ઇરાન યુધ્ધ ટ્રમ્પ માટે ગળાનું હાટકું બન્યુ : 3.38 લાખ કરોડ સ્વાહા, પરિણામ શૂન્ય

હવે બીજા 90 અબજનો ડોળો : 28 ફેબ્રુઆરીથી ચાલી રહેલા જંગમાં 18 અમેરિકી સૈનિકના મોત

સંરક્ષણ સચિવ પીટ હેગસેથને કૉંગ્રેસમાં આકરા સવાલોનો સામનો કરવો પડ્યો

ઈરાન સામેની ટક્કર અને યુદ્ધનો નિર્ણય અમેરિકી રાષ્ટ્રપતિ ડોનાલ્ડ ટ્રમ્પ માટે ભારે સાબિત થઈ રહ્યો છે. અમેરિકી જનતાના પરસેવાની કમાણી બોમ્બ અને મિસાઈલો પાછળ વેડફાઈ રહી હોવાનો આક્ષેપ થઈ રહ્યો છે. આશરે ૩૭.૫ બિલિયન (અંદાજે ₹૩.૩૮ લાખ કરોડ) ફંકી માર્યા છતાં પણ આર્થિક આંચકા અને સૈનિકોના અકાળે મોતના કડવા અનુભવ સિવાય અમેરિકાના હાથે કંઈ લાગ્યું નથી. વોશિંગ્ટનમાં કોંગ્રેસની સદન સમક્ષ – સુનાવણી દરમિયાન સંરક્ષણ સચિવ પીટ હેગસેથે પહેલીવાર જાહેરમાં સ્વીકાર્યું હતું કે આ યુદ્ધ પાછળ અત્યાર સુધીમાં ૩૭.૫ બિલિયનનો ખર્ચ થઈ ચૂક્યો છે અને યુદ્ધ આગળ ચલાવવા માટે ટ્રમ્પ શાસનને વધુ ૯૦ અબજના વધારાના ભંડોળની જરૂર છે.

વોશિંગ્ટનમાં સેનેટ એપ્રોપ્રિએશન્સ કમિટીની સુનાવણી દરમિયાન ડેમોક્રેટ્સ અને કાયદા નિર્માતાઓએ યુએસ ડિફેન્સ સેક્રેટરી પીટ હેગસેથ પર તીખા પ્રહારો કર્યા હતા. કાયદા ઘડનારાઓએ આક્ષેપ કર્યો કે ૨૮ ફેબ્રુઆરીથી શરૂ થયેલા આ હુમલાઓનું સાચું ચિત્ર સરકારે છુપાવી રાખ્યું હતું અને હવે જનતા પર કરબોજ વધારવા માટે નવા

બજેટની માંગણી કરાઈ રહી છે. આ અપ્રિય યુદ્ધના કારણે યુએસમાં રાષ્ટ્રપતિ ડોનાલ્ડ ટ્રમ્પની લોકપ્રિયતામાં મોટો ઘટાડો નોંધાયો છે. આગામી ૬ મહિનામાં મિડટર્મ (મધ્યસત્ર) ચૂંટણીઓ આવી રહી છે, ત્યારે હાઉસ ઓફ રિપ્રેઝન્ટેટિવ્સ અને સેનેટમાં રિપબ્લિકન પાર્ટીનું પ્રભુતુ જોખમમાં મુકાયું છે અને ડેમોક્રેટ્સ ઓપિનિયન પોલમાં આગળ ચાલી રહ્યા છે.

ઈરાન સાથેના સંઘર્ષમાં પેન્ટાગોનના અહેવાલ મુજબ, જુલાઈના પ્રારંભથી અત્યાર સુધીમાં વધુ ૩ અમેરિકી સૈનિકો માર્યા જતાં કુલ મૃત્યુઆંક ૧૮ (અગાઉ ૧૭) થયો છે અને ૧૦૦થી વધુ સૈનિકો ઈજાગ્રસ્ત થયા છે. સેનેટર પેટી મુરેએ આકરા શબ્દોમાં ટીકા કરતાં જણાવ્યું કે, “ટ્રમ્પ વારંવાર શાંતિ સમજૂતીની વાતો કરે છે પરંતુ સામે વધુ ૭૦થી ૯૦ અબજની માંગણી કરીને દેશને ક્યારેય ન પૂરા થનારા યુદ્ધમાં ધકેલી રહ્યા છે.” રિપબ્લિકન પાર્ટી દ્વારા કુલ ૯૫ બિલિયનનું પેકેજ તૈયાર કરાઈ રહ્યું છે, જેમાં આ યુદ્ધ ઉપરાંત કૃષિ સહાય અને રાષ્ટ્રીય સુરક્ષાની જરૂરિયાતો વણી લેવાઈ છે, પરંતુ કોંગ્રેસમાં તેને સખત વિરોધનો સામનો કરવો પડી રહ્યો છે.