મહિલા પોલીસ સ્ટેશનની હેડ કોન્સ્ટેબલે જામીન પર છોડવાના બહાને 6500 રૂા.નો ‘તોડ’ કર્યાની ચર્ચા!

108, 116 કલમ હેઠળ ગુનો નોંધી આરોપીને 6 કલાક સુધી લોકઅપમાં રાખી 1500 રૂા. પોલીસ સ્ટેશન પેટે અને પાંચ હજાર મામલતદાર પેટે જામીનના વસૂલ્યા

આ અંગે ઉચ્ચ ક્ક્ષાએ તપાસ હાથ ધરવામાં આવે તો અનેક મહિલા કોન્સ્ટેબલના તપેલાં ચડી જાય

ખાસ-ખબર સંવાદદાતા

મહિલા પોલીસ સ્ટેશનમાં એક મહિલાએ ઘરકંકાસ બાબતે તેના પતિ વિરુદ્ધ નોંધાવેલી અરજીના આધારે મહિલા પોલીસે મંગળવારે 108 અને 116 કલમ મુજબ ગુનો નોંધી તે શખસને 6 થી 7 કલાક લોકઅપમાં રાખી 24 કલાક ન વિતાવા દેવા માટે તેના સ્નેહીજનો પાસે સોનાલી (નામ કાલ્પનિક છે) નામની મહિલા હેડ કોન્સ્ટેબલે પોલીસ સ્ટેશનમાંથી જામીન મુકત પેટે 1500 અને મામલતદાર પાસે જામીનમુક્ત પેટે પાંચ હજાર મળી કુલ 6,500 રૂપિયાનો તોડ કર્યાની ચર્ચાએ જોર પકડયું છે. ત્યારે 108, 116 જેવી સામાન્ય કલમ મહિલા પોલીસ માટે દુઝણી ગાય સમાન બની ગઇ છે. આ કલમ હેઠળ દરરોજ બે થી ત્રણ લોકો પાસે આવી બહાદુર મહિલા પોલીસ ડરાવી-ધમકાવી પૈસા ખંખેરતી હોવાની પણ ચર્ચા ઉઠી રહી છે.

