ટેસ્ટ ક્રિકેટના કુલ રન જેટલી જ તેની કિંમત રાખીને લોન્ચ કરવામાં આવેલા શૂઝની કિંમત રૂ.9230
ખાસ ખબર ન્યૂઝ નવી દિલ્હી
- Advertisement -
ક્રિકેટના મેદાન પર રન મશીન તરીકે જાણીતા વિરાટ કોહલીએ હવે બિઝનેસની દુનિયામાં પણ પોતાની આગવી ઓળખ ઉભી કરી છે. વિરાટ કોહલી માત્ર એક શ્રેષ્ઠ ખેલાડી જ નથી, પરંતુ એક ખૂબ જ સફળ બિઝનેસમેન પણ છે. તેમના દ્વારા લોન્ચ કરવામાં આવેલા ‘One8’ બ્રાન્ડના શૂઝે હાલમાં માર્કેટમાં ધૂમ મચાવી દીધી છે. આ શૂઝ માર્કેટમાં માત્ર ચાલી નથી રહ્યા, પરંતુ જાણે કે ઉસેન બોલ્ટની ઝડપે દોડી રહ્યા છે. તાજેતરના આંકડાઓ જોતા લાગે છે કે આટલી મોટી સફળતાની કદાચ તેના નિર્માતાઓએ પણ કલ્પના નહીં કરી હોય.
મીડિયા અહેવાલો અનુસાર લોન્ચિંગના માત્ર 24 કલાકની અંદર One8ના અંદાજે 1,50,000 જોડી શૂઝ વેચાઈ ગયા છે. જો આપણે એક શૂઝની કિંમત 9230 રૂપિયા ગણીએ તો 24 કલાકમાં થયેલું કુલ વેચાણ આશરે 1,38,45,00,000 રૂપિયા એટલે કે લગભગ 140 કરોડ રૂપિયા થાય છે. વિરાટ કોહલીના ટેસ્ટ ક્રિકેટના કુલ રન જેટલી જ તેની કિંમત રાખીને લોન્ચ કરવામાં આવેલા આ શૂઝે બજારમાં જે રીતે તરખાટ મચાવ્યો છે તે અભૂતપૂર્વ છે. આ આંકડાઓ સ્પષ્ટ કરે છે કે વિરાટ કોહલીની બ્રાન્ડ વેલ્યુ કેટલી ઊંચી છે.
વિરાટ કોહલી અને સ્પોર્ટ્સ બ્રાન્ડ ‘પૂમા’ (Puma) વચ્ચેનો સંબંધ વર્ષો જૂનો અને ખૂબ જ સફળ રહ્યો છે. વર્ષ 2017માં જ્યારે વિરાટે આ જર્મન કંપની સાથે હાથ મિલાવ્યા હતા ત્યારે તે ભારતમાં પૂમાનો સૌથી મોટો ચહેરો બન્યા હતા. અહેવાલો મુજબ આ ડીલ માટે તેમને લગભગ 110 કરોડ રૂપિયા આપવામાં આવ્યા હતા. આ માત્ર એક બ્રાન્ડ એમ્બેસેડર તરીકેની ડીલ ન હતી પરંતુ એક ઊંડી ભાગીદારી હતી. વિરાટે પોતાની ‘One8’ બ્રાન્ડ હેઠળ પૂમા સાથે મળીને શૂઝથી લઈને કપડાં સુધીની આખી શ્રેણી લોન્ચ કરી હતી. આ ભાગીદારી એટલી સફળ રહી કે પૂમાએ આ શ્રેણી દ્વારા 250 કરોડ રૂપિયાનો બિઝનેસ કર્યો હતો.
- Advertisement -
વિરાટ કોહલીની સફળતાનું રહસ્ય તેમના ક્રિકેટના મેદાન પરના શિસ્તબદ્ધ અભિગમમાં રહેલું છે. તેઓ પોતાની પ્રોડક્ટના લોન્ચિંગ માટે પણ એટલી જ તૈયારી કરે છે જેટલી એક મોટી મેચ માટે કરતા હોય છે. પોતાની ફિટનેસ, સ્ટાઇલ અને મેદાન પરના પ્રદર્શનને કારણે વિરાટ યુવાનો માટે એક આદર્શ છે, અને લોકો તેમના દ્વારા લોન્ચ કરવામાં આવેલી પ્રોડક્ટ્સ પર આંધળો વિશ્વાસ મૂકે છે. One8ની આ સફર તો માત્ર શરૂઆત છે, અને આવનારા સમયમાં વિરાટ કોહલી બિઝનેસ જગતમાં નવા શિખરો સર કરે તો નવાઈ નહીં.
વિરાટ કોહલીએ પૂમાની 300 કરોડની ઓફરને નકારી રચ્યો ઈતિહાસ
વિરાટ કોહલીના બિઝનેસ નિર્ણયો હંમેશા ચોક્કસ અને દૂરોગામી હોય છે. કહેવાય છે કે પૂમાએ તેમની સાથેની ભાગીદારીને લંબાવવા માટે 300 કરોડ રૂપિયાનું અધધ ઓફર આપ્યું હતું પરંતુ વિરાટે તેને ઠુકરાવી દીધું હતું. આ નિર્ણય પાછળનું મુખ્ય કારણ પૂમા ઈન્ડિયાના પૂર્વ મેનેજિંગ ડિરેક્ટર અભિષેક ગાંગુલી હતા. અભિષેક ગાંગુલીએ 2023માં ‘Agilitas’ નામથી એક નવું સ્પોર્ટ્સવેર અને લાઈફસ્ટાઈલ સ્ટાર્ટઅપ શરૂ કર્યું. આ સ્ટાર્ટઅપને મોટું ભંડોળ મળ્યું અને તેમણે ‘Mochiko Shoes’ જેવી દિગ્ગજ ફૂટવેર કંપનીઓને ખરીદીને બજારમાં મજબૂત પકડ જમાવી. વિરાટ કોહલી હવે આ બ્રાન્ડનો ચહેરો બન્યા છે. વિરાટની પોતાની ‘One8’ બ્રાન્ડ હવે ‘Agilitas’નો જ એક ભાગ બની ગઈ છે. પરિણામ સામે છે – માત્ર એક જ દિવસમાં 140 કરોડનું વેચાણ.
