ડિઝાસ્ટર કંટ્રોલ રૂમની સમીક્ષા અને CHC હોસ્પિટલમાં સરપ્રાઈઝ મુલાકાત લઈ આરોગ્ય સેવાઓનું નિરીક્ષણ કર્યું

ગોંડલ-કોટડાસાંગાણીમાં પ્રમુખ સંજયભાઈ પીપળીયાના નેતૃત્વમાં જિલ્લા પંચાયતની સંકલન બેઠક યોજાઇ

યોજનાઓના અસરકારક અમલીકરણ અને ગ્રામ્ય પ્રશ્નોના ઝડપી નિરાકરણ માટે અધિકારીઓને કડક સૂચનાઓ આપી

રાજકોટ જિલ્લામાં ગ્રામ્ય વિકાસને વધુ ગતિ આપવા અને રાજ્ય સરકારની વિવિધ કલ્યાણકારી યોજનાઓનો લાભ છેવાડાના લોકો સુધી અસરકારક રીતે પહોંચે તે હેતુથી રાજકોટ જિલ્લા પંચાયત પ્રમુખ સંજયભાઈ પીપળીયાના નેતૃત્વમાં ગોંડલ અને કોટડાસાંગાણી તાલુકા પંચાયત કચેરી ખાતે વિસ્તૃત સંકલન બેઠકો યોજાઈ હતી. જિલ્લા પંચાયતના પદાધિકારીઓ, તાલુકા પંચાયતના હોદ્દેદારો, સંગઠનના અગ્રણીઓ તેમજ વિવિધ વિભાગોના અધિકારીઓની ઉપસ્થિતિમાં યોજાયેલી આ બેઠકોમાં તાલુકા અને જિલ્લા સ્તરના વિકાસ કાર્યોની સમીક્ષા સાથે લોકોના પ્રશ્નોના ઝડપી નિરાકરણ પર વિશેષ ભાર મૂકવામાં આવ્યો હતો.

જિલ્લા પંચાયત પ્રમુખ સંજયભાઈ પીપળીયાએ જણાવ્યું હતું કે રાજ્ય સરકાર સર્વાંગી વિકાસ અને ગ્રામ્ય સુખાકારી માટે અનેક યોજનાઓ અમલમાં મૂકી છે. આ યોજનાઓનો વાસ્તવિક લાભ દરેક જરૂરિયાતમંદ વ્યક્તિ સુધી પહોંચે અને વિકાસ કાર્યોમાં કોઈ વિલંબ ન થાય તે માટે આવી સંકલન બેઠકો અત્યંત જરૂરી છે. તેમણે જણાવ્યું હતું કે વિકાસના દરેક પાસા પર સતત નજર રાખીને કામગીરીને વધુ અસરકારક બનાવવામાં આવશે. બંને તાલુકા પંચાયત કચેરીઓ ખાતે યોજાયેલી બેઠકોમાં ઉપસ્થિત અધિકારીઓ અને જનપ્રતિનિધિઓ સાથે વ્યક્તિગત પરિચય બાદ તાલુકામાં ચાલી રહેલી વિવિધ વિકાસ યોજનાઓ, પ્રગતિમાન કામો, વહીવટી કામગીરી તથા લોકસેવા સંબંધિત મુદ્દાઓની વિસ્તૃત સમીક્ષા કરવામાં આવી હતી. અધિકારીઓએ પોતાના વિભાગની કામગીરીનો અહેવાલ રજૂ કર્યો હતો, જ્યારે વિવિધ વિકાસ કાર્યોમાં આવતી અડચણો અને પડકારોને લઈને ખુલ્લી ચર્ચા પણ કરવામાં આવી હતી.

બેઠક દરમિયાન તાલુકા તથા જિલ્લા કક્ષાએ અનુભવાતા વિવિધ પ્રશ્નો અંગે રજૂઆતો સાંભળવામાં આવી હતી. જે પ્રશ્નોનો તાત્કાલિક ઉકેલ શક્ય હતો તેનો સ્થળ પર જ નિકાલ કરવામાં આવ્યો હતો, જ્યારે અન્ય પ્રશ્નોની વિગતો મેળવી સંબંધિત વિભાગોને જરૂરી કાર્યવાહી માટે મોકલવામાં આવી હતી. જિલ્લા પંચાયતના પદાધિકારીઓએ અધિકારીઓને લોકોના પ્રશ્નોના ઝડપી અને અસરકારક નિરાકરણ માટે સ્પષ્ટ તેમજ વ્યવહારુ સૂચનાઓ આપી હતી. સાથે જ વિકાસ કાર્યોને વધુ વેગ આપવા અને સરકારી યોજનાઓના અમલીકરણમાં ગતિ લાવવા પર ભાર મૂકવામાં આવ્યો હતો.

