ફિલ્મ જૂઓ ત્યારે ઘરની લાઈટસ ચાલુ રાખજો અને બચ્ચાંઓને બથમાં લઈને બેસજો કારણકે…
2022માં રિલીઝ થયેલી આ અમેરિકન ફિલ્મ માટે મિક્સ અભિપ્રાયો વ્યક્ત થયાં છે. ઘણાંને એ પસંદ નથી આવી તો અનેકને આ લખનારની જેમ ખૂબ પસંદ પડી છે. સપરિવાર જોઈ શકાય એવી બિસ્ટ ફિલ્મ (આ જ નામથી સાઉથમાં બનેલી ફિલ્મ હિન્દીમાં પણ ડબ થયેલી છે) તમને રોર (સિંહની ડણક અથવા ત્રાડ)ની સતત યાદ અપાવતી રહે છે. પરંતુ સ્વીકારવું પડશે કે રોર કરતાં બિસ્ટ અનેક બાબતમાં ચડિયાતી છે… ડૉ. નેટ ડેનિયલ્સ રજાઓમાં પોતાની બન્ને ટીનએજ બચ્ચીઓને લઈને સાઉથ આફ્રિકાના રિઝર્વ ફોરેસ્ટમાં આવે છે કારણકે આ રિઝર્વ ફોરેસ્ટને મેનેજ કરનાર માર્ટિન બટેલ્સ તેમના ફેમિલી ફ્રેન્ડ છે. માર્ટિન વાઈલ્ડ લાઈફનો બાયોલોજીસ્ટ છે અને જંગલી જાનવર, ખાસ કરીને સિંહો સાથે તેને ખાસો એવો ઘરોબો છે.
- Advertisement -
દરેક રિઝર્વ ફોરેસ્ટમાં એક કાયમી પ્રદૂષણ હોય છે : પ્રાણીઓનો ગેરકાયદે શિકાર કરનારા લોકો. ડોકટર મિત્ર અને તેની બે ટિનએજ પુત્રીને લઈને માર્ટિન આજે સિંહોનો પરિવાર રહે છે, એ સ્થળે આવે છે પણ એક ઘાયલ સિંહણ તેને પોતાની પાસે આવવા દેતી નથી. સિંહણની વેદનાના સીસકારા અને ઘૂરક્યિાં માર્ટિનને શંકાસ્પદ લાગે છે એટલે…
મિત્ર અને તેની પુત્રીઓ સાથે જંગલમાં જ વસતી આદિવાસીઓની વસાહતમાં પહોંચે છે કારણકે માર્ટિનને જાણવું છે કે સિંહણ ઘાયલ કઈ રીતે થઈ પરંતુ વસાહતમાં હિચકારો નજારો બધાને હેબતાવી દે છે. આખી વસાહતમાં લોહિયાળ લાશો પડી છે. સ્પષ્ટ થાય છે કે રાની પશુઓએ બધાને ફાડી-ચીરી નાખ્યા છે… માર્ટિનને આ બધું ભેદી લાગે છે એટલે તે મિત્ર અને તેની દીકરીઓને જીપમાં લઈને સલામત સ્થળે જવા નીકળે છે કારણકે જંગલના આ વિસ્તારમાં વોકીટોકી પણ સ્પષ્ટપણે કામ કરતાં નથી. જંગલના કાચા રસ્તે જીપ આગળ વધે છે ત્યાં અધવચ્ચે જ જંગલી પ્રાણીનો ભોગ બનેલો એક આદિવાસી લોહિયાળ હાલતમાં મળે છે…
એ વાત તો સ્પષ્ટ થઈ ગઈ છે કે આ હૂમલો સિંહ જેવા પ્રાણીએ જ ર્ક્યો છે પણ સિંહ કારણ વગર (આટલા અને સતત) હૂમલા ન કરે એ જાણતો માર્ટિન મિત્રડોકટરને ઘાયલ આદિવાસી પાસે છોડીને ઘાતક બની ગયેલાં સિંહનું પગેરું પકડવા એકલો આગળ વધે છે પણ…
સત્ય ઘટના પર આધારિત બિસ્ટ ફિલ્મની આમ જૂઓ તો અહીંથી શરૂઆત થાય છે અને અંત સુધી એ તમારો જીવ તાળવે ચોંટાડી દે છે. મૂળ આઈસલેન્ડના ડિરેકટર બાત્સાર કોરમાકરે ડિરેકટ કરેલી ચોરાણું મિનિટની બિસ્ટ ની વાર્તા એકદમ સીધીસાદી છે. ખૂંખાર પ્રાણીઓ વચ્ચે નિસહાય જેવા બે પુરુષો અને બે ટિનએજ કેવી લડત આપે છે અને કોણ, કેવી રીતે બચે છે, તેની જ વાત છે. પ્રાણી અને માણસો વચ્ચેના સંબંધ-ઘર્ષણની વાત કરતી આપણે ત્યાં (જાનવર ઔર ઈન્સાન, આઝાદ, ર્ક્તવ્ય, હાથી મેરે સાથી, કાલ વિગેરે) અનેક ફિલ્મો બની છે પરંતુ અમેરિકન ફિલ્મ બિસ્ટ નો મિજાજ એકદમ અલગ અને થોડો ડરામણો પણ છે. અહીં માણસ દેખું, માણસ ખાઉં જેવા એક સિંહ વચ્ચે ફસાયેલાં અને બચવા માટે મરણિયા પ્રયાસો કરતાં માણસોની વાત છે. સામાન્ય રીતે શાંત ગણાતાં અને અટકચાળાં વગર ન ઉશ્કેરાતાં સિંહ શા માટે હિંસક અને આક્રમક બની ગયા છે, તેનું કારણ પણ સમજવા જેવું છે.
