તમે જે ફરસાણ ખાવ છો તેમાં ‘વોશિંગ સોડા’તો નથી ને!….ચામુંડા ફરસાણમાંથી વોશિંગ સોડા પકડાયો

ચામુંડા ફરસાણમાંથી વોશિંગ સોડા પકડાયો, 251 કિલો ફરસાણનો નાશ કરાયો 

ભેળસેળિયા વેપારીઓ સામે મનપાની લાલ આંખઃ 269 કિલો અખાદ્ય જથ્થાનો નાશ, 11 હજારનો દંડ ફટકારાયો

દિવાળીના તહેવારોને અનુલક્ષીને લોકોના આરોગ્ય સાથે ચેડાં કરતા ભેળસેળિયા વેપારીઓ સામે રાજકોટ મહાનગરપાલિકાના આરોગ્ય શાખાના ફૂડ વિભાગ દ્વારા કડક સર્વેલન્સ ચેકિંગ અને દરોડાની કાર્યવાહી હાથ ધરવામાં આવી છે. ચેકિંગ દરમિયાન અગાઉ લેવાયેલા પનીરના ચાર નમૂના લેબોરેટરી તપાસ બાદ સબસ્ટાન્ડર્ડ (ફેઈલ) જાહેર થયા છે, જ્યારે તહેવાર નિમિત્તે યોજાયેલી સ્પેશિયલ ડ્રાઇવમાં કુલ 62 પેઢીઓની તપાસ કરી સ્થળ પરથી 269 કિલોગ્રામ અખાદ્ય, વાસી અને એક્સપાયર્ડ જથ્થાનો નાશ કરવામાં આવ્યો છે.બીજી તરફ, દિવાળીના તહેવારોમાં મીઠાઈ-ફરસાણમાં થતી ગંદકી અને ભેળસેળ અટકાવવા માટે ફૂડ વિભાગે શહેરમાં સઘન સ્પેશિયલ ડ્રાઇવ ચલાવી હતી. આ ડ્રાઇવ દરમિયાન મોરબી રોડ, સત્ય સાંઈ રોડ, મવડી, નાના મવા રોડ અને અંબિકા ટાઉનશીપ સહિતના વિસ્તારોમાં કુલ 62 વેપારી પેઢીઓની આકસ્મિક ચકાસણી કરવામાં આવી હતી. આ તપાસ દરમિયાન સ્થળ પરથી મળી આવેલ કુલ 269 કિલો અખાદ્ય, વાસી અને ઉપયોગ માટે અયોગ્ય એવા જથ્થાનો તાત્કાલિક નાશ કરવામાં આવ્યો હતો. નિયમોનું ઉલ્લંઘન કરનાર પેઢીઓ પાસેથી કુલ રૂ. 11,000 નો વહીવટી ચાર્જ વસૂલવામાં આવ્યો હતો તેમજ 2 પેઢીને અનહાઈજેનિક કન્ડિશન, યોગ્ય સ્ટોરેજ અને લાઇસન્સ બાબતે કાયદેસરની નોટિસ ફટકારવામાં આવી હતી.

આ કાર્યવાહી દરમિયાન મોરબી રોડ પુલ નીચે સીતારામ નગરમાં આવેલ ‘ચામુંડા ફરસાણ’માંથી ગંભીર બેદરકારી સામે આવી હતી, જ્યાં ફરસાણમાં ઉપયોગમાં લેવાતો 21 કિલો સોડા એશ (વોશિંગ સોડા) તેમજ પડતર પડેલ વાસી 180 કિલો તીખી પાપડી, 30 કિલો તીખી સેવ અને 20 કિલો તીખી બુંદી મળી કુલ 251 કિલો જેટલો અખાદ્ય જથ્થો પકડાયો હતો. આ સમગ્ર જથ્થાનો SWM વિભાગના વાહનમાં સ્થળ પર જ કચડીને નાશ કરાયો હતો અને પેઢી પાસેથી રૂ. 5,000 નો વહીવટી ચાર્જ વસૂલી સેવ, તીખી પાપડી, ગાંઠિયા, ચેવડાના નમૂના લેવાયા હતા. આ ઉપરાંત સત્ય સાંઈ રોડ પર આવેલ ‘ધ હેમ્પર સ્ટોર’માંથી એક્સપાયર થયેલ મોલ્ડ અને ચોકલેટ મળી કુલ 18 કિલો જથ્થાનો નાશ કરી રૂ. 2,000 નો દંડ વસૂલાયો હતો. ગીરીરાજ હોસ્પિટલથી જગન્નાથ ચોક વચ્ચે આવેલી શિવમ મેડિસિન્સ, પ્રતીક મેડિસિન્સ, શ્રી ગણેશ ડેરીફાર્મ, સુમિત પ્રોવિઝન, ચિત્રા પ્રોવિઝન, સતનામ જનરલ સ્ટોર્સ તેમજ અલીમ ટાઉનશીપની ક્રિષ્ના ટ્રેડિંગ પાસેથી ફૂડ લાઇસન્સ સંદર્ભે દંડ વસૂલી સૂચના આપવામાં આવી હતી. સમગ્ર ઝુંબેશ દરમિયાન ફૂડ સેફ્ટી & સ્ટાન્ડર્ડ એક્ટ-2006 હેઠળ વધુ 5 શંકાસ્પદ ખાદ્ય નમૂનાઓ મેળવી લેબોરેટરી તપાસ અર્થે મોકલી આપવામાં આવ્યા છે. તંત્ર દ્વારા સ્પષ્ટ ચેતવણી આપવામાં આવી છે કે તહેવારો દરમિયાન નાગરિકોના સ્વાસ્થ્ય સાથે ચેડાં કરનારા કોઈપણ વેપારીને બક્ષવામાં આવશે નહીં.

રાજકોટ મહાનગરપાલિકાના ફૂડ વિભાગ દ્વારા શહેરના વિવિધ વિસ્તારોમાંથી લેવામાં આવેલા લૂઝ પનીરના નમૂના લેબોરેટરી પૃથ્થકરણ રિપોર્ટમાં નિર્ધારિત ધારાધોરણ મુજબના ન જણાતાં કુલ 4 પેઢીઓ સામે એજ્યુડિકેશન કેસ દાખલ કરી કાનૂની કાર્યવાહી હાથ ધરવામાં આવી છે. લેબ રિપોર્ટની વિગત મુજબ, લાતી પ્લોટ શેરી નં. 4માં આવેલ ‘ફોર્ચ્યુન મિલ્ક & ફૂડ પ્રોડક્ટસ’માંથી લેવાયેલા પનીરમાં ‘ટેસ્ટ ફોર ફોરેન ફેટ’નું પ્રમાણ નિયમ કરતાં વધુ મળી આવતાં નમૂનો સબસ્ટાન્ડર્ડ જાહેર થયો છે. જ્યારે જામનગર રોડ, પુનિતનગર મેઇન રોડ સ્થિત ‘શ્રી ગાયત્રી ડેરીફાર્મ’ના પનીરમાં મિલ્ક ફેટનું પ્રમાણ નિર્ધારિત ધોરણ કરતાં ઓછું, મોરબી રોડ, સેટેલાઈટ ચોક પાસે આવેલ ‘પ્રકાશભાઈ પ્રવીણભાઈ હરસોડા’ તેમજ ગોંડલ રોડ, વિજય પ્લોટ-11ના ખૂણે આવેલ ‘ભગવતી ટ્રેડીંગ’માંથી લેવાયેલા લૂઝ પનીરના નમૂનાઓમાં મિલ્ક ફેટનું પ્રમાણ ઓછું તેમજ ભેજ (મોઈસ્ચર) અને ફોરેન ફેટ બંનેનું પ્રમાણ ધારાધોરણ કરતાં વધુ મળી આવતાં આ બંને પેઢીઓના નમૂના પણ ફેઈલ જાહેર થયા છે.