સાસ બહુ અચાર પ્રા.લિ.: સ્વાદિષ્ટ ફેમિલીયર અથાણું

શાહનામામાં પ્રગટ થતી મોટાભાગની વેબસિરિઝમાં એ મર્યાદા રહી છે કે તમે તેને સહપરિવાર માણી શક્તા નથી પરંતુ આ બધામાં એક પ્રોડકશન હાઉસ એવું પણ છે કે, તેણે બનાવેલી વેબસિરિઝમાં તમને ૠષિકેશ મુખરજી, બાસુ ભટ્ટાચાર્ય, આસિત સેન અને ગુલઝારસાહેબની ફિલ્મો જેવી ખુશ્બુ આવે. ટીવીએફે (ધ વાઈરલ ફિવર) બનાવેલી પંચાયત, યે મેરી ફેમિલી, કોટા ફેકટરી, ગુલ્લક સિરિઝ એવી છે કે તેને લોકોએ સપરિવાર માણી છે અને વ્યુઅરશીપ રેટમાં પણ ઊંચી પાયદાન પર સ્થાન પામી છે. આ જ પ્રોડકશન હાઉસે બનાવેલી (અને ઝિ ફાઈવ પર સ્ટ્રીમ થયેલી) સાસ બહુ અચાર પ્રા. લિ. પણ નેચરલી, તેના નામમાં સ્પષ્ટ થાય છે તેમ, એક મેચ્યોર્ડ લેવલનો ફેમિલી ડ્રામા છે. મેચ્યોર્ડ શબ્દ અહીં સકારણ લખ્યો છે કારણકે સાસુ, બહુ અને અથાણાંની વાત કરતી આ વેબસિરિઝમાં સીધાસપાટ સંબંધો દર્શાવવામાં આવ્યા નથી પરંતુ એ સંબંધોમાં એક્વીસમી સદીની માનસિક્તાના પડઘા કોતરાયેલાં છે. અહીં દિપક શ્રીવાસ્તવ (સમીર સોની) અને સુમન શ્રીવાસ્તવ (અમૃતા સુભાષ) નામના બચ્ચરવાળ દંપતિની વાત છે પરંતુ બન્ને અલગ થઈ ગયા છે. પત્ની સુમન શ્રીવાસ્તવ અભણ કહી શકાય, એ પ્રકારની છે અને મોટાભાગે આવી સ્ત્રી રસોઈકામમાં નિપુણ હોય છે. સુમન શ્રીવાસ્તવ અથાણાં બનાવવાની એક્સપર્ટ છે.

એક દીકરી અને એક પુત્ર પછી પત્ની સુમનથી અલગ થઈ ગયેલાં દિપક શ્રીવાસ્તવ મનીષા (અંજના સુખાની) ને પોતાના ઘરે લઈ આવ્યો છે, જેને ખરા દિલથી પરિવારમાં કોઈ માન-સન્માન આપતું નથી. ખુદ દિપકની માતા (સાસુ – યામિની દાસ) પણ પ્રથમ વહૂ એટલે કે સુમન માટે સોફટ કોર્નર ધરાવે છે અને બેધડક અલગ રહેતી સુમનને મળવા, સપોર્ટ કરવા જતી-આવતી રહે છે.હાઉસવાઈફમાંથી ઘરભંગ થયેલી સુમન પગભર થઈને પોતાના બન્ને સંતાનોને, પોતાની પાસે લાવવા માંગે છે અને એટલે હોમમેઈડ અથાણાંમાંથી કમાણી કરવા માટે સતત પ્રયત્નશીલ છે અને આ દરમિયાન શ્રીવાસ્તવ ફેમિલી સાથે, જે કંઈ બને છે, એ સાસ બહુ અચાર પ્રા. લિ. ની કથા છે.

