પાકિસ્તાન શેરબજારમાં કોહરામ: ભારતના ઓપરેશન સિંદૂર પછી કરાચી સ્ટોક એક્સચેન્જ 6% તૂટી ગયું

ભારત-પાકિસ્તાન સંઘર્ષ: પાકિસ્તાનનો મુખ્ય શેરબજાર સૂચકાંક, કરાચી-100, બુધવારે શરૂઆતના વેપાર દરમિયાન 6,272 પોઈન્ટ અથવા લગભગ 6 ટકા ગગડી ગયો, જે મંગળવારના 113,568.51 ના બંધ દરની તુલનામાં 107,296.64 ના નીચલા સ્તર પર પહોંચ્યો.

પહેલગામ આતંકવાદી હુમલાના જવાબમાં ભારત દ્વારા હાથ ધરવામાં આવેલા ઓપરેશન સિંદૂરને કારણે ભારતીય શેર માર્કેટમાં ઉછાળો આવ્યો તો બીજી તરફ પાકિસ્તાનના શેરબજારમાં ભારે અરાજકતા જોવા મળી અને રોકાણકારો ડરી ગયા છે. પાકિસ્તાનમાં આતંકવાદી ઠેકાણા પર થયેલા હુમલા બાદ બુધવારે પાકિસ્તાનનો બેન્ચમાર્ક સ્ટોક ઇન્ડેક્સ 5.78 ટકાના મોટા ઘટાડા સાથે ખુલ્યો. શરૂઆતના કારોબારમાં KSE-100 ઇન્ડેક્સ 6,272 પોઈન્ટ મતલબ કે 5.5 ટકા ઘટીને 107,296 પર ટ્રેડ થઈ રહ્યો હતો.

23 એપ્રિલથી અત્યાર સુધીમાં તેમાં 9,930 પોઈન્ટનો મોટો ઘટાડો જોવા મળ્યો છે. ઉલ્લેખનીય છે કે, 22 એપ્રિલે જમ્મુ-કાશ્મીરના પહેલગામમાં હુમલો થયો હતો અને તેમાં 26 લોકો માર્યા ગયા હતા. મૃત્યુ પામેલા મોટાભાગના પ્રવાસીઓ હતા. સુરક્ષા એજન્સીઓની તપાસમાં જાણવા મળ્યું કે આ હુમલો સરહદ પારના સંબંધો સાથે જોડાયેલો હતો.

પાકિસ્તાનના શેર બજારમાં કોહરામ
પહેલગામ હુમલા બાદ ભારત સરકારે પાકિસ્તાન સાથેના તમામ સંબંધોનો અંત લાવવાની જાહેરાત કરી છે. જેમાં વેપારનો પણ સમાવેશ થાય છે. ભારત સરકારના આ પગલા બાદ એક તરફ તેની અર્થવ્યવસ્થા પર ખરાબ અસર પડી રહી છે, તો બીજી તરફ પાકિસ્તાનનું શેરબજાર સતત તૂટી રહ્યું છે. પાકિસ્તાનના શેરબજારમાં ઘટાડાને કારણે અત્યાર સુધીમાં રોકાણકારોના અબજો રૂપિયાનું નુકસાન થયું છે.

સાર્ક વિઝામાં છુટને રદ કરવાની સાથે પાકિસ્તાની રાજદ્વારીઓની સંખ્યા ઘટાડવા અને સિંધુ જળ સંધિ રદ કરવાની કાર્યવાહીથી પણ પાકિસ્તાન પરેશાન હતું. 22 એપ્રિલના રોજ પહેલગામ આતંકવાદી ઘટના બાદ કરાચી સ્ટોક એક્સચેન્જનો બેન્ચમાર્ક KSE-100 ઇન્ડેક્સ 24 એપ્રિલના રોજ ટ્રેડિંગની થોડી મિનિટોમાં 2,485 પોઈન્ટ ઘટ્યો હતો.

અબજો રૂપિયા થયા સ્વાહા
22 એપ્રિલ બાદ KSE ઇન્ડેક્સમાં 5,494.78 પોઈન્ટ મતલબ કે, 4.63 ટકાનો ઘટાડો જોવા મળ્યો છે. કરાચી સ્ટોક એક્સચેન્જનું માર્કેટ કેપ $52.84 બિલિયન હતું, પરંતુ 29 એપ્રિલના રોજ તે 100 પોઈન્ટ ઘટીને $50.39 બિલિયન થયું.

થોડા દિવસોમાં પાકિસ્તાની શેરબજારમાં $2.45 બિલિયનથી વધુનું નુકસાન થયું છે. પહેલેથી જ નાણાકીય કટોકટીનો સામનો કરી રહેલ પાકિસ્તાન હવે વધુ ગંભીર આર્થિક પડકારનો સામનો કરી રહ્યું છે. મે 2023માં પાકિસ્તાનમાં ફુગાવો 38.5 ટકા વધ્યો હતો. સાથે વિદેશી હૂંડિયામણ ભંડાર 3.7 બિલિયન ડોલરથી ઓછું રહ્યું હતું.