંદરવાએ કેબિનનો દરવાજો ખોલીને ગાળાગાળી કરી ટ્રકની ચાવી અને ડ્રાઇવરના ખિસ્સામાંથી રોકડા 4500ની લૂંટ ચલાવી હતી આગળ જઈ રહેલા કંપનીના બીજા ટ્રકના ડ્રાઈવરે સમગ્ર ઘટનાનો મોબાઈલમાં વીડિયો ઉતારી લીધો હતો. જેના આધારે ઓળખ થતાં જેતપુર સીટી પોલીસે આરોપી મયુર સોંદરવા અને તેના અજાણ્યા સાગરીત સામે ગુનો નોંધીને બંનેને ઝડપી પાડવા માટે તપાસ હાથ ધરી છે

મઘરવાડાની કંપનીમાં શ્રમિકનું ઢીમ ઢાળી દેનાર કારખાનેદારના પુત્ર સહીત 9ની ધરપકડ

રાજકોટ નજીકના મઘરવાડા ગામે આવેલ કાવ્યા એલોય નામના કારખાનામાંથી કોપર વાયરની ચોરી કરનાર મૂળ ઉત્તરપ્રદેશના શ્રમિક ચંદ્રવીર ચૌહાણની ઢોર માર મારી હત્યા નીપજાવવાના ગુનામાં કુવાડવા રોડ પોલીસે કારખાનાના માલિકના પુત્ર સહિત કુલ નવ આરોપીઓની ધરપકડ કરી તપાસ જારી રાખી છે. હત્યાનો ભોગ બનનાર ચંદ્રવીર કાવ્યા એલોયમાં જ બે મહિનાથી કામ કરતો હતો. બે દિવસ પહેલાં રાત્રે તેણે કોપર વાયરની ચોરી કરી હતી. જેની જાણ થતાં આરોપીઓએ તેને ઢોર માર મારતાં તેણે સારવારમાં દમ તોડી દીધો હતો. તેના પિતરાઈ સર્વેશ ચૌહાણની ફરિયાદ પરથી કુવાડવા રોડ પોલીસે ખુનનો ગુનો નોંધી નવ આરોપીઓની ધરપકડ કરી હતી પોલીસે હત્યાના ગુનામાં સંડોવાયેલા કારખાનાના માલીકના પુત્ર ઇન્દ્રપ્રસ્થનગરમાં રહેતા સાહિલ ભાવેશભાઈ લીંબાસીયા, કારખાનાના મેનેજર ખેરડી ગામે રહેતા વિવેક ઉર્ફે સન્ની નિતીન રૈયાણી, કારખાનાંની ઓરડીમાં રહેતા રાજુ અશોકભાઈ ઠાકોર, મઘરવાડાના પાર્થ સંજયભાઈ હાપલીયા, મોરબી રોડ અભિરામ પાર્કમાં રહેતા ડેનીશ દિનેશભાઈ હાપલીયા, મૂળ યુપીના હાલ કારખાનાની ઓરડીમાં રહેતા રમેશ મંગળુભાઈ સિધ્ધાર્થ, મોરબી રોડ સાગર પાર્કમાં રહેતા સત્યમ ધીરૂભાઈ ડોબરીયા, મૂળ યુપીનો હાલ કારખાનાની ઓરડીમાં રહેતા વિશાલ કનૈયાલાલ જાટપ અને મૂળ યુપી હાલ કારખાનાની ઓરડીમાં રહેતા મુન્ના મન્સારામભાઈ વર્માની ધરપકડ કરી વધુ તપાસ હાથ ધરી છે.

