નિવૃત ઈજનેર લલીત વાઢેરે ટીંબાવડીમાં સરકારી જમીનમાં ખોટો અભિપ્રાય આપી બિલ્ડરોને જમીન પધરાવી દીધી

નિવૃત સિટી ઇજનેર લલીત વાઢેરને 50 હજારનો દંડ ફટકારતા ગેરકાયદે બાંધકામનું ભૂત ફરી ધૂણ્યું

જૂનાગઢ મહાનગર પાલિકામાં લલિત વાઢેરનાં કાર્યકાળમાં થયેલાં બાંધકામની તપાસ થવી જોઇએ

તાત્કાલિક સિટી ઇજનેર વાઢેર રાજકીય નેતા અને બિલ્ડર લોબીનાં નજીકનાં માણસ

ખાસ-ખબર સંવાદદાતા

જૂનાગઢ મનપાની બાંધકામ શાખાનાં સિટી ઇજનેર લલિત વાઢેર નોકરી દરમિયાન પણ વિવાદમાં રહ્યા હતાં અને નોકરી બાદ પણ વિવાદ તેનો પીછો છડવાનું નામ લેતા નથી. લલિત વાઢેરનાં કાર્યકાળમાં રાજલક્ષ્મી પાર્કમાં બીએમ સ્કવેર નામનાં બિલ્ડીંગનાં બાંધકામમાં ખોટો અભિપ્રાય આપવાની ફરિયાદમાં તેમને કમિશ્નર રાજેશ તન્નાએ 50 હજાર રૂપિયાનો દંડ ફટકાર્યો છે. લલિત વાઢેરને દંડ થતા ફરી એક વખત જૂનાગઢમાં ગેરકાયદેસર બાંધકામનું ભૂત ધૂણ્યું છે. જૂનાગઢનાં ટીંબાવડીમાં સરકારની જમીનમાં પણ ખોટા અભિપ્રાય આપી બિલ્ડરોને જમીન પધરાવી દીધાની ફરિયાદ ઉઠી છે. તેમજ લલિત વાઢેરનાં કાર્યકાળમાં થયેલા બાંધકામની તપાસ કરવામાં આવે તો અનેકનાં તપેલા ચડી જાય તેમ છે. આ ઉપરાંત નિવૃત સિટી ઇજનેર રાજકીય નેતા અને બિલ્ડર લોબીનાં માનીતા હોવાનું પણ ચર્ચાઇ રહ્યું છે. ગઇકાલે લલિત વાઢેરને દંડ ફટકારવામાં આવ્યો છે. ત્યારે વધુ એક પ્રકરણમાં ખોટો અભિપ્રાય આપ્યાની રજુઆત થઇ છે. આ અંગે જૂનાગઢનાં રાજેશભાઇ ડવે કમિશ્નરને રજુઆત કરી જણાવ્યું છે કે,જૂનાગઢનાં ટીંબાવાડી સર્વે નં. 116 વાળી જમીન જે સરકારની માલિકીની છે. આજે પણ રેવન્યુ રેકોર્ડ ઉપર ચાલે છે. આ જમીન ટીપી સ્કીમમાં આવેલી નથી.

જમીન સરકારની પડતર ખેતર હોય નિયમાનુંસાર બીનખેતી કરવા જેવી કોઇ જ કાર્યવાહી કરવામાં આવી નથી. છતા પણ બાંધકામ મંજુરી આપી દેવામાં આવી હતી. ઉપરાંત જમીન વેંચાણ યોગ્ય હોવાનો અભિપ્રાય આપવામાં આવ્યો હતો. લલિત વાઢેર બિલ્ડર લોબીનાં નજીકનાં અધિકારી હોય તેમના દ્વારા સરકારની માલિકીની જમીન ગેરધોરણે ખાનગી બિલ્ડર્સને વેંચાણે આપવાની પ્રક્રિયામાં ખોટા અભિપ્રાય આપવામાં આવ્યાં હતાં. તેમજ ખોટી રીતે દરખાસ્તો કરી સરકારી જમીન ગેરકાયદે વેંચાણ માટે આપી ગુનાહીત કાર્ય કર્યું હતું. આ અંગે યોગ્ય તપાસ કરી જવાબદાર તમામ સામે શિક્ષાત્મક પગલા લેવા માંગ છે.

