એમપીના ચાર સાગરીતો ઝડપાયા : વધુ 12.50 લાખની રોકડ સહીત 17 લાખનો મુદામાલ કબ્જે
લૂંટ-ધાડના સૂત્રધાર સહીત વધુ 6 શખ્સોની શોધખોળ : ધરપકડનો આંક 7 ઉપર પહોંચ્યો
- Advertisement -
રાજકોટના શાપરમાં ગત 19-20 તારીખની રાત્રે રાજવી પરિવારના ઘરમાં ઘુસી વૃદ્ધને બંધક બનાવી અઢી કરોડની સનસનીખેજ લૂંટમાં પોલીસે અગાઉ 3 આરોપીઓની ધરપકડ કરી 76.86 લાખનો મુદામાલ કબ્જે કર્યો હતો આ ગુનામાં સામેલ વધુ 4 સાગરીતોની પોલીસે ધરપકડ કરી 12.50 લાખની રોકડ, વાહન સહીત 17 લાખનો મુદામાલ કબ્જે કર્યો છે આ ગુનામાં ભોગ બનનારનો પૂર્વ ભાગિયો જ મુખ્ય સૂત્રધાર નીકળ્યો છે તેણે જ આ ઘરમાંથી મોટો દલ્લો હોવાની માહિતી આધારે વતનમાં યોજાયેલા મેળામાં સાગરીતોને મળીને પ્લાન ઘડ્યો હોવાનું જાણવા મળ્યું છે જો કે સૂત્રધાર સહીત હજુ 6 શખ્સો ફરાર હોય તેની શોધખોળ હાથ ધરી છે.
રાજકોટના શાપરમાં રહેતા રાજવી જીતેન્દ્રસિંહ જાડેજાને ગત તારીખ 19-20ની રાત્રે ઘરમાં જ બંધક બનાવી છ બુકાનીધારી શખ્સો 2.47 કરોડની રોકડ, દાગીના, રાયફલ, મોબાઈલ સહીત 2.49 કરોડની મતા લૂંટી નાસી ગયાની ફરિયાદ પોલીસ ચોપડે નોંધાતા રેન્જ આઇજી નિર્લિપ્ત રાય અને એસપી વિજયસિંહ ગુર્જરના માર્ગદર્શન હેઠળ ગુનાનો ભેદ ઉકેલવા 20 જેટલી જુદી જુદી ટિમો દોડાવવામાં આવી હતી અને અગાઉ 3 આરોપીઓ બનસીંગ ઉર્ફે બંને હેમરાજ સિંગાડ, સેતાન દીવાનભાઈ અમલિયાર અને દિનેશ સેતાનભાઈ પરમારની ધરપકડ કરી રોકડ સહીત 76.86 લાખનો મુદામાલ કબ્જે કર્યો હતો દરમિયાન ટીમ અન્ય આરોપીઓની શોધખોળમાં લાગી ગઈ હતી અને આજે વધુ 4 આરોપીઓને પકડવામાં પોલીસને સફળતા પ્રાપ્ત થઇ છે એસપી વિજયસિંહ ગુર્જરએ માહિતી આપતા જણાવ્યું હતું કે આ ગુનામાં વધુ 4 આરોપીઓ એમપીના વિજન નજરું માવી, રામેશ્વર ઉર્ફે પપ્પુ કેહજી મચ્છાર, રાજુ કમલસીંગ જોતરા અને સાગર ઉર્ફે સાગરિયા ગુલબાભાઈ મેડાની ધરપકડ કરી ગુનામાં ગયેલ રોકડ પૈકી 12.50 લાખની રોકડ, તુફાન ગાડી, બાઈક અને 4 મોબાઈલ સહીત 17 લાખનો મુદામાલ કબ્જે કર્યો હતો વધુમાં એસપીએ જણાવ્યું હતું કે આ લૂંટ-ધાડમાં મુખ્ય સૂત્રધાર બહાદુર નજરું બબેરીયા નામનો શખ્સ છે તે અગાઉ ભોગ બનાનર જીતેન્દ્રસિંહ જાડેજા અને તેના ભાગીયા અરવિંદભાઈ પટેલની વાડીમાં પેટા ભાગીયા તરીકે વાડી વાવવા રાખતો હતો અને એક વર્ષ પછી વતન જતો રહ્યો હતો ત્યારે ઘરમાં મોટો દલ્લો હોવાની વાતથી વાકેફ હોય વતનમાં મેળો યોજાયો હોય તેમાં સાગર અને રાજુને વાત કરી લૂંટનો પ્લાન ઘડ્યો હતો તે પછી તે બંનેએ નિલેશ અને પપ્પુને વાત કરી સમગ્ર પ્લાન ઘડી ગુનાને અંજામ આપ્યો હતો આ ગુનામાં સૂત્રધાર એમપીના બહાદુર ઉપરાંત કલમસિંગ ઉર્ફે કમલસીંગ માવજીયા સિંગાડ, કરણસીંગ ઉર્ફે મડિયા હેમરાજ સિંગાડ, મહોબતસિંગ, આલમસિંગ ઉર્ફે સુલસુલા બામણીયા અને નિલેશ મછારની શોધખોળ હાથ ધરી છે આ સાથે ધરપકડનો આંક 7 ઉપર પહોંચ્યો છે.
આ ટોળકી પ્લાન મુજબ રાજકોટ આવવા નીકળી હતી પરંતુ સીસીટીવીમાં ન આવે તે રીતે વડોદરા પહોંચી ધંધુકા થઇ તે ચોટીલા આવ્યા હતા અને બે લોકો હોટલમાં અને બે લોકો વાડી વિસ્તારમાં રોકાયા હતા પ્લાન મુજબ 19 તારીખની રાત્રીના સમયે તમામ છ લોકો બોલેરો લઈને શાપર પહોંચ્યા હતા અને લૂંટને અંજામ આપ્યો હતો.
- Advertisement -
તા.15ના આવી પોલીસ સ્ટેશન, વાડી, ઘરની રેકી કરી હતી
આ ટોળકીએ પ્લાન ઘડી તુફાન લઈને ગત 15 તારીખે રાજકોટ આવ્યા હતા ક્યાં રસ્તેથી આવીએ તો સીસીટીવીમાં કેદ ન થાય તેનું, ઘરમાં પ્રવેશ કરવા કઈ વાડીમાંથી આવવું તેનું, ક્યાં રસ્તેથી ભાગવું તેનું, ઘરથી પોલીસ સ્ટેશન તેમજ રસ્તામાં આવતા તમામ પ્રાઇવેટ, સરકારી સીસીટીવીનું જબરદસ્ત એનાલિસિસ કરી તેમજ લૂંટ પછી પોલીસથી બચવા ક્યાંથી બાઈકની ઉઠાંતરી કરવી તે સહિતની સંપૂર્ણ રેકી કરી હતી.
17 તારીખે કાળી ચકલીએ રસ્તો કાપ્યો એટલે ન આવ્યા
15 તારીખે રેકી કર્યા બાદ ટોળકીએ 17 તારીખનું મુહૂર્ત કાઢ્યું હતું અને 17 તારીખે આ લોકો લૂંટને અંજામ આપવા નીકળ્યા પણ હતા પરંતુ રસ્તામાં પ્રારંભે જ કાળી ચકલીએ રસ્તો કાપતા તે અપશુકન માની તે લોકો પરત ઘરે જતા રહ્યા હતા અને બીજા દિવસે નીકળ્યા હતા.
પકડાયેલા અને પકડવાના બાકી આરોપીઓનો ગુનાહિત ઇતિહાસ
વીજન માવી : બે ગુના
રામેશ્વર : સાત ગુના
સાગર : એક ગુનો
કલમસિંગ : બે ગુના
મહોબતસિંગ : બાવીસ ગુના
આલમસિંગ : સોળ ગુના
