તાલાલા શહેરનાં ટ્રાફિકથી ભરપૂર શાક માર્કેટ મુખ્ય ચોકમાં લક્ઝરી બસને ડમ્પરે પાછળથી ઠોકર મારી

અકસ્માત બાદ ટ્રાફિક જામ થવા છતાં ટ્રાફિક પોલીસ આવી નહીં: લોકો મુશ્કેલીમાં મુકાયા

ડમ્પર ચાલક અકસ્માત કરી લાજવાના બદલે ગાજતો હોય…લોકોમાં રોષ

ખાસ-ખબર ન્યૂઝ ગિર-સોમનાથ, તા.11
તાલાલા શહેરના ટ્રાફીક થી ભરપુર શાક માર્કેટ મુખ્ય ચોકમાં લકઝરી બસ ને ડમ્પરે પાછળથી ઠોકર મારતાં લોકોમાં નાસભાગ મચી ગઈ હતી.અકસ્માત થતાં મુખ્ય ચોકમાં ભારે ટ્રાફિક જામ થઈ જતા ચોકમાંથી પસાર થતા લોકો મુશ્કેલીમાં મુકાઇ ગયા હતા.

મુખ્ય ચોક વિસ્તારના લોકોનાં જણાવ્યા પ્રમાણે રાજકોટ થી સોમનાથ તરફ જતી લકઝરી બસ તાલાલા શહેરમાં શાકમાર્કેટ ચોક માંથી પસાર થતી હતી.આ દરમ્યાન પાછળથી આવતા ડમ્પરે લકઝરી બસને ઠોકર મારતાં બસને નુકસાન થયું હતું.નગરના ભારે ભરચક વિસ્તારમાં અકસ્માત થતાં લોકોમાં નાસભાગ મચી ગઈ હતી.અકસ્માતમાં સદનસીબે કોઈને ઈજા પહોંચી નથી.અકસ્માત થતાં ચોકમાં ભારે ટ્રાફિક જામ થઈ જતાં લોકોને પસાર થવું કઠીન બની ગયું છતાં પણ શહેરની ટ્રાફિક વ્યવસ્થા સંભાળતી પોલીસ અકસ્માત સ્થળે આવી નહીં જેથી ટ્રાફિક પોલીસ સામે લોકોમાં ભારે રોષ ભભુકી ઉઠયો હતો.
અકસ્માત કરનાર ડમ્પર ભાજપના કદાવર નેતાનું હોવાનું જાણવા મળે છે.ડમ્પર ચાલક અકસ્માત કરી લાજવાના બદલે ગાજતો હોય તેમ લોકો ઉપર રોફ જમાવતો હતો.તાલાલા શહેરમાંથી ખનીજ સંપતિ ભરી કદાવર ડમ્પરો બેફામ દોડે છે.ઓવરલોડ માલ ભરેલ ડમ્પરો ભરપૂર ટ્રાફિક માંથી પસાર થાય ત્યારે લોકો ભયભીત થઈ જાય છે.કેપેસીટી કરતા વધારે ખનીજ સંપતિ ભરી નગરમાંથી પસાર થતા ડમ્પરો પોલીસ સહિતના સત્તાવાળાઓ નજરે નીહાળે છે છતાં માનવ જીંદગી સામે જોખમરૂપ ગેરકાયદેસર દોડતા કદાવર ડમ્પરો સામે કાર્યવાહી કરવાનાં બદલે પોલીસ ધુતરાષ્ટ્ર બની ગઈ હોય તેવા ખુલ્લા આક્ષેપો લોકો કરી રહ્યા છે..તાલાલા શહેરમાં લોકોને પસાર થવું પણ કઠીન બને તેવા ભરચક ટ્રાફિક વાળા વિસ્તારોમાંથી માનવ જીંદગી માટે જોખમી ગેરકાયદેસર પસાર થતા કદાવર ડમ્પરો સામે પોલીસ તથા લાગતાં વળગતા સત્તાવાળાઓ કાયદાકીય કાર્યવાહી કરે તેવી પ્રબળ લોકમાંગણીઉઠીછે.