શહેરીજનોને શુદ્ધ અને ગુણવત્તાયુક્ત ખોરાક મળી રહે તે હેતુથી ફૂડ વિભાગનું સઘન ચેકિંગ
ડિસ્પ્લે પર ગોઠવેલું ફરસાણ નીકળ્યું એક્સપાયરી ડેટ વાળું, મનપાએ નોટિસ ફટકારી સંતોષ માન્યો
- Advertisement -
નાનખટાઈ, ટોસ્ટ અને ખાખરા બધું જ એક્સપાયર્ડ: રાધે ડેરીમાંથી 32 કિલો અખાદ્ય જથ્થો ઝડપાયો
વેચાણ માટે રાખેલી ખારીશિંગ, ભાખરી અને ચકરીના પેકિંગ પર તારીખ વીતી ગઈ હોવાનું ખૂલ્યું
ખાસ-ખબર ન્યૂઝ રાજકોટ
- Advertisement -
રાજકોટ મહાનગરપાલિકાના ફૂડ વિભાગ દ્વારા શહેરીજનોના આરોગ્યની સુખાકારી માટે શહેરના વિવિધ વિસ્તારોમાં સઘન સર્વેલન્સ ચેકિંગ હાથ ધરવામાં આવ્યું છે. આ કામગીરી અંતર્ગત ફૂડ વિભાગની ટીમે જુદી જુદી પેઢીઓ પર દરોડા પાડીને કુલ 63 કિલોગ્રામ જેટલો અખાદ્ય અને એક્સપાયરી ડેટ વાળો જથ્થો ઝડપી પાડી તેનો સ્થળ પર જ નાશ કર્યો છે, જ્યારે નિયમોનું ઉલ્લંઘન કરનારા વેપારીઓ સામે કડક કાર્યવાહી હાથ ધરી છે.
મનપાની ફૂડ શાખા દ્વારા કિડવાઈ નગર મેઇન રોડ, સદગુરુ પાર્ક, 150 ફૂટ રિંગ રોડ ખાતે આવેલી “જૈન સ્વીટ નમકીન સ્નેક” નામની પેઢીમાં તપાસ કરવામાં આવી હતી. આ તપાસ દરમિયાન ફ્રીઝમાં સંગ્રહ કરીને રાખેલો ફરસાણ બનાવવાનો વાસી લોટ, પડતર અને વાસી થઈ ગયેલા સમોસા, સમોસાનો વાસી મસાલો તેમજ ગંદકી વાળી જગ્યાએ રાખેલા કાપેલા પપૈયા મળી આવ્યા હતા. તંત્ર દ્વારા આ તમામ 31 કિલોગ્રામ અખાદ્ય જથ્થાનો સ્થળ પર જ નાશ કરવામાં આવ્યો હતો અને ત્યાંથી પપૈયાના સંભારાનો નમૂનો લેબોરેટરી ટેસ્ટિંગ માટે લેવાયો હતો.
આ ઉપરાંત, ફૂડ વિભાગની ટીમે સત્યસાંઇ રોડ પર આવેલી “રાધે ડેરી સ્વીટ” નામની પેઢીમાં પણ આકસ્મિક ચેકિંગ હાથ ધર્યું હતું. અહીં વેચાણ માટે ડિસ્પ્લે પર રાખવામાં આવેલી નાનખટાઈ, ટોસ્ટ, ખારીશિંગ, ભાખરી, ચકરી અને ખાખરા સહિતના ફરસાણના પેકિંગ તપાસતા તમામ પ્રોડક્ટ્સ પર એક્સપાયરી ડેટ વીતી ગઈ હોવાનું સામે આવ્યું હતું. ગ્રાહકોના આરોગ્ય સાથે ચેડાં કરતી આ એક્સપાયરી થયેલી પ્રોડક્ટ્સના કુલ 32 કિલોગ્રામ અખાદ્ય જથ્થાનો પણ સ્થળ પર જ નાશ કરવામાં આવ્યો હતો, તેમજ પેઢીને હાઈજેનિક કન્ડિશન અને યોગ્ય સ્ટોરેજ જાળવવા બાબતે કડક નોટિસ ફટકારવામાં આવી હતી.
બીજી તરફ, ફૂડ વિભાગની ટીમ અને ઋજઠ (ફૂડ સેફ્ટી ઓન વ્હીલ્સ) વાન સાથે શહેરના આજીડેમ અને માંડા ડુંગર વિસ્તારમાં ખાધ્યચીજોનું વેચાણ કરતા કુલ 20 ધંધાર્થિઓની ચકાસણી કરવામાં આવી હતી અને સ્થળ પર 12 નમૂનાઓ ચેક કરાયા હતા. આ દરમિયાન ફૂડ લાયસન્સ વગર જ ધંધો કરતા 8 ધંધાર્થીઓને તાકીદે લાઇસન્સ મેળવી લેવા માટે સૂચના આપવામાં આવી હતી. જેમાં મિલન ખમણ, શક્તિકૃપા ફરસાણ, દ્વારકેશ ગાંઠિયા, ચામુંડા પ્રોવિઝન સ્ટોર, ચામુંડા ફરસાણ, જયભોલે કેરી રસ, શ્રી ગણેશ મેડિકલ અને બાલાજી ખમણનો સમાવેશ થાય છે. આ સિવાય એવરીડે સુપર માર્કેટ, રોનક ચાઇનીઝ, રાધે ડેરીફાર્મ, ગુનગુન પાણિપુરી, ખોડિયાર સોડા શોપ સહિત અન્ય 12 દુકાનોની પણ ચકાસણી કરવામાં આવી હતી.
તંત્ર દ્વારા ફુડ સેફ્ટી સ્ટાન્ડર્ડ એક્ટ-200ભજ્ઞમય હેઠળ લેબોરેટરી પરીક્ષણ માટે કુલ 3 નમૂના લેવામાં આવ્યા છે, જેમાં ‘જૈન સ્વીટ નમકીન સ્નેક્સ’માંથી પપૈયાનો સંભારો (પ્રિપેર્ડ લૂઝ) તેમજ ભક્તિનગર સ્ટેશન પ્લોટમાં ગોડાઉન રોડ પર આવેલ ’આત્મીય એન્ટરપ્રાઇઝ’માંથી વાડીલાલ ચોપાટી કુલ્ફી આઇસ્ક્રીમ અને વાડીલાલ બડાબાઇટ આઇસ્ક્રીમ રેડ વેલ્વેટના પેકિંગનો સમાવેશ થાય છે. ફૂડ વિભાગની આ કડક કાર્યવાહીથી અખાદ્ય ચીજો વેચતા વેપારીઓમાં ફફડાટ વ્યાપી ગયો છે.
