મંતવ્ય ન્યૂઝના સ્ટિંગ ઓપરેશનમાં એલન-આકાશના શિક્ષણ કૌભાંડનો પર્દાફાશ

એલન-આકાશ ઇન્સ્ટિટ્યૂટ કૌભાંડ પર જન આક્રોશ : સોશિયલ મીડિયામાં રોષની લહેર, શૈક્ષણિક માફિયાઓને જેલ હવાલે કરવા માગ

વાલીઓ અને જનતા માગે છે ડમી એડમિશન કરતી સ્કૂલ અને કોચિંગ ક્લાસિસ વિરુદ્ધ કડક કાનૂની કાર્યવાહી

ખાસ-ખબર ન્યૂઝ રાજકોટ

ગુજરાતમાં શિક્ષણના નામે ચાલતા કૌભાંડનો મંતવ્ય ન્યૂઝના સ્ટિંગ ઓપરેશનથી પર્દાફાશ થયા બાદ ડમી એડમિશન કરતી શાળા સ્કૂલ અને કોચિંગ ક્લાસિસ વિરુદ્ધ સોશિયલ મીડિયા પર જન આક્રોશની લહેર ફેલાઈ છે. એલન અને આકાશ ઇન્સ્ટિટ્યૂટની ગેરકાયદે પ્રવૃત્તિઓ, જેમાં ડમી એડમિશન અને સ્કૂલો સાથેની સાંઠગાંઠનો સમાવેશ થાય છે, તેની સામે વાલીઓ અને જનતાએ રોષ વ્યક્ત કર્યો છે. સોશિયલ મીડિયા પ્લેટફોર્મ્સ પર લોકોની એક જ માગ છે, એલન-આકાશને જેલ હવાલે કરો!
મંતવ્ય ન્યૂઝના ખુલાસા બાદ સોશિયલ મીડિયા પર લોકોનો ગુસ્સો ફાટી નીકળ્યો છે. કોમેન્ટ્સમાં વાલીઓ અને વિદ્યાર્થીઓએ આકાશ અને એલનની શિક્ષણની આડમાં ચાલતી લૂંટને ધંધો ગણાવીને ટીકા કરી છે. મંતવ્ય ન્યૂઝના સ્ટિંગમાં ખુલાસો થયો છે કે, એલન અને આકાશ કેટલીક સ્કૂલો સાથે મળીને ડમી એડમિશનનો ધંધો ચલાવે છે. વિદ્યાર્થીઓને સ્કૂલમાં હાજરી આપવાની જગ્યાએ કોચિંગમાં રાખવામાં આવે છે, જ્યારે સ્કૂલો ખોટી હાજરી બતાવીને ફી વસૂલે છે. આ ગેરરીતિઓથી વિદ્યાર્થીઓનું શૈક્ષણિક નુકસાન થઈ રહ્યું છે, અને વાલીઓની લાખો રૂપિયાની લૂંટ થઈ રહી છે.
અમુક સ્કૂલે મંતવ્ય ન્યૂઝની તપાસ દરમિયાન મીડિયાને ધમકીઓ પણ આપી, જેને લોકોએ વિનાશ કાળે વિપરીત બુદ્ધિ ગણાવી. સ્કૂલના સ્ટાફની આ દાદાગીરીએ કૌભાંડની ગંભીરતાને વધુ ઉજાગર કરી છે. સોશિયલ મીડિયા પર લોકોએ આ ધમકીઓની સખત ટીકા કરી અને આવી સંસ્થાઓ સામે કડક કાર્યવાહીની માગ કરી છે. ઘણા વાલીઓએ જણાવ્યું હતું કે, તેઓ પોતાના બાળકોના ઉજ્જવળ ભવિષ્ય માટે મોટી રકમ ચૂકવે છે, પરંતુ બદલામાં તેમને શાળાનું શિક્ષણ મળતું નથી. આ ઉપરાંત અન્ય સ્ટિંગ ઓપરેશનમાં પણ એલન અને આકાશ ઇન્સ્ટિટ્યૂટ જેવી કોચિંગ સંસ્થાઓની સમાન પ્રકારની ગેરરીતિઓ સામે આવી છે, જે શિક્ષણના પવિત્ર વ્યવસાયને કલંકિત કરી રહી છે.

રાજકોટની ક્રિષ્ના ઈન્ટરનેશનલ સ્કૂલ ડમી એડમિશનનું હેડક્વાર્ટર

DEO દીક્ષિત પટેલ ડમી એડમિશન કરતી સ્કૂલ અને એલન-ફિનોલ જેવા કોચિંગ ક્લાસિસ વચ્ચે ક્લાર્કની ભૂમિકામાં!

રાજકોટમાં એલન અને ફિલોન ઇન્સ્ટિટ્યૂટ સાથે કેટલીક સ્કૂલની ગુપ્ત સાંઠગાંઠ ચાલી રહી છે. સ્કૂલના રજીસ્ટરમાં વિદ્યાર્થીઓના નામ નોંધાય છે, પરંતુ આ વિદ્યાર્થીઓ સ્કૂલમાં ભણવા જતા નથી. એલન અને ફિનોલ જેવા કોચિંગ ક્લાસિસ ક્રિષ્ના ઈન્ટરનેશનલ, અર્પિત, પી એન બી, પરિશ્રમ વગેરે જેવી સ્કૂલ સાથે મળીને નકલી એડમિશનનું એક મોટું કાવતરું ચલાવી રહી છે. શિક્ષણની આડમાં નાણાકીય લાભ મેળવવાની રમત રમાઈ રહી છે, જેનો ભોગ વિદ્યાર્થીઓ અને તેમના વાલીઓ બની રહ્યા છે ત્યારે જિલ્લા શિક્ષણાધિકારી દીક્ષિત પટેલ ખુદ વહેંચાઈને કોચિંગ ક્લાસિસ તેમજ ડમી સ્કૂલ વચ્ચે ક્લાર્કની ભૂમિકામાં હોય એવું લાગી રહ્યું છે. ભાવનગર રોડ પર આવેલી ક્રિષ્ના ઇન્ટરનેશનલ સ્કૂલના રજીસ્ટરમાં વિદ્યાર્થીઓના નામ નોંધાય છે, પરંતુ આ વિદ્યાર્થીઓ શાળામાં ભણવા જતા નથી. તેના બદલે, તેઓ સીધા એલન કે ફિનોલના કોચિંગ ક્લાસરૂમમાં અભ્યાસ કરે છે. આ રીતે એડમિશન શાળામાં, અભ્યાસ એલનમાં!