મહિલાને લગતી કોઇપણ પ્રકારની મુશ્કેલી સમસ્યા વગેરે જેવી બાબતોનું નિરાકરણ શહેરના મહિલા પોલીસ સ્ટેશનમાં કરવામાં આવે છે પરંતુ ત્યાની કેટલીક પૈસા કમાવવામાં બહાદુર અને લાલચુ મહિલા પોલીસે મહિલા પોલીસ સ્ટેશનને કમાણીનું સાધન બનાવી લીધું હોય તેમ તોડ કરી રહ્યાની ચર્ચાઓએ જોર પકડયું છે. શહેરમાં કોઇ મહિલા સાથે બળાત્કાર જેવી ઘટના બને તો તેને સામાન્ય રીતે મહિલા પોલીસ સ્ટેશનમાં ફરિયાદ નોંધાવવા માટે આવવાનું હોય છે પરંતુ આવી ફરિયાદમાં તોડ ન થઇ શકે એટલે ત્યાંની કેટલીક બહાદુર અને લાલચુ મહિલા પોલીસ તેને ઘટના બની હોય તે હદના પોલીસ સ્ટેશને મોકલી દે છે પરંતુ જેવી જ કોઇ ઘરકંકાસ બાબતે અરજી માટે મહિલા પોલીસ સ્ટેશનને પહોંચે એટલે તુરંત જ ત્યાંની અમુક બહાદુર મહિલા પોલીસના મનમાં કમાણીનો લડુ ફુટી નીકળે છે અને આવી મલાઇવાળી અરજીમાં તુરંત જ રસ દાખવી આરોપી અથવા પ્રતિપક્ષને ડરાવી ધમકાવીને પાંચ થી લઇને પચાસ હજાર રૂપિયાનો તોડ કરતા હોવાની ચર્ચાઓ ચાલી રહી છે. ત્યારે શહેરની એક મહિલાએ તેના પતિ વિરુદ્ધ ઘરકંકાસ બાબતે નોંધાવેલી અરજીના આધારે મહિલા પોલીસને શખ્સ વિરુદ્ધ 108 અને 116 કલમ મુજબ ગુનો નોંધી તેની મંગળવારે બપોરે અટકાયત કરતા તેના સ્નેહીજનો મહિલા પોલીસ સ્ટેશને પહોંચી ગયા હતા. ત્યારે બહાદુર અને લાલચુ મહિલા પોલીસ ટોળકી પૈકીની સોનાલી (નામ કાલ્પનિક છે) નામની મહિલા પોલીસ કર્મચારીએ તેના સ્નેહીજનોને ડરાવ્યા હતા કે, આ શખ્સને ર4 કલાક સુધી લોકઅપમાં રાખવામાં આવશે. ત્યારબાદ મામલતદાર પાસે રજૂ કરીને છોડવામાં આવશે. જેથી ડરી ગયેલા સ્નેહીજનોએ કુંભ રાશીવાળો મહિલા પોલીસને આજીજી કરતા લોકઅપમાં અટકાયત કર્યાનાં 6 થી 7 કલાક બાદ પોલીસ સ્ટેશનમાંથી જામીન મુકત કરવાના રૂા.1500 અને મામલતદારમાંથી જામીન મુકત કરવાના 5000 મળી કુલ 6500ની માંગણી કરતા તે શખસના સ્નેહીજનોએ કુંભરાશીવાળી મહિલા કોન્સ્ટેબલને 6500 રૂા. ચુકવી દેતા તુરંત જ તે શખ્સના પોલીસ સ્ટેશન અને મામલતદારમાંથી જામીન મંજૂર કરી છોડી દેવામાં આવ્યો હતો. આવી રીતે દરરોજ બે-ત્રણ લોકો પાસે આ ટોળકી આવા તોડ કરી રહ્યાની ચર્ચાઓ ઉઠી રહી છે. ત્યારે આવા તોડ અટકાવવા ઉચ્ચ અધિકારીઓ યોગ્ય તપાસ કરે તો આ ટોળકીના તપેલા ચડી જાય અને અનેક નિર્દોષ નાગરીકો લૂંટાતા બચી જશે.

116, 108, 151 જેવી કલમ પોલીસ માટે દુઝણી ગાય સમાન
કોઇપણ અરજદાર દ્વારા પોલીસ સ્ટેશનમાં કોઇ વ્યક્તિ વિરુદ્ધ અરજી કરવામાં આવે ત્યારે પોલીસ સૌપ્રથમ 151 કલમ હેઠળ ગુનો નોંધે છે. 151 કલમમાં જે તે પોલીસ સ્ટેશનમાં તાત્કાલિકથી લઇને 24 કલાક સુધી લોકઅપમાં રાખવાની જોગવાઇનો ડર આરોપી અથવા તેના સ્નેહીજનોને આપી 24 કલાક ન રાખવાના બદલે તાત્કાલીક પોલીસ સ્ટેશન અને મામલતદારમાંથી જામીન મુકત કરવા પેટે લાંબો તોડ કરવામાં આવે છે.

મહિલા પોલીસ સ્ટેશનમાં સાથી કર્મચારીના નંબર ન આપવાનો રિવાજ
સામાન્ય રીતે કોઇપણ પોલીસ સ્ટેશનમાં ફરજ બજાવતા કર્મચારીઓના નંબર તેના સાથે કર્મચારી આપે છે. પરંતુ મહિલા પોલીસ સ્ટેશનમાં એવા બહારના કાઢવામાં આવે છે. કે પીઆઇની સખત સૂચના છે કે, મહિલા પોલીસ સ્ટેશનમાં ફરજ બજાવતા કર્મચારીઓ મહિલા હોવાથી તેના નંબર અરજદાર કે પત્રકારોને આપવા નહીં, પરંતુ મહિલા પીઆઇએ આ રીવાજ કાઢયો હશે ત્યારે તે ભાન ભૂલી ગયા હશે કે કર્મચારીઓ ભલે મહિલા હોય પરંતુ તે સૌપ્રથમ એક પોલીસ કર્મચારી છે. અથવા નંબર ન આપવા પાછળનું મૂળભૂત એ પણ કારણ હોય કે જામીનમુકત કરવાના કૌભાંડ બહાર ન આવે.