રાજકોટમાં રહેતા વૃદ્ધા પાસેથી વેટલોસની દવાના નામે અને RBIના અધિકારીની ઓળખ આપી 84.38 લાખ પડાવ્યા

સાયબર માફિયાઓએ ડિજિટલ અરેસ્ટ કર્યા વિના એકલા રહેતા વૃદ્ધાને શિકાર બનાવ્યા

2024થી 2026 સુધી ફોલી ફોલીને પૈસા કઢાવ્યા : સાયબર ક્રાઇમ પોલીસ મથકમાં ફરિયાદ

રાજકોટના કાલાવડ રોડ ઉપર આવેલ સ્વામિનારાયણ મંદિર પાછળ યોગીદર્શન સોસાયટીમાં રહેતા કુસુમબેન પ્રદીપભાઈ ટાંક ઉ.62 નામના વૃદ્ધાએ ડો.અમન મિશ્રા, શિવમ શર્મા, ડો.મુકુલ સિંહ, હર્ષવર્ધન, દિપક ચોપડા, અલગ અલગ બેન્ક ખાતા ધારકો અને તપાસમાં ખુલે તેની સામે રાજકોટ સાયબર ક્રાઇમ પોલીસ મથકમાં ડિજિટલ અરેસ્ટ કરી 84 લાખ 38 હજાર 584 રૂપિયાની છેતરપિંડી અંગે ફરિયાદ નોંધાવી છે.