- Advertisement -
આ જીવલેણ ચુંગાલમાંથી બચવા માટેની માનવીય મથામણ, કોઠાસુઝ અને પિતૃપ્રેમની પણ વાત કરતી બિસ્ટ ફિલ્મ એક અલગ અનુભવ જેવી છે છતાં શાહનામા માં તેની ભલામણ કરવાનું ખાસ કારણ ફિલમની ફોટોગ્રાફી અને ધડકન સૂન્ન કરી દે તેવા સીન્સ છે. વીએફએક્સથી બધું થઈ શકે છે, એ વાત સાચી પણ બિસ્ટ ફિલ્મના કેટલાંક સીન્સ એટલાં લાજવાબ અને નેચરલ લાગે છે કે તમે આફરિન પોકારી જાવ. મિત્ર અને તેની બચ્ચીઓ સાથે પ્રથમ વખત સિંહને મળતાં બાયોલોજીસ્ટ માર્ટિનને તમે ડાલમથ્થા સાથે ધિંગામસ્તી કરતાં જોશો તો આભા જ થઈ જશો. એ જ રીતે પાછળ દોડતાં સિંહથી બચવા જીપનો દરવાજો બંધ થાય અને સિંહ દરવાજાના કાચ સાથે અથડાઈ, એ જૂઓ તો ખરેખર થથરી જશો… બિસ્ટ ફિલ્મમાં આવા સીન્સની ભરમાર છે. પુત્રીથી ખૂંખાર સિંહને દૂર લઈ જવા માટે પિતા ખુદ સિંહને પોતાની જાત ધરી દે છે, એ અને પછીના શ્યોનો ઉલ્લેખ એટલા માટે ર્ક્યો છે કે એ સીન્સ જોવાનું તમને કુતૂહલ જાગે અને…
તમે એમેઝોન પ્રાઈમ પરની બિસ્ટ ફિલ્મ જૂઓ. હા, જોવામાં બચ્ચાં સાથે હોય તો હોમ થિયેટરની લાઈટસ ચાલુ રાખજો અને બચ્ચાંને બથમાં લઈને બેસજો. આ ડરામણો અનુભવ છે, જે ચૂક્વા જેવો નથી. ન તમારે, ન તમારા બચ્ચાંઓએ.
બુલેટ ટ્રેન: ગતિશીલ અકસ્માતો
પલ દો પલ કા સાથ હમારા, પલ દો પલ કે યારાને હૈ… ધ બર્નિંગ ટ્રેન નામની આપણી હિન્દી ફિલ્મની કવ્વાલીના આ શબ્દો દરેક ટ્રેનમાં મુસાફરી કરનારાને લાગુ પડે છે, પછી એ ટોક્યો (જાપાન)ની બુલેટ ટ્રેન જ કેમ ન હોય ? મારિયા બિટલેની આ જ નામની નોવેલ પરથી હોલીવુડ ડિરેકટર ડેવિડ લિત્ચે બનાવેલી બુલેટ ટ્રેન ફિલ્મની મજા એ છે કે તેમાં મુસાફરી કરનારા લગભગ પોણાં ડઝન જેટલાં મુસાફરો પોતપોતાનો એજન્ડા પૂરો કરવા મુસાફરી કરી રહ્યા છે અને એ બધા આપસમાં, એક પછી એક અથડાય છે.
જાણીતા અભિનેતા બે્રડ પીટ આ બુલેટ ટ્રેનમાં ચઢે છે કારણકે તેણે મિલિયન ડોલર ભરેલી બેગ તફડાવવાની છે. એક પિતા પણ મુસાફર બને છે કારણકે એ પોતાના પુત્રને ઊંચાઈ પરથી ફેંકી દેનારની હત્યા કરીને બદલો લેવા માંગે છે. બે ક્રિમિનલ પણ આ બુલેટ ટ્રેન માં છે. તેણે એક ડોનના અપહત પુત્રને છોડાવી લીધો છે અને તેને જીવતો ડોન-પિતાને સોંપવાનો છે, મિલિયન ડોલર ભરેલી બેગ સાથે.
ટિપિકલ ફિલ્મ રિવ્યુની ભાષામાં લખીએ તો, બુલેટ ટ્રેન ફિલ્મ (ઝી ફાઈવ પર જોવા મળશે) દિમાગને ખિસ્સામાં મૂકીને એન્જોય કરવાની રાઈડ છે કારણકે આ એકશન થ્રિલરને કોમેડીનો તડકો મારવામાં આવ્યો છે.
આખી ફિલ્મ બુલેટ ટ્રેનની અંદર જ છે છતાં ચુસ્ત પટકથા, શાર્પ ફોટોગ્રાફી અને રમૂજી એટિટયૂડને કારણે ફિલ્મ મજેદાર બની છે. બે્રડ પિટને જોવાની પણ મજા આવે છે. જો કે ટ્રેનમાં મુસાફરી કરી રહેલાં જોડિયા-ભાઈ જેવા ક્રિમિનલ અને બીજા સરપ્રાઈઝ એલિમેન્ટ આ ફિલ્મનો પ્લસ પોઈન્ટ છે. ફેમિલી સાથે હસતાં-હસતાં જોઈ શકાય એવી આ ફિલ્મ છે.