ઉપલેટાના દેવકરણ નારણજી જવેલર્સના મલિક સાથે 4.97 લાખની છેતરપિંડી

ઉપલેટામાં દેવકરણ નારણજી જ્વેલર્સના માલીક સાથે 4.97 લાખની ઠગાઈ અંગે ઉપલેટા પોલીસ મથકમાં ગુનો નોંધાયો છે માણાવદરનો શખ્સ ભાઈના લગ્ન માટે બે સોનાના હાર લેવાં છે અને તે મારી પત્નીને દેખાડવા લઈ જાવ છું કહીં 31 ગ્રામના હાર લઈ નાસી છૂટ્યો હોવાનું ફરિયાદમાં જણાવતા પોલીસે ગુનો નોંધી તપાસ હાથ ધરી છે. ઉપલેટામાં વિજળી રોડ પર રહેતા મિહિરભાઈ દિલીપભાઈ ધોળકિયા ઉ.45એ માણાવદરના દર્શન કરશન મહેતા સામે ઠગાઈ અંગે નોંધાવેલી ફરિયાદમાં જણાવ્યું હતું કે, તે ઉપલેટા ખાતે રાજમાર્ગ પર દેવકરણ નારણજી જવેલર્સ નામે સોનીકામની દુકાન છે ગઈ તા. 02/06 ના તેઓની દુકાને દર્શન કરશન મહેતા આવેલ અને વાત કરેલ કે, તેણે ઉપલેટા આદર્શ શેરીમાં મીત લેબોરેટરીની બાજુમાં ચંદુભાઈ પટેલની દુકાન ભાડે રાખેલ છે અને તેના ભાઇના લગ્ન હોય જેથી સોનાના દાગીના ખરીદવાની વાત કરેલ હતી ત્યાર બાદ તા. 04/06 ના રોજ સવારે આ ફરીવાર દુકાને આવેલ અને સોનાનો ભાવ પુછેલ હતો બાદ ગઇ તા. 06/06ના ફરી દુકાને આવેલ અને વાત કરેલ કે, મારે સોનાના ચેઇન બનાવવા છે, જેથી તેને અલગ અલગ ડીઝાઇનો વાળા ચેઇન બતાવેલ જેમાથી તેને બે સોનાના ચેઇન પસંદ કરેલ જેનો વજન 31 ગ્રામ અને બજાર કિંમત 4.97 લાખ થઈ હતી. તે દર્શને કહેલ કે, મારે આ ચેઇન મારા પત્નીને બતાવવા પડશે, તમે મને આપો હું સાંજ સુધીમાં તમને પાછા આપી જાઇશ જેથી આ દર્શન ભાઇ અગાઉ પણ દુકાને બે વાર આવી ગયેલ હોય જેથી આ બે સોનાના ચેઇન તેને આપેલ બાદ તે મોડે સુધી ચેઇન પાછા આપવા આવેલ નહી, જેથી તેના મોબાઇલ નંબર ઉપર અનેક વાર ફોન કરેલ પરંતુ તેણે ફોન સ્વીચ ઓફ કરી નાખ્યો હતો. આજ સુધી તેની તપાસ કરતાં મળી આવેલ ન હોય અંતે છેતરપીંડીની ફરીયાદ નોંધાવી હતી.

શાપર પાસે કારની ઠોકરે ભાણેજનું મોત, મામાને ઇજા

શાપર નજીક સ્વીફ્ટ કારે પાછળથી બાઇકને ઠોકરે લેતા મામા-ભાણેજને ગંભીર ઈજાઓ પહોંચી હતી આ અકસ્માતમાં ભાણેજનું ઘટનાસ્થળે જ મોત નિપજ્યું હતું. જ્યારે મામાને સારવાર અર્થે હોસ્પિટલમાં ખસેડવામાં આવ્યા હતા શાપર પોલીસે ગુનો નોંધી તપાસ હાથ ધરી છે. મૂળ મેંદરડાના વતની અને હાલ શાપરમાં રાજધાની એપાર્ટમેન્ટમાં રહેતા યુવાને જીજે-13-સીઈ-3621 નંબરની સ્વીફ્ટ કારના ચાલક સામે નોંધાવેલી ફરિયાદમાં જણાવ્યું હતું કે, તે શાપર મુકામે ખોડિયાર હોટલ ખાતે મજુરી કામ કરે છે. તે ત્રણ ભાઇ બહેન છે પોતે સૌથી નાનો છે ગઇ તા.22ના રાત્રીના તેઓ અને તેમનો ભાણો ધવલ ગોવિંદભાઈ વાઘેલા બાઈક લઇને ભાણા ધવલના ઘરેથી કેપ્ટન ગેટ પાસે આવેલ ખોડિયાર હોટલ ખાતે કામે જવા નીકળ્યા હતા. તે બાઈક ચલાવતો હતો અને ભાણો ધવલ પાછળ બેઠો હતો. રાત્રીના સાડા અગીયાર વાગ્યે શાપર પુલ ઉતરતા સર્વિસ રોડ પરથી રાજકોટ તરફ જતા નેશનલ હાઈવે રોડ પર પહોચતા એક અજાણ્યો કાર ચાલક પોતાની કાર ગોંડલ તરફથી રાજકોટ જતા રોડ ઉપર ફુલ સ્પીડમાં આવી બાઇકને પાછળથી ઠોકર મારી હતી જેના લીધે બંને બાઈક સાથે રોડ ઉપર પડી ગયા હતા. પાછળથી જોરદાર ટક્કર વાગતા યુવકને માથાના ભાગે ઇજા પહોંચતા બેભાન થઇ ગયેલ હતો. બાદ તેમને સારવાર અર્થે શાપર અને ત્યાંથી વધુ સારવાર માટે રાજકોટ ખસેડ્યો હતો ગાડીનો ચાલક એકસીડન્ટ કર્યા બાદ પોતાની મુકી ભાગી ગયો હતો. અકસ્માતમાં ભાણા ધવલને માથા તથા શરીરે ગંભીર ઇજા થતા તેનું સારવાર દરમ્યાન મોત નીપજ્યું હતું. સમગ્ર મામલે યુવાને શાપર પોલીસ મથકે ફરિયાદ આપતાં પોલીસે ફેટલની કલમો હેઠળ સ્વીફ્ટ કારના ચાલક વિરુદ્ધ ગુનો નોંધી તપાસ હાથ ધરી હતી.