ફરિયાદમાં જણાવ્યું હતું કે હું એકલી રહુ છુ અને મારો દિકરો દુબઈ ખાતે નોકરી કરે છે તેમજ હુ મોબાઇલમા ફેસબુક, વોટસએપ વગેરે વાપરુ છું 2024માં હુ ફેસબુક જોતી હતી તે દરમીયાન એક વિડીયોમા મે વેઇટ લોસ કરવા બાબતેની હર્બલ દવાની એડવર્ટાઇઝમેન્ટ જોઈ હતી તેમાં રહેલી લીંક ઓપન કરી જોતા તેમા એક ફોર્મ ખુલેલ આ ફોર્મ મે ભર્યું હતું બાદ બીજા દિવસે ફોન આવેલ તેણે ડૉ. અમન મિશ્રા NUTRICIA HEALTHCAREમાથી વાત કરે છે તેમ કહી તમારે વેઇટલોસની દવા લેવાની છે તેમ પૂછતાં મે હા પાડી હતી તેણે એક માસની દવા 4000ની આવશે તમે પૈસા ભરો એટલે તમને દવા મોકલી આપીશ જે બાદ આ રૂપીયા મે મારી નાની બહેન ભાનુબેન પાસેથી આ ડૉ. અમન મિશ્રા જણાવેલ તેમા જમા કરાવેલ ચાર-પાંચ દિવસ બાદ પાછો અમન મિશ્રાનો ફોન આવેલ અને મને પુછેલ કે, દવા આવી ગઇ એટલે મે ના પાડતા તેણે મને પાછા પૈસા ભરવાનુ જણાવેલ આમ આ ડૉ. અમન મિશ્રાએ લગભગ બે- અઢી માસ દરમીયાન અલગ અલગ બહાને પૈસા પડાવેલ તેમજ આ સમય દરમીયાન કોઇ શિવમ શર્માએ પણ મને ફોન કરી પૈસા માંગતા તેને પણ મે પૈસા આપ્યા હતા થોડા સમય પછી ડૉ. મુકુલ સિંહએ ફોન કરી મારી પાસેથી પૈસા લઇ દવા મોકલાવી હતી બાદ મુકુલનો પાછો ફોન આવેલ કે હવે કેમ છે.? કાઇ ફેર પડ્યો મે ના કહેતા તેણે પહેલા મોકલાવેલ દવા કરતા વધુ પાવરની ભારે દવા મોકલવાનુ જણાવેલ અને આ રીતે ભારે દવા મોકલવાનુ જણાવી વારંવાર મારી પાસેથી પૈસા માંગતા મેં મારી નાની બહેન ભાનુબેન વાઘેલા તથા પડોસી નામલબેન હાથી તથા મારા દિકરા અમીતના મિત્ર નાગરાજ પાસેથી પૈસા આપ્યા હતા બાદ કોઇ હર્ષવર્ધન નામના વ્યક્તીએ ફોન કરી તમે દવા લીધી છે તેની ટૉટલ રકમ કંપનીમા જમા થયેલ છે તે તમને પરત મળી જશે જો તમે બીજા થોડા રૂપીયા જમા કરાવો તો જેથી મેં ફરી પૈસા જમા કરાવ્યા હતા બાદ તેણે પાછુ જણાવેલ કે, તમે લેટ કર્યું છે. તમારે હવે પેનલ્ટી સાથે પાછા પૈસા ભરવા પડશે જો નહી ભરો તો આ રકમ ચેરીટીમાં જમા થઇ જશે તેમ જણાવેલ એટલે મે પાછા તેણે જણાવ્યા મુજબની રકમ બેંક ખાતામા જમા કરવાતા તેણે તમારી ફાઇલ તૈયાર કરવી પડશે અને ફાઇલ તૈયાર કરવા માટે મને ફરીથી પૈસા જમા કરવા જણાવેલ જે દરમીયાન કોઇ દિપક ચોપડા નામના વ્યક્તીએ ફોન કરી જણવેલ કે, મારી ફાઇલ બનાવવાનું કામ હું કરું છુ અને તેણે પણ પૈસા માંગતા મે આ દિપકે જણાવ્યા મુજબ પૈસા આપ્યા બાદ હર્ષવર્ધનનો પાછો ફોન આવેલ જેથી મે તેને જણાવેલ કે, મારી પાસે હવે પૈસા નથી અને તમે બધા મને હેરેસ્ટમેન્ટ કરો છો તો હર્ષવર્ધનને જણાવેલ કે, તમે ચીંતા ન કરો હુ રીઝર્વ બેંક ઓફ ઇંડીયામા જ કામ કરું છુ અને દિપક ચોપડાનુ બધુ કામ તે જ સંભાળે છે તેમજ આ દરમીયાન આ હર્ષવર્ધનને મને તેલંગાણા હાઇકોર્ટનો ઓર્ડર પણ મોકલેલ અને જણાવેલ કે RBIના નીયમ મુજબના બીલની પી.ડી.એફ. પણ મોકલેલ અને જી.એસ.ટી.ના અને અલગ અલગ ચાર્જના નામે મારી પાસેથી વધુને વધુ પૈસા માંગતા ગયા જે હું જણાવેલ બેંક ખાતામા જમા કરાવતી ગઈ અને આ દરમીયાન મે તેલં ગાણા હાઇકોર્ટનો ઓર્ડર અંગ્રેજીમા હોય જેથી મારા ભાણેજ કરણને તે જોઇ તેમા શુ લખ્યું છે તે માટે મે તેને વોટસએપમા મોકલેલ પણ તે તેની મમ્મી ભાનુબેને જોય લેતા તેણે મારા દિકરા અમીતને ફોનથી જાણ કરતા મારી સાથે ફ્રોડ થયું હોવાનું જણાવતા અત્યાર સુધીમાં 84.38 લાખ રૂપિયા ઉપરોક્ત લોકોએ પડાવી લીધા હોય છેતરપિંડી અંગે ફરિયાદ નોંધાવતા પીઆઇ બી બી જાડેજાએ ગુનો નોંધી તપાસ હાથ ધરી છે.

2000થી શરુ થયેલો ખેલ 17 લાખ સુધી પહોંચ્યો : 67 ટ્રાન્જેક્શન
રાજકોટમાં સાયબર ગઠિયાઓનો ભોગ બનેલા વૃદ્ધા પાસેથી સૌ પ્રથમ દવાના નામે માત્ર 2000 રૂપિયા લેવામાં આવ્યા હતા તે પછી 3 હજાર, 4 હજાર, 5 હજાર, 6 હજાર, 10 હજાર, 12 હજાર, 25 હજાર, લાખ એમ 17 લાખ સુધીની રકમ પડાવી લેવામાં આવી હતી 2024થી 2026 સુધીમાં આ વૃદ્ધાએ 67 ટ્રાન્જેક્શન મારફત 84.38 લાખ આપ્યા હતા.