નદીનું માર્જીન છોડવું ન પડે તે માટે ખોટો રિપોર્ટ કર્યો
રાકેશ ડવે જણાવ્યું હતું કે,બીએમ સ્કેવરની મંજુર આપતા પહેલા સર્વે રિપોર્ટમાં તત્કાલીન ચીફ ઇજનેરની જાણ,માહિતી અને દોરવણી હેઠળ બિલ્ડર્સને નદીથી માર્જીન છોડવું ન પડે તે માટે કાળવા નદીથી બાંધકામનો અંતર બાબતે ખોટા રિપોર્ટ આજી ૠઉઈછની જોગવાઇઓ અને નિયમોનો ભંગ કરી બાંધકામની મંજુરી મેળવી ગુનો કર્યો છે.

લલિત વાઢેર સામે પોલીસ ફરિયાદ નોંધવા રજૂઆત
જૂનાગઢનાં વિરલ જોટવાએ બી ડીવીઝન પોલીસ સ્ટેશનનાં પીઆઇને રજુઆત કરી જણાવ્યું હતું કે,જૂનાગઢ મનપામાં સરકારી રેકર્ડ સાથે ચેડાં કરવાનું કૌભાંડ થઇ રહ્યું છે. જૂનાગઢનાં નિવૃત સિટી ઇજનેર લલિત વાઢેરને 50 હજારનો દંડ કરવામાં આવ્યો છે. આ અંગે તત્કાલીન કમિશ્નર તુષાર સુમેરાએ કાર્યવાહી કરવા આદેશ કર્યો હતો.તેમની બદલી જતા કમિશ્નર રાજેશ તન્નાએ 50 હજારનો દંડ ફટકાર્યો છે. પરંતુ આ કેસમાં ભારતીય દંડ સહિતા કલમ 177, 181, 197, 198, 199, 200, 463, 464, 465, 468, 470, 471, 120(બી) તેમજ 217, 202, 166એ હેઠળ ગુનો આચરેલ છે. ફોજદારી કૃત્ય બદલ કમિશ્ર્નરે ફરિયાદ કરવાનો હોય છે. પરંતુ લલિત વાઢેરને શિક્ષામાંથી બચાવવાનાં ઇરાદે દંડ કર્યો છે. લલિત વાઢેર સામે ગુનો નોંધવા માંગ છે.

વાઢેરનાં કાર્યકાળમાં થયેલાં બાંધકામની વિજીલન્સ તપાસની માંગ
જૂનાગઢનાં તુષાર સોજીત્રાએ મુખ્યમંત્રીને રજુઆત કરી જણાવ્યું હતું કે, જૂનાગઢ મનપા પાસે રસ્તાઓનું આધારભુત રેકર્ડ ન હોય ગેરકાયદેસર બાંધકામનો રાફડો ફાટ્યો છે. બાંધકામમાં ભ્રષ્ટાચાર થતો હોય તે નકારી શકાય નહી. આ બાબતની ગંભીર તપાસ થવી જોઇએ. તેમજ પૂર્વ સિટી ઇજનેર લલિત વાઢેરનાં કાર્યકાળ દરમિયાન આપવામાં આવેલી બાંધકામની મંજુરીઓ તેમજ રોડ-રસ્તાઓની કામગીરીનાં બીલમાં કરવામાં આવેલા ચૂકવણાંની વિજીલન્સ તપાસ કરવાનો હુકમ કરવામાં આવે તેવી માંગ છે.