પડધરીના ખોડાપીપર ગામની સીમમાં છ વાડીમાંથી 400 મીટર કેબલની ચોરી

પડધરીના ખોડાપીપર ગામે તસ્કરોએ અલગ અલગ છ વાડીમાંથી 400 મીટર કેબલ કાપી ચોરી કરી નાસી જતા ચકચાર મચી જવા પામી છે 46 હજારના કેબલ કોપરની ચોરી કરી જનાર તસ્કર વિરુદ્ધ ફરિયાદ નોંધાતા પડધરી પોલીસે તપાસનો ધમધમાટ આદર્યો હતો. બનાવ અંગે પડધરીના ખોડાપીપર ગામે રહેતા વૃદ્ધ ખેડૂત વલ્લભભાઈ વાલજીભાઈ ગઢીયાએ નોંધાવેલ ફરીયાદમાં જણાવ્યું હતું કે, તેમને સંતાનમાં બે દિકરીઓ છે. તેઓને ખોડાપીપર ગામમાં ખેતીની જમીન આવેલી છે ગઈ તા.23 ના સવારના આશરે સાતેક વાગ્યાના અરસામા તેઓ વાડીએ ગયેલ ત્યારે જોયેલ તો વાડીએ લાઈટ આવે ત્યારે ઘોઘમ ડેમમાથી ઓટોમેટીક મોટર ચાલુ થઈ પાણી આવતુ હોય જે પાણી આવતુ બંધ થઇ ગયું હતુ. જેથી વાડીએથી ઘોઘમ ડેમમા જોવા માટે ગયેલ કે, પાણી કેમ આવતુ નથી, તો ત્યાં જતા મોટર અને તેનો કેબલ મળી આવ્યો ન હતો. તેઓએ ભત્રીજાને ફોન કરીને જાણ કરી કે, મારી વાડીએથી મોટર તથા કેબલ વાયર ગાયબ છે. જેથી ભત્રીજો મેહુલભાઈ ગઢીયા વાડીએ આવેલ અને જણાવેલ કે, મારી વાડીએ પણ મોટરનો કેબલ વાયર નથી. જેથી આજુબાજુની વાડીઓમાં તપાસ કરતા થોડા દિવસ પહેલા ગામના મહેશભાઈ પીપળીયા, ખોડાભાઈ ગઢીયા, જયદિપભાઈ રંગાણી, ચમનભાઇ ગઢીયા, મેહુલભાઇ ગઢીયા, મુકેશભાઈ પીપળીયા સહિતના ખેડૂતોએ જણાવેલ કે, તેમની વાડીની મોટરો પણ બંધ છે અને પાણી આવતુ નથી, જે બાદ તેમના પણ કેબલ ચોરાઈ ગયાની જાણ થઇ હતી. તમામ ખેડૂતોની મોટરના કેબલ કપાયેલી હાલતમાં મળી આવ્યા હતા બાદ તમામ મોટરમાંથી કેબલ વાયર કાપી તેને સળગાવી નાખી કોપરની ચોરી કરી લેવાયાની જાણ થઇ હતી જેથી ફરિયાદીની મોટરનો કોપરનો કેબલ આશરે 50 મીટર તેમજ પાણીની મોટર અને અન્ય ખેડૂતોની મળી કુલ કોપરનો કેબલ 400 મીટર કાપી તસ્કર ચોરી કરી જતાં ખેડૂતોએ પડધરી પોલીસ મથકે દોડી જઈ ચોરીની ફરિયાદ નોંધાવી હતી. સમગ્ર બનાવને પગલે પડધરી પોલીસ મથકના પીએસઆઈ એ એસ અગ્રાવતની ટીમે તપાસ શરુ કરી છે.

4 મહિનાનો પગાર માંગતા શેઠ સહીત ચાર શખ્સોએ માર મારી, ધમકી દીધી

મૂળ નેપાળના અને હાલ રાજકોટના આજી ડેમ ચોકડી પાસે માનસરોવર પાર્કમાં રહેતા અને રસોઈકામ કરતા ગુમાનસીંગ ઈમાનસીંગ ઠાકુરએ કરણ મહતરા, દિપક અને બે અજાણ્યા શખ્સો સામે આજી ડેમ પોલીસ સ્ટેશનમાં નોંધાવેલી ફરિયાદમાં જણાવ્યું હતું કે ગત 22 તારીખે રાત્રીના રોનક હોટલ પાસે હતો ત્યારે કરણ જે શેઠ હોય તેની પાસે ચાર મહિનાનો પગાર બાકી હોય તે પગાર માંગતા મને ગાળો ભાંડી હતી તે પછી દિપક અને બે અજાણ્યા શખ્સોને બોલાવી ગાળો ભાંડી ઢીકાપાટુનો માર માર્યો હતો અને ધોકાથી હુમલો કર્યો હતો મારકૂટ કર્યા બાદ હવે પગાર માંગીશ તો જાનથી મારી નાખીશ કહી ધમકી દીધી હોવાનું જણાવતા આજી ડેમ પોલીસે ગુનો નોંધી તપાસ હાથ ધરી છે.