નવા બ્રિજ તૂટી પડવાની ઘટનાઓમાં રાજકોટ શહેરમાં મળી મજબૂતીની આશા: ગુણવત્તાની તપાસમાં સફળ રહેતા હવે લોકાર્પણની તડામાર તૈયારી
ખાસ-ખબર સંવાદદાતા
રાજ્યમાં વિવિધ સ્થળોએ ઓવરબ્રિજ અને રસ્તાઓના લોકાર્પણ થઈ રહ્યા છે, પણ નબળા કામ થયાની ફરિયાદો પણ વધી છે. બ્રિજમાં તિરાડો પડી રહી છે બેસી રહ્યા છે તેમજ રોડ ધોવાઈ રહ્યા છે. રાજકોટ શહેરમાં કેકેવી બ્રિજનું કામ આખરી તબક્કે છે ત્યારે તે કેટલો મજબૂત છે તેમજ લોડ ટેસ્ટિંગ થયું છે કે નહિ તે અંગે બ્રિજ સેલના ઈજનેરોને પૂછવામાં આવતા કેકેવી બ્રિજ ડિઝાઈન મુજબના લોડ ટેસ્ટમાં પાસ થયાનું જણાવ્યું છે. 30 ટન વજન ભરેલી એક એવી 6 ટ્રક 180 ટન વજન સ્ટીલ ગર્ડર અને 34 ટન વજન ભરેલી 4 ટ્રક સિમેન્ટ ગર્ડર પર 24 કલાક સુધી રાખી હતી. જો કે, બ્રિજ ખુલ્લો મુક્યા બાદ જ ગુણવત્તામાં ખરો ઉતર્યો છે કે નહીં તે ખબર પડશે.
- Advertisement -
સિટી એન્જિનિયર કે.એસ. ગોહેલે જણાવ્યું હતું કે, બ્રિજનું કામ આખરી તબક્કે હતું ત્યારે જ લોડ ટેસ્ટિંગ પણ હાથ ધરાયું હતું. બ્રિજમાં સૌથી વચ્ચેનો ભાગ સ્ટીલ ગર્ડરનો છે જ્યારે બાકીનો ભાગ સિમેન્ટમાંથી બનેલા ગર્ડર છે આ માટે બંને સ્થળે અલગ અલગ ટેક્નિકથી લોડ ટેસ્ટિંગ કરાયું હતું. જેમાં વજન ભરેલી ટ્રક મુકાઇ હતી અને 24 કલાક સુધી રાખીને વજનને કારણે બ્રિજની સપાટી માપી હતી જેમાં જરૂરી હોય તેટલું ડિફ્લેક્શન એટલે કે ઝુકાવ જોવા મળ્યો છે.
ગર્ડરના બ્રિજ હોય તેમાં ગર્ડર હંમેશા ઝૂકતા અને ઉપર આવતા હોય છે સાદી ભાષામાં તેને વર્કિંગ કે ફ્લેક્સિંગ કહેવાય છે. એક લિમિટ સુધી ગર્ડર ઝૂકવો જોઇએ અને ત્યારબાદ ઝૂકવો ન જોઈએ. આ મર્યાદા જે તે બ્રિજની ડિઝાઈન વખતે જ નક્કી થઈ હોય છે. કેકેવી બ્રિજમાં સ્ટીલ ગર્ડરમાં આ મંજૂરીની મર્યાદા 22.63 એમએમ હતી જ્યારે સિમેન્ટ ગર્ડરમાં 4.25 એમએમ હતી. લોડ ટેસ્ટિંગમાં આ બંને રેંજ કરતા ઓછું ડિફ્લેક્શન નોંધાયું છે.
આ રીતે કરાયું બ્રિજનું લોડ ટેસ્ટિંગ; ઈજનેરો અને અધિકારીઓએ સતત નજર રાખી
1 સૌથી પહેલા જે ભાગમાં ટેસ્ટિંગ કરવાનું હતું તેનું તાપમાન અને માપ નોંધવામાં આવ્યું
2 લોડ ટેસ્ટિંગ માટે એક ટ્રક સ્થળ પર પાર્ક કરાઇ હતી (સ્ટીલમાં 34 ટન અને સિમેન્ટમાં 30 ટન)
3 6 કલાકમાં ધીરે ધીરે તમામ ટ્રક પાર્ક કરાયા હતા અને બધા વચ્ચેનું અંતર ન્યુનતમ રખાયું હતું સામાન્ય રીતે આટલો વજન ટ્રાફિક એક સ્થળે રહેતો નથી
4 વજન સાથેના ટ્રક મૂકીને ગર્ડરનું ટેમ્પરેચર અને ડિફ્લેકશન માપવામાં આવ્યું હતું
5 બધી ટ્રક પાર્ક કરાયા બાદ તેમને 24 કલાક સુધી રાખવામાં આવી હતી, બાદમાં ફરી એક પછી એક દૂર કરી દેવાઇ હતી
6 તમામ ટ્રક દૂર કરાઇ ત્યારે પણ ડિફ્લેક્શન અને તાપમાન નોંધવામાં આવ્યા હતા.
લોકાર્પણ નક્કી થાય એટલે આગલી રાતે કલર થશે
સિટી એન્જિનિયરના જણાવ્યા અનુસાર બ્રિજમાં મોટું તમામ કામ પૂર્ણ કરી દેવાયું છે.
- Advertisement -
કલરકામ પણ થઈ ગયું છે અને નાના મોટા જોઈન્ટ હોય તેની તપાસ કરીને ટચઅપ ચાલી રહ્યું છે જે છેક લોકાર્પણ સુધી ચાલ્યા કરશે. સાઈનેઝ, થર્મોપ્લાસ્ટ, લાઈટિંગનું કામ થઈ ગયું છે. ટચઅપ ચાલતું હોવાથી લોકાર્પણની તારીખ નક્કી થશે તેના એક દિવસ પહેલા રંગકામનો છેલ્લો હાથ લાગશે.
