અમદાવાદના શાહપુરમાં નકલી દારૂ બનાવતી ફેક્ટરી ઝડપાઇ

પાણી-ફલેવર મિકસ કરી બ્રાન્ડના સ્ટિકર મારી રૂ.5000 સુધીના ભાવે વેંચતા

ચાર આરોપી ઝડપાયા, મુખ્ય સૂત્રધાર ફરાર

ગુજરાત જેવા ડ્રાય સ્ટેટમાં બુટલેગરો દારૂનો વેપલો કરવા માટે અવનવા અને ચોંકાવનારા કીમિયા અજમાવતા હોય છે. ત્યારે તાજેતરમાં જ અમદાવાદના શાહપુર વિસ્તારમાંથી એક એવા મોટા કૌભાંડનો પર્દાફાશ થયો છે, જે જાણીને તમે પણ અચંબિત થઈ જશો. પોલીસે શાહપુરમાં એક રહેણાંક મકાનમાં દરોડા પાડીને નકલી દારૂ બનાવતી એક આખી ફેક્ટરી પકડી પાડી છે. આ કેસનો મુખ્ય સૂત્રધાર વિકી ઉર્ફે મંગો ચૌહાણ નામનો શખ્સ છે, જેણે પોતાના જઈ મિત્રોને પગારદાર કર્મચારી તરીકે નોકરી પર રાખીને આ કાળો કારોબાર શરૂ કર્યો હતો. હાલ પોલીસે આ ફેક્ટરીમાંથી ૪ આરોપીઓની ધરપકડ કરી છે અને ૧.૫૬ લાખ રૂપિયાથી વધુનો મુદામાલ જપ્ત કર્યો છે, જ્યારે મુખ્ય આરોપી હજુ પણ પોલીસ પકડથી દૂર છે.

શાહપુર વિસ્તારમાં આવેલી હલીમની ખડકી પાસે મોઢાની પોળના એક મકાનમાં આ નકલી દારૂ બનાવવાનું કામ ધમધમી રહ્યું હતું. ચોક્કસ બાતમીના આધારે જ્યારે પોલીસે ત્યાં રેડ કરી ત્યારે આખી ફેક્ટરીનો ભાંડો ફૂટયો હતો. આ આરોપીઓની કામ કરવાની રીત પણ બહુ ચાલાક હતી. તેઓ બજારમાંથી એકદમ સસ્તો દારૂ લાવતા, તેમાં પાણી અને અલગ-અલગ ફ્લેવર મિક્સ કરતા, અને પછી તેને મોંઘી બ્રાન્ડેડ દારૂની ખાલી બોટલોમાં ભરી દેતા. આ નકલી બ્રાનેડ બોટલો તેઓ ગ્રાહકોને ૨૦૦૦ થી લઈને ૫૦૦૦ રૂપિયા સુધીના ઊંચા ભાવે પધરાવી દેતા હતા.

પોલીસે ઘટનાસ્થળ પર દરોડા પાડીને મનદીપ ભાવસાર, કૈલાશ બોડાણા, દેવ પટેલ અને દેવાંગ જાની એમ કુલ ૪ લોકોની ધરપકડ કરી છે. પોલીસની કડક પૂછપરછમાં સામે આવ્યું કે માસ્ટરમાઇન્ડ વિકી ચૌહાણે આ ગેરકાયદેસર ધંધાનું આખું સંચાલન પોતાના મિત્ર મનદીપ ભાવસારને સોંપ્યું હતું, જેના બદલામાં મનદીપને દર મહિને ૩૫,૦૦૦ રૂપિયાનો પગાર ચૂકવવામાં આવતો હતો. બીજા મિત્ર કૈલાશ બોડાણાનું કામ સસ્તો વિદેશી દારૂ અને ખાલી બોટલોની વ્યવસ્થા કરવાનું હતું, જેના માટે તેને ૧૦,૦૦૦ રૂપિયા માસિક પગાર મળતો હતો. જ્યારે બાકીના બે મિત્રો, દેવ પટેલ અને દેવાંગ જાની, આ બ્રાન્ડેડ નકલી દારૂની બોટલો ગ્રાહકો સુધી પહોંચાડવાનું (ડિલિવરીનું) કામ કરતા હતા. તેમને રોજિંદા પગાર પેટે ૨૦૦ રૂપિયા ચૂકવવામાં આવતા હતા.

પોલીસે આ રેડ દરમિયાન સ્થળ પરથી ૧,૫૬,૦૦૦ રૂપિયાથી પણ વધુની કિંમતનો મુદ્દામાલ જપ્ત કરીને મોટી કાર્યવાહી કરી છે. જોકે, આ આખા નેટવર્કનો માસ્ટરમાઈન્ડ વિકી ચૌહાણ હજુ ફરાર છે. પોલીસે હાલ તેની સવન શોધખોળ હાથ ધરી છે અને તે પકડાયા બાદ આ કેસમાં હજુ પણ કેટલાક નવા ખુલાસા થવાની પૂરી શક્યતા છે.