એક જ સપ્તાહમાં શરદી-તાવના 1500થી વધુ કેસ, ડેન્ગ્યુના 4 કેસ

રાજકોટમાં બેવડી ઋતુની અસરઃ વર્ષમાં ડેન્ગ્યુના કુલ કેસ 33 પર પહોંચ્યા, ટાઈફોઈડના નવા 2 દર્દી સામે આવ્યા

ઝાડા-ઉલટીના 184 કેસ નોંધાયાઃ આ આંકડા ફક્ત મનપા સંચાલિત આરોગ્ય કેન્દ્રના છે

રાજકોટ શહેરમાં બદલાતી ઋતુ વચ્ચે મોસમી અને મચ્છરજન્ય રોગચાળો વકરી રહ્યો છે. રાજકોટ મહાનગરપાલિકાના આરોગ્ય વિભાગ દ્વારા તાજેતરમાં જાહેર કરાયેલા સાપ્તાહિક આંકડા અનુસાર શહેરમાં શરદી, ઉધરસ, તાવ તેમજ પાચનતંત્ર સંબંધિત બીમારીઓના કેસોમાં નોંધપાત્ર વધારો જોવા મળ્યો છે.  છેલ્લા એક સપ્તાહ દરમિયાન શહેરમાં શરદી-ઉધરસના ૮૨૪ અને સામાન્ય તાવના ૭૧૯ નવા કેસ નોંધાયા છે, જેના કારણે સરકારી તેમજ ખાનગી હોસ્પિટલોમાં દર્દીઓની ભીડ જોવા મળી રહી છે. આ સાથે ચાલુ વર્ષ ૨૦૨૬માં શરદી-ઉધરસના કુલ કેસનો આંકડો ૩૦,૦૨૯ અને સામાન્ય તાવના કેસ ૨૮,૪૫૪ પર પહોંચી ગયો છે. આ ઉપરાંત દૂષિત ખોરાક અને પાણીજન્ય બીમારીઓમાં ઝાડા-ઉલટીના વધુ ૧૮૪ દર્દીઓ ઉમેરાતા વર્ષ દરમિયાન નોંધાયેલા આવા દર્દીઓની કુલ સંખ્યા ૧૦,૫૫૫ થઈ છે, જ્યારે ટાઈફોઈડ તાવના વધુ ૨ કેસ સામે આવ્યા છે. જોકે રાહતની વાત એ છે કે આ સપ્તાહ દરમિયાન તેમજ ચાલુ વર્ષે કમળો, મરડો કે કોલેરાનો એક પણ નવો કેસ નોંધાયો નથી.બીજી તરફ, મચ્છરજન્ય રોગોની સ્થિતિ પર નજર કરીએ તો સપ્તાહમાં ડેન્ગ્યુના નવા ૪ પોઝિટિવ કેસ સામે આવતા વર્ષ ૨૦૨૬માં ડેન્ગ્યુના કુલ કેસ વધીને ૩૩ થયા છે. આ સાથે ચિકનગુનિયાનો ૧ નવો કેસ નોંધાતા વર્ષનો કુલ આંકડો ૨ થયો છે, જ્યારે મેલેરિયાનો આ સપ્તાહમાં એક પણ નવો દર્દી નોંધાયો નથી.

ફિલ્ડવર્કરો દ્વારા 684 ઘરોમાં ફોગિંગ કરવામાં આવ્યું

વધતા કેસોને ધ્યાને રાખી મહાનગરપાલિકાના આરોગ્ય તંત્ર દ્વારા પોરાનાશક કામગીરી અને ફોગિંગ ઝુંબેશ તેજ કરવામાં આવી છે, તેમજ નાગરિકોને પોતાના રહેણાંક પરિસરમાં પાણી ભરાવા ન દેવા અને સ્વાસ્થ્ય પ્રત્યે સાવચેતી રાખવા અપીલ કરવામાં આવી છે. રહેણાંક સિવાયના ૩૨૩ અન્ય પ્રીમાઇસીસ (જેમ કે બાંધકામ સાઇટ્સ, શાળાઓ, હોસ્પિટલો, હોટેલો, ઔદ્યોગિક એકમો, ભંગારના ડેલા, સેલર, પાર્ટી પ્લોટ વગેરે)ની તપાસ કરવામાં આવી હતી. મચ્છરના પોરા/ઉત્પત્તિ મળી આવતા રહેણાંકમાં ૨૩૫ અને કોમર્શિયલ ૭૦ મળી કુલ ૩૦૫ આસામીઓને નોટિસ ફટકારી વહીવટી ચાર્જ વસૂલવાની કાર્યવાહી કરવામાં આવી છે.