કોટડાસાંગાણી ખાતે જિલ્લા પંચાયત પ્રમુખ સહિત પદાધિકારીઓની ટીમે સામૂહિક આરોગ્ય કેન્દ્ર (CHC) હોસ્પિટલની સરપ્રાઈઝ મુલાકાત પણ લીધી હતી. હોસ્પિટલમાં દર્દીઓને મળતી આરોગ્ય સેવાઓની ગુણવત્તા, સ્ટાફની હાજરી અને ફરજ પ્રત્યેની નિષ્ઠા, દવાઓની ઉપલબ્ધતા, તબીબી સાધનો તેમજ સ્વચ્છતા અંગે સ્થળ પર નિરીક્ષણ કરીને જરૂરી માર્ગદર્શન અને સૂચનાઓ આપવામાં આવી હતી. આ ઉપરાંત જિલ્લામાં ભારે વરસાદની સ્થિતિ અને હવામાન વિભાગની આગાહીને ધ્યાનમાં રાખીને જિલ્લા પંચાયતની ટીમે કાર્યરત ડિઝાસ્ટર કંટ્રોલ રૂમની મુલાકાત પણ લીધી હતી. વરસાદી પરિસ્થિતિનું મૂલ્યાંકન કરીને તમામ તાલુકા કક્ષાના અધિકારીઓને સંભવિત નુકસાન અટકાવવા, રાહત અને બચાવ કામગીરીમાં ત્વરિત પ્રતિસાદ આપવા તેમજ જનજીવનને સુરક્ષિત રાખવા માટે જરૂરી માર્ગદર્શન આપવામાં આવ્યું હતું.

ગોંડલ ખાતે યોજાયેલી બેઠક બાદ જિલ્લા પંચાયતના પદાધિકારીઓએ પૂર્વ ધારાસભ્ય જયરાજસિંહ જાડેજાના નિવાસસ્થાને શુભેચ્છા મુલાકાત લીધી હતી. ત્યારબાદ ગોંડલ માર્કેટિંગ યાર્ડ ખાતે વિસ્તારના યુવા અગ્રણી ગણેશભાઈ જાડેજા સાથે પણ શુભેચ્છા મુલાકાત યોજાઈ હતી. આ સંકલન બેઠકો દરમિયાન કોટડાસાંગાણી ખાતે ધારાસભ્ય ભાનુબેન બાબરીયા, તાલુકા પંચાયત પ્રમુખના પ્રતિનિધિ રવિરાજસિંહ જાડેજા, જિલ્લા પંચાયત સદસ્ય અર્જુનભાઈ ખાટરીયા તેમજ ગોંડલ ખાતે પૂર્વ ધારાસભ્ય જયરાજસિંહ જાડેજા, તાલુકા પંચાયત પ્રમુખ ભરતભાઈ ઢોલરીયા, યુવા અગ્રણી ગણેશભાઈ જાડેજા, પ્રફુલભાઈ ટોળીયા, સહદેવસિંહ જાડેજા, ભાર્ગવભાઈ અંદીપરા, લાલજીભાઈ તળાવિયા, ભરતભાઈ મકવાણા, ભરતભાઈ ચોવટીયા અને અશ્વિનભાઈ ઠુંમર ઉપસ્થિત રહ્યા હતા. જિલ્લા પંચાયત પ્રમુખ સંજયભાઈ પીપળીયા, ઉપપ્રમુખ સામંતભાઈ બાંભવા, કારોબારી ચેરમેન નરશીભાઈ સોજીત્રા તથા શાસક પક્ષના નેતા પ્રતિનિધિ નિકુંજભાઈ કણસાગરા સહિતના પદાધિકારીઓએ જિલ્લામાં સર્વાંગી વિકાસના સંકલ્પ સાથે બેઠકમાં ભાગ લીધો હતો. આ બેઠકના અંતે પદાધિકારીઓએ આયોજકો દ્વારા આપવામાં આવેલા સહકાર અને સત્કાર બદલ આભાર વ્યક્ત કર્યો હતો તેમજ વિકાસ કાર્યોમાં વધુ સુમેળ અને અસરકારકતા જળવાઈ રહે તે માટે આવી સંકલન બેઠકો નિયમિતપણે યોજવાની જરૂરિયાત પર ભાર મૂક્યો હતો.