અપૂર્વસિંઘ કર્કીએ ડિરેકટ કરેલી છ એપિસોડની આ વેબસિરિઝની મજા આપસી સંબંધોમાં આવેલી ઉષ્મા, ઉકળાટ, અભાવ, સ્નેહ, વિશ્વાસ અને આત્મવિશ્વાસની વાત સરસ રીતે કરે છે. અલગ રહેતી માતા સાથે લગાવ હોવા છતાં તેની નબળી આર્થિક સ્થિતિને કારણે મોટી દીકરી ઘરમાં ચોરી કરે છે. પ્રથમ વહૂનો અથાણાંનો બિઝનેસ ગોઠવાય જાય એ માટે ખુદ દાદી (સાસુ) પણ એક વખત ઘરમાંથી દાગીના ચોરીને પૈસાની વ્યવસ્થા કરી આપે છે તો પોતે જ સર્જેલાં સંબંધોના આટાપાટાથી અપસેટ પતિ દિપક શ્રીવાસ્તવનો નાના પુત્ર ઉપર હાથ ઉપડી જાય છે અને એ ઘર છોડીને ચાલ્યો જાય છે તો…

એકલી રહીને સેટલ થવા ઝઝૂમી રહેલી સુમન સાથે પણ અથાણાંના બિઝનેસમાં અનેક મારા-માઠાં પ્રસંગો બનતા રહે છે અને સાસ બહુ અચાર પ્રા.લિ. જોતાં જોતાં તમને પણ હરિવંશરાય બચ્ચનની આ પંક્તિ ચરિતાર્થ થતી દેખાય છે : જીવન હૈ તો સંઘર્ષ હૈ, સંઘર્ષ હૈ તભી તો જીવન હૈ

જિંદગી ક્યારેય, કોઈની એકધારી સુરેખ હોતી નથી. તેમાં નાના મોટા ઉતારચઢાવ આવતાં રહે છે. ઉતાર તમને અકળાવે તો ચઢાવ તમને ચાનક ચડાવે… સમીર સોની, અમૃતા સુભાષ અને અજંના સુખાની અભિનીત આ વેબસિરિઝ આ બધી વાતોની સતત ગવાહી આપતી રહે છે. દાદી સહિત બધાનો અભિનય સંયમિત અને સચોટ છે પરંતુ નવી વહૂનું પાત્રાલેખનની વિશેષતા એ છે કે તમને તેના માટે ધિકકાર નથછ જાગતો અને હા, આ સિરિઝનું લેખન-છ લેખકોએ ર્ક્યું છે. તેમની મહેનત સફળ થઈ છે.

19(1)(a)

શિર્ષક 2022માં ડિઝની હોટ સ્ટાર પર સ્ટ્રીમ થયેલી એક મલયાલમ ફિલ્મનું નામ છે, જે ભારતના સંવિધાનની એક કલમ છે. આ કલમ મુજબ આપણા દેશમાં બધાને વાણી સ્વાતંત્ર્યનો તેમજ તેની અભિવ્યક્તિનો અબાધિત અધિકાર છે પણ ભારતીય સમાજની તાસીર આપણે જાણીએ છીએ. વાત પોલિટિકલ નથી કરવી પણ આપણી આસપાસની કરવી છે. વ્યક્ત ન થવું અને અવ્યક્ત જ રહેવું, એ બધું જ પીડાદાયી છે અને વિજય સેતુપતિ, નિત્યા મેનન અને ઈન્જીત સુકુમારનને ચમકાવતી ફિલ્મ પણ બોલવાની સજા અને ન બોલીને થતી ગૂંગળામણને વ્યક્ત કરે છે. પ્રથમ વખત જ ફિચર ફિલ્મ ડિરેકટ કરી રહેલાં ઈન્દુ વી. એસ. ની આ ફિલ્મ છે. તેમણે જ લખેલી કથામાં વિજય સેતુપતિ એક આંદોલનકારી છે તો નિત્યા મેનન ઝેરોક્ષ્ાની ચલાવતી યુવતી છે. એક મોડી રાતે રસ્તા પર નીકળેલાં આંદોલનકારી વિજય સેતુપતિની બે શૂટર હત્યા કરી નાખે છે. વિજયને વ્યક્ત થવાના અધિકારની કિંમત ચૂક્વવી પડે છે તો તેને મનોમન પસંદ કરનારી નિત્યા મેનન અવ્યક્ત રહ્યાઓ ઝૂરાપો વેઠતી રહે છે. તેની એક બહેનપણીને પણ ન બોલવાને કારણે કમને લગ્ન કરવા પડે છે… ફિલ્મ એકદમ ધીમી છે. સમજવાનું છે, એ બધું અધ્યાહાર રહે છે પણ મિનિંગ ફૂલ સિનેમા જોવાની આદત હોય તો આ બોલકાંપણાંનો મહિમા અને મૌનનું તાંડવ માણવા જેવા છે.