ખાખી માત્ર યુનિફોર્મ નથી, લોકોના વિશ્ર્વાસની જવાબદારી છે: PI જયેશ વાઢીયા

અહેવાલ:કૌશિક ગોંડલીયા 

પિતાનું અધૂરું સપનું પૂરું કરનાર જયેશ વાઢીયાની કોન્સ્ટેબલથી ઙ.ઈં. સુધીની અનોખી સફર યુવાનો માટે પ્રેરણા

ખાખી માત્ર યુનિફોર્મ નથી, લોકો ના વિશ્ર્વાસની જવાબદારી છે આ વિચારધારાને જીવનમંત્ર બનાવી નિષ્ઠા, પરિશ્રમ અને માનવતાના મૂલ્યો સાથે ફરજ બજાવતા રાજકોટ એ ડિવિઝનના પીઆઇ જયેશભાઇ વાઢીયાની જીવનયાત્રા આજે અનેક યુવાનો માટે પ્રેરણાસ્ત્રોત બની છે. સામાન્ય ગ્રામ્ય પરિવારમાં જન્મેલા જયેશભાઇએ સંઘર્ષ અને સંકલ્પના બળે પોલીસ વિભાગમાં એક આગવું સ્થાન પ્રાપ્ત કર્યું છે. જૂનાગઢ જિલ્લાના માણાવદર તાલુકાના થાપલા ગામે 22 ડિસેમ્બર 1990ના રોજ જન્મેલા જયેશભાઇ વાઢીયાએ ધોરણ 1થી લઇ કોલેજ સુધીનો અભ્યાસ જુનાગઢના સ્વામી વિવેકાનંદ વિનયમંદિરમાં પૂર્ણ કર્યો હતો. બાળપણથી જ શિસ્ત, મહેનત અને સમાજસેવાની ભાવના તેમના વ્યક્તિત્વમાં જોવા મળતી હતી. કોલેજ પૂર્ણ કર્યા બાદ વર્ષ 2011માં તેઓ પોલીસ વિભાગમાં કોન્સ્ટેબલ તરીકે જોડાયા. વર્ષ 2011થી 2016 સુધી પોરબંદર જિલ્લામાં કોન્સ્ટેબલ તરીકે નિષ્ઠાપૂર્વક ફરજ બજાવી. ફરજ દરમિયાન જ ઉચ્ચ પદ સુધી પહોંચવાનો સંકલ્પ કર્યો અને વર્ષ 2016માં પીએસઆઇની પરીક્ષા આપી સીધા જ પીએસઆઇ તરીકે પસંદગી મેળવી. કરાઇ ખાતે તાલીમ પૂર્ણ કર્યા બાદ વર્ષ 2017માં રાજકોટ ગ્રામ્યમાં પ્રથમ પોસ્ટિંગ મળ્યુ હતું. પીએસઆઇ તરીકે તેમણે જેતપુર તાલુકા, ધોરાજી, વીંછિયા અને ખાસ કરીને બે વર્ષ સુધી પડધરીમાં ફરજ બજાવી હતી. પડધરી વિસ્તારમાં અનેક મર્ડર અને જટિલ ગુનાઓ ઉકેલી તેઓએ પોતાની તીક્ષ્ણ તપાસશક્તિ અને કડક વહીવટી છાપ ઉભી કરી હતી.
વર્ષ 2020માં જિલ્લા બદલી થતાં ખેડા જિલ્લામાં એસઓજી, એલસીબી અને ટ્રાફિક સહિત વિવિધ શાખાઓમાં ફરજ બજાવી. ખેડા જિલ્લામાં એસઓજીમાં ફરજ દરમિયાન ખેતરમાં ઉગાડવામાં આવેલ 550 કિલો ગાંજો તથા અંદાજે 54 લાખ રૂપિયાનો મુદ્દામાલ જપ્ત કરવાની મોટી કામગીરી સફળતાપૂર્વક પાર પાડી હતી. ઉપરાંત મીનાવાડા ગામમાં મર્ડર બાદ ફરાર થયેલા આરોપીને માત્ર 24 કલાકમાં ઝડપી લઇ પીડિત પરિવારને ઝડપી ન્યાય અપાવ્યો હતો. તેમની કારકિર્દીનો એક અત્યંત મહત્વનો તબક્કો વર્ષ 2024માં સામે આવેલ ચર્ચાસ્પદ સીરપ કાંડ રહ્યો હતો. આ કેસમાં એસઆઇટીના સભ્ય તરીકે જોડાઇ તેમણે તટસ્થ અને નિષ્પક્ષ તપાસ કરી આરોપીઓને સજા અપાવવામાં મહત્વની ભૂમિકા ભજવી હતી. તેમની નિષ્ઠા અને ઉત્તમ કામગીરીને માન્યતા સ્વરૂપે વર્ષ 2025ના ફેબ્રુઆરી માસમાં તેમને પીઆઇ તરીકે પ્રમોશન મળ્યું અને રાજકોટ સિટીમાં બદલી થઈ. હાલ તેઓ રાજકોટ શહેરના એ ડિવિઝન પોલીસ સ્ટેશનમાં પીઆઇ તરીકે ફરજ બજાવી રહ્યા છે.
જયેશભાઇ વાઢીયાની સફળતા પાછળ પરિવારની પ્રેરણાનું પણ વિશેષ સ્થાન રહ્યું છે. તેમના બંને મામા પોલીસ વિભાગમાં ફરજ બજાવે છે. તેમના પિતાએ વર્ષો પહેલા પોલીસ ભરતી માટે પ્રયત્ન કર્યો હતો, પરંતુ સફળતા મળી નહોતી. પિતાનું એ અધૂરું સપનું પુત્રએ પૂર્ણ કર્યું હોવાનો ગૌરવ આજે જયેશભાઇ અનુભવતા જોવા મળે છે. તેઓ માને છે કે ન્યાય માટે કડક અને માનવતા માટે નમ્ર રહેવું જ એક સાચા પોલીસ અધિકારીની ઓળખ છે. ફરજ પ્રત્યેની કડકતા સાથે સામાન્ય લોકો પ્રત્યે માનવતાભર્યું વર્તન જ તેમની કાર્યશૈલીની વિશેષતા બની છે. ફરજની વ્યસ્તતા વચ્ચે પણ તેઓ ક્રિકેટના ભારે શોખીન છે. ખાસ ખબર દ્વારા આયોજિત ક્રિકેટ ટૂર્નામેન્ટમાં પણ તેમણે પોલીસ વિભાગ તરફથી મેચ રમી શ્રેષ્ઠ પ્રદર્શન કરી રમતગમત પ્રત્યેનો જુસ્સો સાબિત કર્યો હતો. સામાન્ય ગામડાથી શરૂ થયેલી સફર આજે રાજકોટ શહેરના મહત્વના પોલીસ અધિકારી સુધી પહોંચી છે. પીઆઇ જયેશભાઇ વાઢીયાની આ સફર એ સાબિત કરે છે કે મક્કમ ઇરાદા, કઠોર મહેનત અને ઈમાનદારી હોય તો કોઈપણ સપનું સાકાર કરી શકાય છે.